Prentsa Oharren banner

Udalak 370.000 eurotik gorako laguntzak onetsi ditu hezkuntza arloan

Hezkuntzako lau deialdi onetsi ditu Tokiko Gobernu Batzarrak 2021-2022 ikasturterako, 371.250 euroan

Lehen deialdia Gasteizko ikastetxeetako guraso-elkarteek antolatutako eskolaz kanpoko ekintza osagarrietarako da, eta 189.000 euroko diru-zuzkidura du.

Bigarren deialdia ikasteko zailtasunak dituzten haurrei laguntzeko da, eta 150.000 euroko inbertsioa egingo du Hezkuntza Zerbitzuak. Hirugarren laguntza-ildoa elkarteek hezkuntza premia berezien arloan antolatzen dituzten jardueretarako da, eta 20.000 euroko laguntza du.

Hezkuntza arloan onetsitako azken deialdiak Gasteizko Udaleko Hezkuntza Zerbitzuaren programetan parte hartzen duten ikastetxeei garraiorako dirulaguntzak emateko da, eta 12.250 euroko zuzkidura du.

 

 

 

 

 

 

Share

Gasteizek merkataritza eta ostalaritza-enpresak ezarri eta modernizatzeko laguntzak eskatzeko epea ireki du

Maider Etxebarriak dioenaren arabera, aurkeztutako proiektuek “inbertsioaren % 25 eta % 40 bitarteko dirulaguntza jaso ahal izango dute”.

Laguntzek ildo berri bat dute, terrazetarako altxariak erosteko.

Gasteizko Udalak txikizkako merkataritzaren, zerbitzu pertsonalen eta ostalaritzaren arloetako enpresa txikiak —50 enplegatu, gehienez— ezartzeko eta berritzeko laguntzak eskatzeko epea ireki du. Eskabideak ekainaren 18ra arte aurkeztu ahal izango dira eta deialdiak 300.000 euroko aurrekontua du. Maider Etxebarria lehen alkateorde eta Ekonomia Sustapenerako zinegotziak azaldu duenez, “sektorearen eskaerak aintzat hartu ditugu eta aurkeztutako proiektuek inbertsioaren % 25 eta % 40 bitarteko laguntzak eskuratu ahal izango dituzte. Dirulaguntzak ahalik eta lokal gehienetara iristea espero dugu, atzeraeraginezkoak izango direlako gainera. Zehazki, 2020ko uztailaren 18tik hil honetako 18ra bitartean egindako gastuak ordainduko dituzte”.

Laguntza-ildoaren helburua da hiriko enpresa txikien lehiakortasunaren hobekuntza sustatzea. Honako hauei zuzentzen zaie deialdia: abian jartzeko edo berritzeko inbertsioa egiten duten saltokiak, tabernak, jatetxeak, hotel txikiak, eta zerbitzu pertsonalen negozioak —hala nola ile-apaindegiak eta estetika-zentroak—. Diruz lagundu daitezke, besteak beste, ekintzak hauek: lokalak zaharberritzekoak, ekipoak hobetzekoak —jarduera nagusiarekin zerikusia duten makinak eta altxariak, eguzki-oihalak, pertsianak, aire-garbigailuak eta manparak—, eta pandemiak eragindako aholkularitza-gastuak.

Berrikuntza gisa, deialdiak ildo bat dauka Udalak baimendutako mahai hankabarrak ekipatzeko elementuak erostea diruz laguntzeko. “Pauso hau ematen dugu ostalaritzari laguntzeko, terrazak ahalik eta gehien aprobetxatu behar dituelako. Laguntza hauekin eguzki-oihalak, mahaiak, aulkiak, aldi baterako itxiturak edo lorontziak erosteko dirulaguntzak emango dira”, gehitu du Etxebarriak.

 

Share

Merkataritza digitalizatzeko eta ekonomia zirkularreko proiektuak garatzeko laguntzak onetsi ditu Gasteizko Udalak

Ekonomia Sustapenaren Sailak 110.000 euro jarriko ditu bi deialdi horietarako.

