Prentsa oharrak

– Gaur da izena emateko azken eguna, eta  landatzen diren zuhaitz horiek zenbatuta hilabete honetan Eraztun Berdean18.500 landutuko dira guztira

Dagoeneko Gasteizko 900 herritarrek eman dute izena ‘Etorkizunaren sustraiak: 250.000 zuhaitz + herritar Eraztun Berdea lotzeko’ programarekin bat egin eta ‘Herritarren Basoan’ zuhaitz bat landatuz 2012ko Europako Hiriburu Berdean beren aztarna uzteko.  

Izena eman dutenei hainbat ordu proposatu dizkie antolakuntzak, 11:00etatik 14:00etara, laguntzaileek taldeei arreta eman eta landatzeko prozedura azaltzeko egokiera izan dezaten. Gainera, dei berezia  egin da parte-hartzaileek garraio publikoa –5. linea– erabil dezaten, eta hartara jardunaldiaren iraunkortasun espiritua zain dezaten.

Kabazarra inguruan, Viena kalearen bukaeran, Salburuko zelaiez haratago –Errekaleor errekaren gaineko zubia igarota– 2.000 zuhaitz eta zuhaixka landatuko dira. Gasteizko azpiegitura berdea garatzen laguntzeaz gain, udalerriko baso autoktonoak ezagutarazten eta herritarrei haien zaintza zein berreskuratzean parte har dezaketela jakinarazten lagunduko du ekintzak. Bestetik, zuhaitzek, Lurreko bizitzarako funtsezko elementu diren aldetik, nolako garrantzia duten ohartaraztea da ekimen horren helburua, eta zuhaitzak lagun bizidunak direla erakustea; zaindu beharrekoak, begirunea eskatzen dutenak.

“Gaur Salburuan egindako landaketa gure ikur naturalari, Eraztun Berdeari, eragiten dion proiektu estrategikoaren jarraipena da. Horretaz landa, herritarrek iraunkortasunaren kontzeptua sustatu eta zabaltzeko hartu duten konpromisoaren adierazgarria da, Eraztun Berdeko parkeen arteko lotura ekologikoa hobetzeko proiektuaren barruko ekintza hau Salburuko parkea Errekaleor ibaiarekin lotzeko estrategikoa den leku batean egin baita”, nabarmendu du Ingurumen zinegotzi Idoia Garmendiak.

Izan ere, Udalak funtsezkotzat jotzen du herritarren parte-hartzea sustatzea, eta enpresa eta babesleen partaidetza ere aztertzen ari da.  ‘Etorkizunaren sustraiak’ proiektua abiarazi denetik, dagoeneko 16.500 zuhaitz eta zuhaixka landatu dituzte zenbait enpresak. Asteburu honetan, berriz, gasteiztarrak izango dira benetako protagonistak, haiek gozatzen baitute egunero Eraztun Berdeaz. Zuhaitz bat landatu eta hazten ikustea norberaren hazkundearen isla da, eta inguruarekiko errespetua sustatzen eta ingurumen balioak zabaltzen laguntzen du. Ildo horretatik, herritarrei oro har –eta zenbait erakunde, elkarte  eta taldeei– zuzendutako landaketak antolatzen ari dira, hainbat helbururekin: baso-berritzeak, landare lehorrak ordeztea, paisaia lehengoratzea eta birlandatzea. Hartara, gune bakoitzak bere identitateari eutsi eta hiriaren inguruko Eraztun Berdean integratuko da aldi berean. Eraztuna funtzio askotariko azpiegitura berdea izatea da asmoa, beste alor askotan (ingurumen osasuna, ekonomia, gizartea, klima aldaketaren aurkako borrokan) onuragarria izateaz gain.

Olentzero eta Errege Magoen harrera ekitaldietan bidezko merkataritzako gozokiak banatuko zaizkie umeei

Florida parkeko jaiotza monumentala irekitzean abiaraziko da Eguberrietako programazioa, zeinean bereziki familiei zuzendutako jarduera ugari antolatu baita. Ekitaldi nagusietako bat, Ekialdeko Gorentasunek haurrei egiten dieten agurra, udaletxeko balkoi nagusitik egingo da, iaz arrakasta handia lortu baitzuen.

Gabonak, berez, tradizio eta ohitura garaia dira. Olentzeroren etorrerarekin hasita Errege Magoen Desfilera arte, betiko ekitaldiak datoz bata bestearen atzetik, aldatu beharrik ez dutenak.

Hala ere, “Kultur Plangintzaren eta Jaien Zerbitzuak berritasunak sartu ohi ditu Eguberrietako ekitaldietan, era guztietako publikoaren nahiak eta herritarren eskaerak betetzearren”, iragarri du Kultur Plangintzaren eta Jaien kontseilari Encina Serranok.

Florida parkeko jaiotza

Benetako neurrian egindako 200 irudik baino gehiagok osatzen dute jaiotza monumental hori; 1962az geroztik jartzen da Florida parkean. Abenduaren 5ean irekiko da, urtarrilaren 6ra arte. Aurreko urteetan jasotako diruarekin zenbait egitura konpondu eta irudi berria egin da, urketaria, eskaiolaz egindako irudien ordez beira-zuntzezkoak jartzeko ildoari jarraituz. Javier San Miguelen lana da. Aurten jaiotzaren 50. urteurrena betetzen da.