 

Ekonomia Sustapenaren, Enpleguaren, Merkataritzaren eta Turismoaren Sailaren 2021erako laguntza-planaren barruko bi dirulaguntza-ildo onetsi ditu gaur udal gobernuak. Oraingoan, merkataritzaren eta ostalaritzaren arloko enpresa txikien eraldaketa digitalerako eta ekonomia zirkularreko proiektuak garatzeko laguntza-ildoak aktibatu ditu. 110.000 euroko aurrekontua dute (60.000 eta 50.000 euro, hurrenez hurren). Laster argitaratuko dira oinarriak Arabako aldizkari ofizialean (ALHAO) eta Udalaren webgunean, eta orduan zabalduko da eskabideak aurkezteko epea.

Lehen laguntza-ildoa merkataritzaren eta ostalaritzaren arloko enpresa txikien eraldaketa digitalerako laguntzena da, eta 60.000 euroko aurrekontua izango du. Gasteizen kokatutako txikizkako merkataritzaren eta ostalaritzaren arloko enpresa txikientzako laguntzak dira —gehienez 50 langile izan ditzakete—, eta 2021ean enpresa horien lehiakortasuna hobetzea eta udalerriko jarduera ekonomiko sustatzea dute xede. Honako hauetarako baliatu ahal izango dira laguntzak: informatika-ekipoak, kudeaketa-tresnak eta softwarea erosteko, webguneak garatzeko edo marketin digitalaren arloko estrategiak diseinatzeko, besteak beste.

Gaur onetsitako bigarren partida Gasteizen ekonomia zirkularreko proiektuak garatzen laguntzeko programari dagokio. Laguntza berri horrek 50.000 euroko zuzkidura izango du. Laguntzak hainbat arlotako proiektuak ezartzen laguntzeko dira, hain zuzen ere, ekodiseinuaren, konponketa aurreratuaren, birmanufakturaren eta lehengai sekundarioen berreskurapenaren arloetakoak. Azken batean, ekonomia zirkularreko proiektuak ezartzen ari diren tokiko enpresentzat dira.

Maider Etxebarria lehen alkateordeak adierazi duenez, “merkataritzaren eta ostalaritzaren arloko enpresa txikien beharrei erantzun azkarrak ematen jarraitzen dugu, modernizatu daitezen eta lehiakortasuna hobe dezaten, eta gainera, pandemia garai zail honetan, babestu egiten ditugu produktuen ikerketan eta berrerabileran oinarritutako erronka ausart eta iraunkorrak, horiek baitute, zalantzarik gabe, etorkizunaren giltza. Zinegotziak gogorarazi duenez, gaur onetsitako bi laguntza hauekin udalak sei deialdi kaleratu ditu hilabete baino gutxiagoko epean. Zehazki, dagoeneko aktibatu dira ikus-entzunezko proiektuetarako, ekintzaileentzako, enpresak sortu eta sendotzeko eta ehungintzaren sektoreko saltokientzako dirulaguntzak.

 

 

 

 

 

 

 

Share

Gasteizek 9.900 eurora arteko laguntzak emango ditu langabeak kontratatzen laguntzeko

Udalak, Lanbiderekin lankidetzan, malgutu egin ditu betekizunak, enpresa gehiagotara iristeko.

 

Langabeak kontratatzen dituzten Gasteizko enpresa edo entitateek 1.500 eurotik 9.00 eurora bitarteko laguntzak eskuratu ahalko dituzte, Gasteizko Udalak eta Lanbide – Euskal Enplegu Zerbitzuak bultzatutako laguntzei esker. Dirulaguntzen ildoa enplegu-politika aktiboak bultzatzeko erakundeen arteko lankidetza-estrategiaren baitakoa da, eta Udalak aurten malgutu egin ditu betekizunak, “kontratuak bultzatzea eta kolektibo ahulenei laguntzea xede” adierazi du Enplegu zinegotzi Igor Salazarrek. Tokiko ehun ekonomikoa “aukera aprobetxatzera” animatu du zinegotziak, eta programaren hiru ezaugarri azpimarratu ditu: Atzeraeraginezko izaera du, iazko udatik egindako kontratuak onartzen ditu eta, zehazki 2020ko uztailaren 1etik aurrerakoak; aurten ez du mugarik enpresa bakoitzerako dirulaguntzen kopuruan –iaz gehienez hiru laguntza ematen ziren–; eta hiru hilabetekoa da kontratuen gutxieneko iraupena –aurreko ekitaldian sei eskatzen ziren–. Eskabideak gizarte-etxeetan, San Martineko udal bulegoetan eta on line –udalaren egoitza elektronikoaren bidez– aurkez daitezke.

Salazarrek gogora ekarri du osasun krisiak “nabarmen kaltetu dituela” lan-merkatuko baldintzak, eta hori dela eta Enplegu Zerbitzua gogor ari dela testuinguru ekonomiko berriari aurre egiten. Lehen pausu handia 2021eko aurrekontua onestea izan zen; bertan, Ekonomia Sustapenerako Sailari esleitutako zenbatekoaren erdia baino gehiago enplegura bideratzen baita. Bigarrena, Lanbiderekin lankidetzan kontratatzeko laguntzak abian jartzea izan da. Laguntzak egoera berrira egokitu dira.

Lanbideko zerrendetan izena emanda dauden langabeen kontratazioa bultzatzeko programa ekonomiko hau jarduera Gasteizen burutzen duten enpresa, autonomo eta elkarteei zuzenduta dago. Kontratuek hiru hilabete iraungo dute, gutxienez, eta % 50eko lanaldia izango, gutxienez. Diruz lagun daitekeen gehieneko epea sei hilabetekoa izango da. Laguntzaren zenbatekoa kontratu motaren eta laneratzeko zailtasunak dituzten taldeengan duten onuraren araberakoa izango da. Hasteko, dirulaguntza 1.500 eurotik 9.000 eurora bitartekoa izango da, kontuan hartuta honakoak kontratatzea baloratuko dela: iraupen luzeko langabeak, 55 urtetik gorakoak, 35 urtetik gorakoak eta diru-sarrerak bermatzeko errenta jasotzen dutenak lanaldi osoz kontratatzea. Berrikuntza gisa, zenbateko horiek % 10 handituko dira emakumeak kontratatzen badira. “Hori funtsezkoa da guretzat, izan ere krisiak eragin handiagoa izan du emakumeengan, eta aukera berriak sortuko dituzten politika publikoak behar dituzte eta” adierazi du zinegotziak. Beraz, enpresa batek gutxienez sei hilabetez lanaldi osoan lan egiteko emakume bat kontratatzen badu, gehieneko laguntza jasoko du: 9.900 euro.

Salazarrek adierazi duenez, hiriko 7000 enpresa eta entitatek ezagutzen dituzte jada laguntza hauen oinarriak Ekonomia Sustapenerako Sailaren buletinen bitartez, eta gogorarazi du Gasteizek Lanbideren 3,4 milioi erabili ahalko dituela laguntza horiek ordaintzeko; aurreko ekitaldietan baino gehiago, eta horrek “ziurgabetasun egoera batean eskabideei erantzutea bermatzen digu”. 2020ko uztailaren 1etik 2021eko apirilaren 1era bitartean egindako kontratazioak lagunduko dira, baina diruz laguntzekoa den epea ekainaren 30ean amaituko da. Aurreko planean (2019-2020), Udalak 121 kontratazio erregistratu zituen, eta 861.000 euro eman zen laguntzetan.

Share

Gasteizek ehungintzaren sektorerako 300.000 euroko laguntzak onartu ditu, eta herritarrei dei egin die tokiko merkataritzan kontsumi dezan

Udal-gobernuak ostiral honetan onartu ditu ehungintzaren sektorerako ezohiko laguntzak. 300.000 euroko kontu-saila izango dute. Lerro hori arropa-, osagarri- eta oinetako-dendetako gastu korrontea estaltzera bideratuta egongo da. Diru-laguntzak “gutxienez 600 eurokoak izango dira eta alokairuko, hipotekako edo autonomo-kuotako gastuak estaliko dituzte, besteak beste”. Hala azaldu du Gasteizko lehen alkateordeak, Maider Etxebarriak. Deialdia argitaratu ondoren sobera geratutako saldorik balego, eskatzaileen artean kontu-saila agortu arte banatzeko aukera aztertuko dute.