Kale girotzea

Arabatxo Haur Abesbatzen Arabako Elkarteak Gabonetako kontzertu berezia emango du abenduaren 22an, 12:00etan, Foru plazan, garai honetan hain gustagarriak diren kantuak –are gehiago umeek abesturik– eskaintzeko.

Halaber, erdiguneko kaleak eta plazak girotzeko, 8 fanfare oinezkoen alderdian ibiliko dira, abenduaren 21etik urtarrilaren 4ra arte.

Olentzeroren eguna. 2012ko abenduaren 24a.

Abenduaren 24an Olentzero etorriko da gure hirira, ume guztien artean opariak banatzera.

• Olentzerori gutunak bidaltzeko gutun-ontzia abenduaren 10etik 23ra jarriko da, biak barne, Goiuri jauregian. Ordutegia: astelehenetik ostiralera, 10:00 – 21:00; larunbat eta igandeetan: 11:00 – 14:00 eta 16:00 – 21:00. Olentzero baserriko sutondoan eserita irudikatuko da, ohiko osagaiak inguruan dituela.
• Abenduaren 24an, bi galtzagorri lagun dituela, Olentzerok berak hartuko ditu umeak, udaletxean (Espainia plazan), 11:00etatik 14:00etara. Azken urteetan eskaera handituz joan denez, aurten ere goizez egingo da, ume gehiago hartzerik izan dezan. Folklore Akademiako trikitixen musikak alaituko du ekitaldia une oro. Bidezko merkataritzako gozokiak banatuko dira, Setem, Medicus Mundi eta Intermon Oxfam elkarteen laguntzarekin. 
• Ohi bezala, Olentzeroren desfilea Iparralde gizarte etxetik aterako da, 18:00etan, eta ibilbide hau egingo du:

Iparralde gizarte etxea, Legutianoko atea, Frantzia kalea, Bake kalea, Olagibel kalea, Espainia plaza.

Desfilean parte-hartzaile gehiago sartu dira, bai eta Olentzerorekin zerikusia duten osagai gehiago ere. Erraldoien konpartsak hartuko du parte halaber, baserritarrek zein buruhandiek lagunduta. Gargantua ere joango da desfilean, eta 10 galtzagorriren taldea, zeinak Olentzerori lagunduko baitio Gasteizko ume guztiei opariak banatzen. Guztira 375 pertsonak hartuko du parte desfilean:

Judimendiko Joaldunek irekiko dute desfilea, eta horien atzetik, esnezaleak, ikazkinak, astazainak, itzainak, egurketariak, artzainak, dantzariak… Desfilearen bukaeran, Euskal Herriko basoen kutsua duten bi karroza joango dira.

• 19:00ak aldera, Olentzerok agurra egingo du, udaletxeko balkoi nagusitik, eta bere kanta abestuko du gasteiztar guztiekin batera. Udaleko Folklore Akademiako txalapartari eta albokariek girotuko dute itxaronaldia.

Parte-hartzaileak: Udal Folklore Akademia, Arabako Dantzen Federazioa, Olabide Ikastola, Indarra.

Laguntzailea: Agrolasa

Gasteizko Haur Ikuskizunen IX. Erakustaldia

Abenduaren 26tik urtarrilaren 2ra arte, milaka haur hurbilduko dira Mendizorrotzeko kiroldegira, beren pertsonaia gustukoenak ikustera. Kalitate handiagoko ikuskizunak eta denboraldian haurrentzat estreinatu diren lan onenak eskaintzea izan da azken urteetako asmoa. Ildo horri jarraituz, aurten 4 ikuskizun antolatu dira, eta guztira 6 emanaldi:

PARCHÍS

Abenduak 26, asteazkena. 19:00

Gaztelaniaz

Iraupena: 80’

Adin egokia: 4 urtetik aurrera.

Ni fitxa gorria naiz; ni, fitxa urdina… Kantu horiek gure herrialdean arrakasta lortu zuten, eta 25 urteren ondoren, Parchís umeentzako talde mitikoa berriro itzuliko da, haurrak eta nagusiak dibertitzera, kide berriekin, noski. Betiko kantuak oraingo neska-mutilentzat.

MAGICAL 2

Abenduak 28, ostirala

Bi emanaldi: 16:30 / 19:30

Gaztelaniaz

Iraupena: 90´

Adin egokia: 7 urtetik aurrera.

Sirenatxoa, Peter Pan, Wendy, Aladino eta Jazmine, Lanparako Jeinua, Mary Poppins eta Tximinia Garbitzailea, Edurne Zuri eta Printzea, Merlin aztia, Pocahontas eta ipuinetako beste pertsonaia asko, magiaz betetako ikuskizun batean. 14 artista agertokian, zuzeneko musikal bizi eta alai batean, familia osoak irribarre egin dezan.

KUKUBILTXO: “TXIRRIKIZ”

Abenduak 30, igandea. 19:00

Euskaraz

Iraupena: 60’

Adin egokia: 3 urtetik aurrera.

Txirrikiz etorkin gaztea ume batzuengana hurbildu da, jolasteko asmoz. Haietako batek, Pelik, baztertu egiten du eta Tirrikizek, adiskide egin nahian, lanpara miragarri bat eskaintzen dio. Peli lanparaz jabetzen da, baina bereari eusten dio, eta argiaren botereek Fantasiaraino eramango dute. Tamaina handiko txotxongiloak eta animazioa baliatzen ditu familia osoarentzako ikuskizun honek.