Programa mota hauetan ohikoa den moduan, laguntza-lerro hauen oinarriak datozen egunetan argitaratuko dira Arabako Lurralde Historikoko Aldizkari Ofizialean (ALHAO), eta bertan zehaztuko dira diru-laguntzetarako baldintzak eta epeak. Gainera, Sustapen Ekonomikoak udalaren webgunean eta Sailaren beraren buletin digitaletan sartuko ditu xehetasun guztiak. Modu jarraian Gasteizko Udalak argi berdea eman dion hirugarren laguntza da honako hau, aurreko bi Gobernu Batzarretan EAJko eta PSEko zinegotziek ikus-entzunezko sektoreari laguntzeko lerroak (100.000 euro), ekintzaileentzako bekak (84.000) eta enpresak sortzeko eta sendotzeko laguntzak (140.000) laguntzeko lerroak aktibatu ostean.

Etxebarriak gogorarazi duenez, “merkataritzak inoiz baino gehiago behar gaitu, eta babestu egin behar dugu, gurekin batera bilakatzen baita eta hiria hiri egiten du. Dendarik gabeko kalea kale tristeagoa da, itzaliagoa. Horregatik onartu ditugu ehungintzako sektorerako laguntza hauek, beste erakunde batzuetakoenekin bateragarriak izango direnak, gainera”.

 

 

 

 

 

 

 

 

 

 

 

Share

Urriaren 2an (ostirala) amaituko da epea coronavirusari aurre egiteko materiala erosteko laguntza berriak eskatzeko

  • Gelak, maskarak eta manparak erosteko deialdi honetan, Udalak malgutu egin ditu betekizunak, saltegi eta enpresa gehiagotara iristearren

Gasteizko Udaleko Ekonomia Sustapenaren Sailak urriaren 2ra arte (ostirala) izango du zabalik epea saltoki eta enpresek osasun krisialdiak sortutako gastuei aurre egiteko laguntza berriak eskatzeko. Bigarren deialdi honek 200.000 euroko aurrekontua du babes- eta higiene-materiala eskuratzeko. Programa Ekonomia Suspertzeko Planean sartuta dago, zeinak COVID-19ak tokiko sare ekonomikoan duen eragina arintzeko asmo handiko laguntzak eta ekimenak biltzen baititu.

Diruz lagundu daitezkeen gastuen artean daude maskarak, eskularruak, aurpegia babesteko pantailak, manparak, prebentzioko eta higiene sanitarioko materiala eta instalazioak desinfektatzeko materiala, hala nola gel edo xaboi desinfektatzaileak. Birusak eragindako aholkularitza- eta kontsultoria-gastuak ere finantzatzen dira, baita itxialdian eraldaketa digitalarekin lotuta egin diren inbertsioak ere. Jarduera eten zelarik, ekipoak eta makinak martxan jartzeko beharrezko gastuak ere barne hartzen ditu. Aurkezten diren proiektuek gutxienez 500 euroko inbertsioa aurreikusi beharko dute saltoki, taberna, jatetxe eta ile-apaindegien kasuan, eta 1.000koa gainerako sektoreetan.

Alkateorde eta Ekonomia Sustapenaren zinegotzi Maider Etxebarriak adierazi duenez, “laguntza hauek funtsezkoak dira hiriko sektore ekonomikoen eskari nagusietako bati erantzuten baitiote. Lehen deialdian 300 eskaeratik gora jaso ziren eta orain, elkarteen eskaria aintzat hartuta, malgutu egin ditugu betekizunak, dirulaguntzak merkatari, ostalari eta enpresari gehiagorengana irits daitezen.”

Sektorearen iradokizunek hainbat betekizun egokitzeko balio izan dute. Hala, bigarren deialdian 50 langile baino gutxiago (lehen deialdian 10 langile baino gutxiago) eta urteko negozio-bolumena 10 milioitik beherakoa duten enpresak aurkez daitezke (aurrekoan 2 milioitik beherakoa izan behar zuen). Halaber, kendu egin da negozioaren antzinatasunaren muga (lehen bi urtekoa zen).

Share

Alkatetza Sailak laguntzak emango ditu covid-19ak eragindako egoeran ehun sozial eta komunitarioa indartzeko

Banakoek, taldeek, sareek eta gizarte-eragileek proiektuak garatzeko poltsa baten oinarriak argitaratu dira gaur webgunean 

Ekimen bakoitzak gehienez 4.500 euro jaso ahalko ditu, eta bi proiektu aurkeztu ahalko dira

 

 

Alkatetza Sailak laguntzak emango ditu covid-19ak eragindako egoerari aurre egiteko hemendik urte bukaerara arte egiten diren ekimen komunitarioetarako.   Gaur argitaratu dira webgunean ehun soziala arlo komunitariotik sendotzeko proiektuetarako berariazko poltsa bat osatzeko oinarriak, zehazki, lehenagotik egoera prekarioan zeuden jendearen artean lantzekoak: ezkutuko lanean dihardutelarik egunean eguneko diru-sarrerekin bizi direnak, sexu-langileak, etxe barruko langileak, guraso bakarreko familiak, indarkeria matxistaren biktimak, dokumentuen aldetik egoera irregularrean bizi direnak, dibertsitate funtzionala duten pertsonak, buru-osasuneko arazoak dituztenak, bizitegi-bazterketako egoeran daudenak… Udalak 90.000 euro erreserbatuko ditu proiektu poltsa horretarako, berdintasunarekin, gazteriarekin eta aniztasunezko bizikidetzarekin lotutako ekimenak indartzearren.

“Alarma-egoerak agerian utzi du zerbitzu asko feminizatu eta prekarizatuta daudela, hain zuzen ere ezinbesteko gertatu diren zerbitzuak: osasun alorrekoak, gizarte-zerbitzuak, supermekatuetako kobratzaile eta apal-hornitzaileak, garbitzaileak, zaintzaileak, etxez etxeko banatzaileak eta beste. Arreta egin behar genieke indarkeria matxistari; familiako indarkeria, isolamendu eta bakartasunari; ahultasun-egoeran egonik konfinamendurako gutxieneko baldintzak betetzen ez dituzten etxebizitzetan bizi diren pertsonen egoerari; alegia, lehenik ere hortxe zeuden eta alarma-egoerak okerragotu dituen egoerei egin behar zaie arreta, eta sistema osagarriak asmatu ahulezia-egoera eta indarkeria atzemateko, kasu horiek bideratu eta arreta eskaintzeko. “Orain Gasteiz” planaren ildotik, ez dugu nahi inor atzean gera dadin, eta publikoaren eta komunitarioaren arteko ekimen multzo bat proposatzen dugu”, nabarmendu du Berdintasunaren, Gazteriaren eta Bizikidetza eta Aniztasunaren zinegotzi Miren Fernández de Landak.

Deialdira aurkeztu ahalko dira helbidea Gasteizko udalerrian duten banakoak, taldeak, sareak eta gizarte entitateak, baldin eta haien edukiak une honetan Alkatetzaren eta Erakunde Harremanen Sailaren menpeko Berdintasun Zerbitzuan, Bizikidetza eta Aniztasun Zerbitzuan eta Gazteria Zerbitzuan indarrean dauden lan-ildoei erantzuten badiete.

Proiektu poltsa 2020ko ekitaldia amaitu arte egongo da indarrean, eta horren kargura finantzatu gabe geratzen diren proiektuak etorkizunerako kontuan har litezke.