POXPOLO TA KONPAINIA

Amets ederra

Urtarrilak 2, asteazkena

Bi emanaldi: 16:30 / 19:30

Euskaraz

Iraupena: 70’

Adin egokia: 2 urtetik aurrera.

Poxpolo ta Konpainia pailazoak ikuskizun berriarekin itzuliko dira, berariaz Gabonetarako prestatua; ikuskizun harrigarria da, ume, gazte, heldu zein adinekoentzat.

Magia, kolorea, umorea, “eguberri zuriak”, gabon kantak, adiskidetasuna eta elkartasunezko jolasak. Baina, batez ere, irribarreak eta barreak nagusi.

• SARRERA SALMENTA

Iazko prezioei eutsi diegu:

Banakako sarrera: 4 €

Deskontua (ikuskizun eta emanaldi bererako 4 sarrera): 12 €

Aldez aurreko salmenta abenduaren 10ean hasiko da, hiru modutan:

Internetez: www.elcorteingles.es

Telefonoz: 902 400 222

Aurrez aurre: Gasteizko El Corte Inglés saltokia (10:00etatik 22:00etara, astelehenetik larunbatera).

Errege Magoak

Berriro ere Errege Magoak etorrera izango da Eguberrietako egitarauari urrezko amaiera jarriko dion ekitaldia, jendetsuena eta ikusmin handiena pizten duena baita.

Goizeko 11:00etan iritsiko dira Meltxor, Gaspar eta Baltasar tren geltokira.

• Iaz bezala, Ekialdeko Gorentasunak antzinako autoetan egingo dute Geltoki plazatik Espainia plazarainoko bidea, errege-postariak, fanfarre batek, opariz beteriko traktore batek eta Bambolea antzerki taldeak lagunduta. Behin Espainia plazara iritsita, Erregeek hiriko haurrak agurtuko dituzte udaletxeko balkoi nagusitik, 11:20an gutxi gorabehera.
• 12:15etik 18:00etara Errege Magoek harrera egingo diete haurrei Goiuri jauregian, Frai Zacarias Martinez kaleko sarreran. Harrera-ekitaldi horretan ere bidezko merkataritzako gozokiak banatuko dira.
• Eta 19:00etan hasiko da ekitaldi miragarriena, denek irrikaz espero dutena: Errege Magoen desfilea.

Azkenaldian ohiko bihurtu den ibilbidea egingo du desfileak:

Bilbo plaza, Frantzia kalea, Bake kalea, Ramon Ortiz de Zarate kalea, Florida kalea, Ramon y Cajal kalea, Micaela Portilla kalea, Laskarai kalea eta Gasteiz hiribidea. DESFILEAREN AMAIERA: GASTEIZ HIRIBIDEAREN ETA TXILE KALEAREN ARTEKO BIDEGURUTZEA (gogoan hartu behar  da datu hori, desfilea Europa jauregira iristean desegiten baita).

Sei karrozaz osaturik (hiru lehenak fantasiazkoak, horien ostean Errege Magoen hirurak), ikuskizun handia izango da beste behin ere desfilea. 2013ko desfilean antzerki talde hauek hartuko dute parte:

-Madrilgo Bambolea antzerki taldea, 20 pertsonaiaz osatutako “Atlantes” zirku ikuskizunarekin: akrobatak, bihurrikariak, clownak, orekariak, monozikloak, hankaluzeak, malabaristak, dantzariak…

–Planete Vapeur talde frantziarra,  formatu handiko “Parada Aquatica” ikuskizun txundigarriarekin: marmokak, arrain erraldoiak eta ustekabe handia bukatzeko.

– Les Lutins Refractaires talde frantziarra, “La Cour des Fées” ikuskizunarekin: txikienak liluratuko ditu, bai eta helduak ere, jantzi zuri argiztatuez.

-Azkenik, Abanderados de Cori talde italiarrak fantasiari eta Erregeei eskainitako bi zatiak lotuko ditu.

Guztira 360 pertsonak hartuko dute parte desfilean.

Parte-hartzaileak: Elkarte Afroamerikarra, Arabako Galiziar Etxea, Abetxukuko Inauterietako Konpartsaren Elkartea, La Esperanza eskaut taldea eta Serezade.

Laguntzaileak: Bi Ondo Motor eta ADIF

– Javier Maroto alkateak Nantesko udal agintari Patrick Rimberti emango dio “Liburu Berdea”, Frantziako hiri hori European Green Capital 2013 izendatzeko ekitaldian.

– Gasteizek urte bukaerara arte jarraituko du sari berdea izaten

Gasteizek, 2012ko Europako Hiriburu Berdeak, gaur arratsaldean eskualdatuko dio Green Capitalen lekukoa Nantesi, Europar Batasuneko Ingurumen komisario Janez Potocknik buru izango duen ekitaldian, Bruselan. Ekitaldia Vaudeville antzokian egingo da, Erreginaren Galeria deritzon Brusela erdiguneko alderdian –Europar Batzordeak urtez urte garrantzi handiagoa eman nahi baitio iraunkortasunaren sari horri–. Hasteko, 15:00etan, ‘Herritarren mobilizazioa ingurumenaren alde’ izeneko mahai ingurua egingo  da, zeina BBCk Parisen duen esatari Hugo Schofieldek moderatuko baitu. Europako hiriek aurre egin beharreko erronka nagusiak aztertuko dituzte, bai eta hainbat arlotan (klima aldaketa, hondakinen kudeaketa edo mugikortasun iraunkorra) gainerako hiriei eman diezaieketen eredua ere.