Proiektu bakoitzean, hura garatzeko formaturik egokiena aurkeztu behar da, betiere lortu nahi diren helburuak eta xede taldea aintzat hartuta. Horretarako estrategia ezberdinak erabili ahalko dira: sareak osatzea, informazio-kanpainak, trukeak, bisitak, ikuskizunak, topaketak edo lantegiak. Metodologia aktibo, inklusibo eta parte-hartzaile baten arabera garatu beharko dira proiektu guztiak, hartzaileen erritmo, lan-prozesu eta ezaugarriak aintzat hartuta,

Nolanahi ere, indarreko araudiak edukiera mugatzeari, espazioak konpartitzeari, segurtasun-tarteei eta abarrei buruz ezartzen duena errespetatu behar da beti.  Proposamenek kontuan hartu beharko dituzte beste metodologia aukera batzuk, baldin eta  proiektua garatu bitartean covid-19ak berriro ere goraka egiten badu.

Proiektuak aurkezteko epea 2020ko ekainaren 17an hasiko da, eta 30ean amaituko, biak barne. Dokumentazioa bi modutan aurkeztu ahalko da: egoitza elektronikoan edo herritarrei laguntzeko bulegoetan, euskarri digitalean.

Dirulaguntzaren gehieneko zenbatekoa, proiektuko, 4.500 euro izango da, BEZa barne. Bi proiektu aurkeztu ahalko dira gehienez.

“Pandemiari eusteko neurriek eta krisialdiak oso ondorio desberdinak izan dituzte, baina ondorio gogorragoak jasan dituzte lehenik ere behin-behinekotasun egoeran zeuden kolektiboek, jarduera-tasa txikiagoak eta aldibatekotasun-tasa, azpienplegu eta soldata-arrakala handiagoak dituztenek. Gazteen kolektiboa da kaltetuenetako bat, ez hainbeste osasun-egoeraren ondorioz, baizik eta horrek eragin duen krisi ekonomikoagatik; aldi berean, proposamen solidarioak egiterakoan kolektibo aktiboenetako bat da, edonolako plataforma, mugimendu, sare eta lankidetzak sortzen baitituzte“, azaldu du Miren Fernández de Landak.

 

Share

Gasteizek 750.000 euroko laguntzak onetsi ditu merkatari, ostalari eta enpresa txikientzat

  • Maskara, gel eta desinfektatzaileen gastuetarako dirulaguntzak emango dira, baita covid-19aren prebentziorako beste gastu batzuetarako ere

Ekonomia Sustapenaren, Enpleguaren, Merkataritzaren eta Turismoaren Sailak eskaturik —Maider Etxebarria zinegotziak gidatzen du hori—, Tokiko Gobernu Batzarrak 750.000 euroko partida bat onetsi du gaur, Gasteizko merkataritza eta ostalaritza establezimenduei eta mikroenpresei covid-19aren krisiak eragindako gastuak ordaintzen laguntzeko.

Laguntza horiek Gasteizko Ekonomia Suspertzeko Planaren bost ardatzetako lehenean jasotzen dira, eta hiriko sektore ekonomikoen eskaera nagusietako bati erantzuten diote. Diruz lagundu daitezkeen gastuen artean daude maskarak, eskularruak, aurpegia babesteko pantailak, manparak, prebentzioko eta higiene sanitarioko materiala eta instalazioak desinfektatzeko materiala, hala nola gel edo xaboi desinfektatzaileak.

Birusak eragindako aholkularitza- eta kontsultoria-gastuak ere finantzatuko dira, baita itxialdian egindako eraldaketa digitalarekin lotutako inbertsioak ere. Zehazki, hamar langile baino gutxiago dituzten hiriko enpresa txikientzat izango dira laguntzak.

Gure hitza betetzen ari gara. Gasteizko saltokiek, ostalaritzako establezimenduek eta enpresa txikiek gure sostengua izango dute susperraldian. Ez dugu nahi inor atzean geratzea higiene eta segurtasun aginduak betetzeagatik“, adierazi du Ekonomia Sustapenaren, Enpleguaren, Merkataritzaren eta Turismoaren arduradun Maider Etxeberriak.

Deialdia Arabako Lurralde Historikoaren Aldizkari Ofizialean argitaratzen den egunaren biharamunetik hasita aurkeztu ahalko dira eskabideak.

 

Share