Ingurumen komisario Janez Potocnikez gain, Nantes Métropoleko lehendakariorde  Fabrice Rousselek  eta Gasteizko alkate Javier Marotok hartuko dute parte. Ondoren, Nantes Métropoleko Klima eta Energiarako lehendakariorde Pascale Chironek eztabaida bat moderatuko du, antzokian bildutakoek –Europako Hiriburu Berde izendapena jaso duten beste hirietatik (Stockholm, Hanburgo, Kopenhage) zein 2015erako hautagai diren hirietatik (Brusela eta Dublin) etorriak– hizlariekin mintzatzeko aukera izan dezaten.

Geroago, 16:30ean, Ingurumen Zuzendaritza Orokorreko Komunikazio zuzendari Astrid Ladefogedek Gasteiz eta Nantesen arteko aginte eskualdaketaren ekitaldi ofiziala gidatuko du. Hasteko, Ingurumen komisario  Janez Potocnikek hitz egingo du.   Gasteizek sari berdea kudeatzen egindako zeregin handia goraipatuko du, euskal hiriburuari esker europar sari berdeak zabalkundea eta aitortza  baititu mundu mailako ingurumen foroetan. Ondoren, Arabako hiriburuko alkatea mintzatuko da; Batzordeari Gasteizengan jarritako konfiantza eskertu eta aurten lortutakoak ezagutaraziko ditu. Azkenik, Nantes Métropoleko lehendakari Gilles Retièrek eta Nantesko alkate Patrick Rimbertek hartuko dute hitza, Frantziako hiriaren green balioak  nabarmenarazteko. Ekitaldia bukatzeko, Nantesi Liburu Berdea emango diote, zeinak gaurtik aurrera hiriari bi orri eskainiko baitizkio.

Lau karpa handitan jarritako 42 saltokiei zein hiriko 79 taberna eta 30 jatetxeri esker Gasteiz turismo enologikoaren erreferente bihurtuko da.

33 upategik -Arabako Errioxako 29 eta Aiarako txakolineko 4- hartuko  dute parte Ferian.

“Gobernu honek beti izan du argi jai hori berreskuratu behar genuela, ekitaldi garrantzitsua baita hiria, hiriko merkataritza eta ostalaritza dinamizatu eta turismoa erakartzeko”, nabarmendu du Ekonomia Sustapenerako zinegotzi Miguel Garnicak.

Lau urteko absentziaren ondoren itzuliko da Gasteizen egin ohi zen Ardoaraba ardo feria ezaguna, urteko zubi garrantzitsuenetako batean, abenduaren 6tik 9ra artekoan. Orain arte feriaren sei edizio egin dira, beti arrakasta handiarekin, 100.000 bisitari izan baitu horietako bakoitzean. Arrakasta horren erakusgarri da 2007ko azken edizioan egindako galdeketaren emaitza, bisitarien % 91k uste baitzuen Ardoaraba feria positiboa edo oso positiboa dela Gasteizentzat, eta % 96k ontzat jotzen baitzuen karpen kokalekua eta prestaketa, bai eta bezeroei emandako arreta ere.

Azken edizioan 104.000 bisita zenbatu ziren, horietako % 25 gasteiztarrak. Turismo enogastronomikoaren alorrak hazteko itxaropen handiak ditu une honetan. “inguruko hirien artetik Gasteiz bereizteko elementu gakoa da, eta merkataritzaren eta ostalaritzaren arteko sinergiak sortzen laguntzen du, bai eta sektore horien eta Arabako eskualdeetako kalitateko ardoen eta bestelako produktuen ekoizleen artean ere”, adierazi du Miguel Garnicak. “Ardoarabari esker Gasteiz ardoaren Euskadiko hiriburua bihurtuko da, eta erreferentea nazioartean”, esan du zinegotziak bukatzeko.

Itzuleran, Ardoarabak eite enogastronomikoa hartuko du, eta horrek helburuak lortzen areagolagunduko du. Gainera, merkatari, ostalari, upategi eta nekazari eta abeltzainen elkarteen  arteko adostasun eta lankidetza giroan itzuliko da, bai eta erakundeen aldetik ere, jakina. Berritasun handienak hauek dira: taberna eta jatetxeen esku hartzea, “Euskadi Gastronomika” biltzarra, kalitate handiko euskal produktuen “Goxo-Goxo” azoka, ibilbide enogastronomikoak, haurrentzako lantegiak (“La Navidad Cruje a 220º” izenekoa, esaterako) eta beste.

Gasteiztarrek eta bisitariek 42 saltoki bisitatu ahalko dituzte, lau karpa handitan banatuta: 33 upategi ( Arabako Errioxako 29 eta txakolineko 4), 4 jatorri izendapen gonbidatu, eta pintxoak eskaintzen dituzten 5 gune; bestetik, hiriko 79 ostalaritza establezimenduk, 30 jatetxek eta 20 gourmet dendak hartuko dute parte.

Herritarren Segurtasuneko zinegotzi Marian Castellanos zinegotziak esan duenez, “kontuan hartu behar da elurra fenomeno naturala dela, eta herritarrok horrekin bizitzen ikasi behar dugu”.

Aurten, lehenengoz, elurra bota dezake Gasteizen egun hauetan, horregatik eta horrek eragiten duen enbarazua ahalik eta txikiena izan dadin, Udala prestatzen hasi da.  Zailtasunak egongo direla jakitun izanik, Herritarren Segurtasunaren Sailak honako helburu nagusiak ezarri ditu: hiria geldi ez dadin saiatzea, joan-etorrietako atzerapenak ahalik eta txikienak izan daitezen, premiazko egoerei erantzuna ematea eta gertatzen direnen berri herritarrei ematea, hori guztia behar dena baino gehiago gastatu gabe. “Hiriburu berde izateko arrazoietako bat ingurumenarekin dugun bizikidetza eredugarria da; elurrarekin ere gauza bera egiten saiatu behar gara”, gogoratu du Marian Castellanosek.

Elurra bota baino lehenagoko jardunak dira azpimarragarriak, prebentziozko jarduna sartu baita planean, hain zuzen, ibilbideetan gatza era programatuan botatzearekin zerikusia duena. Horren baitan, trafikoak gainditu beharreko desnibel zailenak aintzat hartu dira, eta planean “maldak eta aldapak” izeneko jarduna jaso da. Elurra bota baino lehen jardutean koste eta ingurumenarekiko inpaktua txikiagoa lortzen da, 40 gr/m²-ko bota beharrean 5 gr/m²-ko botako baitira.

garbitzeko oinarrizko lanak egitearekin bat galtzadetan, espaloi nagusietan eta garraio publikora iristeko guneetan esku hartuko da. Gainera, Udalak herritarrei, enpresei eta merkatariei laguntza eskatzen die haien inguruko eremuak eta esparruak garbitzeko. Eta horretarako hainbat aholku ematen dizkie, besteak beste, elurra gogortu baino lehen garbitzekoa, baita gatza neurriz erabiltzekoa ere, ez baita ona ingurumen, azpiegitura eta ibilgailuentzat, eta bukatzeko, azetatoak eta urea erabiltzeko alternatiba gisa.

Auzokideen lana errazteko 28 gatz-zaku jarriko dira, 1.200 kilokoa bakoitza, hiriko hainbat tokitan (iaz baino 11 gehiagotan, ikus mapa) eta 375 pala banatuko dira gizarte etxeetan eta auzo elkarteetan. Horrez gain, beste 125 pala egongo dira herritarren eskuetara. Elurtearen aurrekoen eta ondorengoen berri emango da honako helbidea duen blogean: https://blogs.vitoria-gasteiz.org/plannevadas/ (gaztelera hutsean dago).

Auzo berriei egin diegu arreta gehien; izan ere, horietan gero eta herritar gehiago bizi da, eta lanabesen beharra izango dute laguntzeko.

Guztira, 6.000 litro gatzun eta 50 tona gatz dauzka prest Udalak. Suhiltzaileek elurra kentzeko 2 hortz, gatz banagailu eta gatzun banagailu bana ditu; aurten ibilgailu berri bat ere bai, ikastetxe eta ospitaletako sarreretan aritzeko. FCCk bere ibilgailuak erabiliko ditu, eta hainbat kanpo-enpresen laguntza ere izango, behar den unetarako.

Garrantzitsua da oso guztion laguntza; gomendio jakin batzuk jarraituz gero, elurrarekin bizitzea asko errazten da, eta elurteak enbarazu handiegirik sortu gabe pasako dira. Elurteetan komeni da:

–         Joka ezazu zuhurtziaz, eta atera zaitez lehenago etxetik, elurrarekin joan-etorriek gehiago irauten dutelako.

–         Egiozu betiere arreta egin Euskalmetek (Euskal Meteorologia Agentzia, www.euskalmet.net) irratiaren, telebistaren edo sare sozialen bitartez eguraldiaren eta errepideen egoerari buruz ematen duen informazioari.

–         Oso garrantzitsua da ehun lodiko jantzi bakar baino hainbat jantzi arin janztea, bata bestearen gaintik, eta, batez ere, elur gainean ibiltzeko oinetako egokiak.

–         Ahal den neurrian, saihestu egin behar da adineko pertsonak eta haur txikiak kalera ateratzea, galtzada arriskutsua daitekeelako beraientzat, batez ere elurrarekin batera haizea baldin badabil.

–         Ez da norberaren ibilgailua erabili behar, ez bada guztiz derrigorrezkoa. Askoz hobea da garraio publikoa erabiltzea. Geltokira joan aurretik, har ezazu kontuan elurrak moteldu egiten duela trafikoa, eta beraz, baita garraio publikoaren maiztasuna ere; beraz, etxetik ohi baino denbora gehiagoz irtetea gomendatzen dizugu.

• Nahitaez zure ibilgailu partikularra erabili behar baduzu: Bila ezazu aldian aldiko eguraldiari eta errepideen egoerari buruzko informazioa.
• Erabili itzazu neguko pneumatikoak edo, horren ezean, kateak.
• Erabili itzazu errepide nagusienak; bazter itzazu bigarren mailakoak, batez ere gauez.
• Joan zaitez eskuineko erreitik, ohi baino mantsoago, eta ez ezazu norabide aldaketa bortitzik egin, ezta beharrik gabe beste ibilgailuren bat aurreratu ere.
• Ez ezazu lanean dagoen elurra kentzeko makinak aurreratu.

Bizikletan ibiltzen bazara, erabili ezazu kontu handiz, eta ez ezazu bortizki frenatu, ez eta norabide aldaketa bortitzik egin ere.

Bestalde, joan den azaroaren 19an Udalak abian jarri zuen Neguan ostatu emateko baliabideari (DAI gaztelerazko siglak: Dispositivo de Atención Invernal), zeinaren asmoa etxebizitzarik izan ez eta kalean lo egiten duten pertsonei urteko egun hotz eta gogorrenetan Udalak ostatua emateko dituen lekuetan sartzeko aukera ematea den.

DAI baliabidearen erabiltzaileak Udalaren ostatu emateko hiru baliabidetara zuzentzen dira, Aterpera, Etxe Irekira eta Harrera Sozialerako Udal Zentrora. Guztira 131 leku eskaintzen dira:

• ATERPEn: 22 logeletan, eta 10 egongelan.
• ETXE IREKIAn: 12 Etxe Irekian, 4 eranskinean, eta 6 leku gehigarri propio negurako.
• HARRERA SOZIALERAKO UDAL ZENTROAn: 67 leku. Neguan ostatu emateko baliabideak (DAI) iraun bitartean, gela bat atontzen da beheko solairuan, gehienez ere 10 pertsona hartzeko.

Kalean egonik aterpean lo egin nahi duen orok udalaren arreta eta ostatu zerbitzuetara jo dezake bere kabuz lehen gauean. Hurrengoetan, udalaren gizarte zerbitzuek emandako “DAI txartela” beharko du.  Udalak Neguan ostatu emateko baliabidea martxoaren 31ra arte iraunaraztea aurreikusten du ; alabaina, eguraldi txarrak jarraitu egingo balu, luzatu egingo litzateke aldi hori.

Elurra dagoen bitartean gizarte sareen bidez jasoko dute unean uneko informazioa herritarrek, hain zuzen, “Elurra Vitoria-Gasteizen / Nieve en Vitoria-Gasteiz” izeneko Facebookeko orrian eta “VG_elurranieve” profileko Twitterren.

Horrez gain, Udalak aurrerapen teknologiko bat jarri du bere web-orrian gasteiztar guztien eskura: trafiko kamerak, Trafikoa, minutuz minutu atalean ikusgai.

– Europako Hiriburu Berdeko alkateak gaur inauguratuko du Gasteizko  erakustokia, 40 m² -koa eta birziklatutako materialez egina dena

– Aste honetan Gasteizek 13 ekitalditan hartuko du parte IFEMA ferialekuan egiten ari den CONAMA ekitaldian, Ingurumenaren alorrean estatuan antolatzen den ekitaldi nagusienean , hain zuzen ere

European Green Capitalak parte hartze berezia izango du hamaikagarren CONAMAko programan. “Reinventémonos” izena jarri diote programari eta aste guztian zehar egingo da IFEMA ferialekuan, Madrileko Campo de las Naciones esparruan. Aurten Gasteizek protagonismo handiagoa du bi urtetik behin egiten den ekitaldi honetan, izan ere, Gasteiz ingurumenaren alorreko hiri eredugarria baita Europan.

Hori dela eta, Gasteizko alkate Javier Marotok CONAMA Iraunkortasunaren aldeko Herri eta Hirien VI. Toki Topaketaren inaugurazioan parte hartu du gaur goizean, 9:30etik aurrera, IFEMAren konbentziotarako zentroko Madril aretoan.

Bertan izan dira Espainiako Udalerri eta Probintzien Federazioko Idazkari Nagusi Angel Fernandez, Bartzelonako diputazioko hirugarren lehendakariorde Joseph Llobet eta Conama Fundazioko lehendakari Gonzalo Echagüe ere. Eguneko lehen ekitaldian, iraunkortasun arloko irizpideen arloko hiri eredugarri gisa azaldu da Gasteiz, eta ekitaldiaren amaieran bat egin dute ideia honekin: “sistema iraunkorraren ikuspuntutik lan egiten duten hiriak krisi ekonomikoa gainditzen lehenak izango dira”.

Ondoren gaur eguneko gai baten inguruko eztabaida izan da: ”Liderazgo de las ciudades a nivel global y en el trabajo en red’. Javier Maroto alkatea, 10:45ean hasita, hiriak garapen iraunkorrean aurrera egiteko konbentzimendua islatzeko eragile nagusiak direla azaltzen ari da. Eztabaida honetan honakoek ere hartzen dute parte: Miguel Angel Cámara, Espainiako  Udalerri eta Probintzien Federazioko  gobernu batzarreko kide eta Murtziako alkatea; Antonio Costa Lisboako Udal Ganberako lehendakaria; Mercé Rius, Bartzelonako Ingurumeneko diputatua; Oded Grajew, Red Nossa Sao Pauloko lehendakaria eta Brasilgo Hiri Iraunkorren Programakoa; Mercedes de la Merdec, Hiriburu Iberoamerikarren Batasuneko idazkari nagusia (UCCI) eta Carlos Martí, “Ciudades Sostenibles” aldizkarikoa.

13:00etan, Gasteizko Hiriburu Berdeak Ingurumenaren arloko Conama nazioarteko foro honetan jarritako erakustokia inauguratuko da; birziklatutako materialez egina dago eta bigarren erabilera bat emango zaio hondakinak gutxitzeko. Gasteizko alkatea izango da ekitaldiko buru eta hirian ingurumenarekin lotutako proiektu nagusiak garatzen ari diren udal teknikariak izango ditu lagun.

Informaziorako  gune honetan Gasteizko azpiegitura berdearen proiektua ikus daiteke 10. pabilioian (12. erakustokia).

Honela beraz, udalerriko azpiegitura berdearen sistemaren garrantzia ezagutaraziko da, baita sistemaren osagaiak, elementuak, funtzioak, zerbitzuak eta ematen dituen onurak ere.

Horretaz gain, hobetzeko ekimenak identifikatuz eta zerbitzu ekosistemikoak bultzatuz (bereziki hirian eta aldirietan), sistema horrek duen ahalmena erakutsiko da. Indar berezia egiten da Barne Eraztun Berdearen proiektua erakusteko.

Baina bada besterik ere erakustokian: pantaila batean proiektatutako bideo baten bitartez, azken urteetan Gasteizen ingurumenaren arloan egin diren proiektu eta politika nabarmenak birpasatzen dira; mahai batean jarritako  1,5o x 1,10 mko plano batean udalerria ikus daiteke eta bertan adierazi dira Gasteizko azpiegitura berdearen osagarriak (blokeak, soroak, sare hidrografikoa eta ur masak, Eraztun Berdeko parkeen sarea, hiriko berdeguneak eta bide berdeen sareak). Erdialdean dagoen panel handian erakustokiaren izenburuaz gain, hiriaren eta ingurunearen argazki panoramiko bat (bertan natura hirian nola sartzen den ageri da) eta piktograma bitartez, azpiegitura berdeek ematen dituzten ondasun eta zerbitzu nagusien kategorizazioa ageri dira.

Hormetan lau panel jarri dira, bakoitzak lurralde sektore baten argazki panoramikoa duela. Horietan azpiegitura berdea osatzen duten espazio eta elementuak deskribatzen dira, eta aldi berean, horiek sendotzen lagundu dezaketen balizko esku hartzeak eta elementu berriak identifikatzen dira. Beste panel batean Barne Eraztun Berdearen proiektua eta hirian, azpiegitura berdean esku hartzeko lehen ardatz gisa, Gasteiz hiribidea eraberritzeko aurreikusitako lanak daude erakusgai. Azken honen baitan sartzen dira uraren, energiaren eta mugikortasunaren kudeaketa hobetzeko esku hartzeak eta erabilera publikoa eta espazioen bizigarritasuna sustatzea.

Gasteiz protagonista duen egunaren azken ekitaldi nagusia “Más allá de 2012, hacia un sistema de infraestructura verde multifunción” 16:30ean hasiko da eta Javier Maroto alkateak aurkeztuko du. Ondoren Ingurumeneko zuzendari nagusi Luis Andrés Orivek “El concepto de infraestructura verde multifunción – Aplicación al caso de Vitoria-Gasteiz’ deritzona azalduko du. Ingurugiro Gaietarako Ikastegiko zuendari Juan Carlos Escuderok, berriz, “Los servicios ecosistémicos en la infraestuctura verde urbana’ izeneko hitzaldia emango du.

Jarduera katalogo zabala programatu da aurtengoan. 31 enpresa bilduko dira, eta 2.700 lan eskatzailetik gora.

Turismo gida, sistemen administratzailea, estetizista, geriatria laguntzailea, ingeniaria… Guztira, 84 profil desberdin eskainiko dira Gasteizko aurtengo Enplegu Azokan. Gasteizko Udalak eta EHUko Arabako Campusak batera antolatua da azoka, zeinen helburu nagusia baita enpresak eta enplegu eskatzaileak bilduko dituen espazio bat sortzea, enplegu sorrera erabat apala den une honetan. Gaur eta bihar izango da Azoka, EHUko Lucio Lascaray ikerketa zentroan. Arabako Campuseko errektore-orde Eugenio Ruiz Urrestarazu eta Gasteizko Udaleko Gizarte Gaien, Adinekoen eta Enpleguaren zinegotzi Ainhoa Domaica mintzatu dira inaugurazio ekitaldian.

Azokaren hirugarren urtea da. Aurtengoan, aurreko urteetako enpresa eta lan eskatzaileen arteko bitartekaritzarako guneaz gain, jarduera berririk ere eskainiko da, parte hartzen duten pertsona eta enpresen beharrei erantzuteko asmoz. Horrela, hainbat espazio antolatu dira, ekintzaileen hainbat ekimen ezagutzera emateko, Europan dauden lan aukeren berri eskaintzeko nahiz lan eskaintzaileen lanerako prestakuntza hobetzen lagunduko duten lantegiak egiteko. Era berean, Gasteizen eta inguruan enplegu berdeak eskaintzen dituen aukerak aintzat harturik, Itun Berdeko Enpresen Foroa antolatu da.

Laneko bitartekaritzaren esparruan, nahiz eta enplegu eskaintza berrien sorrera oro har moteldua den, azokak aurten ere eskaintza polita egingo du, 143 lanpostutik gora eskainiko baititu. Ez dira bereziki sektore jakin batzuk azokan nagusi direnak, baizik eta sektore eta lanbide profil ugari biltzen dira bertan. Eskaintzen diren lanpostuetatik, gutxi gorabehera % 90 besteren kontura lan egiteko lan kontratuak dira. Horietatik, % 20k mugarik gabeko iraupena eskaintzen dute, lan merkatuko egungo eskarien ildotik. Gainerako, % 10, merkataritza gisako kontratuei dagokie, eta epe motzean eta ertainean kontratatzeko lan poltsak eratzeari.

Parte hartzen duten 31 enpresetatik, ia erdia lehenengo aldiz izango da azokan. Erakunde antolatzaileek egindako prospekzio ahalegin handiari esker izan da hori posible, Gasteizen ekonomi jarduera duten edo aurki izango duten enpresak erakarri nahi izan baitira bertara.

Oro har, azokan eskaintzen diren lanpostuek prestakuntza espektro osoa hartzen dute. % 60, gutxi gorabehera, kualifikazio handiko edo ertaineko pertsonei zuzendutako enplegu eskaintzak dira, eta gainerako % 40, berriz, prestakuntza maila apalagoko lanpostuetarako.

Eskaintza zabal horren baitan, nabarmendu beharra dago EURES sarea ere bertan izango dela, enplegu eskatzaileek Europak eskaintzen dituen aukerak ezagutzeko duten interes gero eta handiagoari erantzute aldera. Europako hainbat herrialdetan dauden lan premiei buruzko informazioa emango du sare horrek azokan, baita gaur egun dauden eskaintzen eta bete beharreko baldintzen berri ere. Zehazki, Erresuma Batuko enpresa batek herrialde horretako hainbat herritarako osasun arloko hainbat profil eskainiko ditu.

Gainera, enpresek eskaintzen dituzten kontratuei dagokienez, Arabako Enpresaburuen Elkartea (SEA) ere bertan izango da aurtengoan, eta guztira ordainpeko 75 beka eskainiko ditu, Lanbide Heziketako nahiz unibertsitateko ikasketak bukatu berri dituzten gazteentzat. Lan esperientziarik gabeko gazteen premiei erantzun diezaieke eskaintza horrek, lan merkatuan sartzeko lehen aukera bat eskuratzeko premia dutelarik, gazteen arteko langabezia indizea % 50etik gertu dagoen honetan.

Itxaropen handia sortu du azokak lanik gabe edo lanez aldatzeko gogoz dauden gasteiztarren artean. Izan ere, 2.700 lan eskatzailek baino gehiagok izena eman dute. Parte-hartzaile bakoitzak bi eskaintzatan izena emateko aukera izan du, eta gehienek bitarako eman dute izena. Beraz, guztira 5.400 hautagaitza baino gehiago jaso dira. Ignacio Ellacuria udal ikastegian eman ahal izan da izena, non 900 pertsonak baino gehiagok egin baitute eta lan orientatzaileen lantalde espezializatuaren aholkularitza izan baitute, baina baita on-line ere, eta 2.700 pertsonek aukeratu dute modu hori.  

Azokan parte hartzea

Izena emateko epea amaitu ondoren, aurkeztutako hautagaitza guztiak aztertu dituzte antolatzaileek, eta eskaintzen diren lanpostuetarako eskatzen diren betebeharrak betetzen dituzten egiaztatu dute.  Aurten, neurri handi batean egokitu zaizkie aurkeztu diren pertsonen profilak enpresek eskatzen dituzten prestakuntza eta esperientziari, eta, hortaz, azokan eskaintzen diren lanpostu guztietarako jaso dira eskabide egokiak.

Antolatzaileek hautagaiak aztertu ondoren, eskatutako profilarekin bat datozenek, gutxi gorabehera bostetik batek, elkarrizketa izango dute enpresarekin. Gaur eta bihar egingo dira elkarrizketa horiek, eta aurkeztutako enplegu eskaintzen parte handi bat estaltzea dute helburu. Hautatze prozesu horretarako, enpresek zenbait gune izango dute hitzartutako elkarrizketak egiteko. Gainera, eskabide gehien jaso duten enpresentzat, edo produktu berritzaileak eta epe motzean edo luzean enplegu aukerak ekar ditzaketenak dituzten enpresentzat, beste espazio batzuk egokitu dira, taldeentzako aurkezpenetarako, eta bertan azalduko dizkiete hautagaiei beren eskaintzen ezaugarriak.

Azokako beste gune batzuk

Ostiralean, hilak 30, 11:30ean, Letren Fakultateko areto nagusian, “Análisis, situación socio-económica y futuro del empleo”  hitzaldia emango du Manuel Pimentel Lan eta Gizarte Gaietarako ministro ohiak. Lan merkatuaren egungo egoera jorratuko du, eta hurrengo urteetako egoerara begira jarriko.

Gainera, lan kualifikazioa hobetzera bideratutako tresnak eskaintze aldera, enpleguarekin lotutako lau lantegi prestatu dira azokarako. Guztira, 250 lagunek baino gehiagok eman dute izena, horietan parte hartzeko.

Autoenpleguak ere badu lekurik azokan, bi erakunde antolatzaileek ekintzaileei laguntzeko duten interesaren eta horretan egiten duten ahaleginaren erakusgarri. Horrela, bada, SPRIk hartuko du parte, ekintzaileentzako laguntzen programa eta ekintzaileentzako ataria azalduko baititu, eta Araban ekintzailetzarekin lotutako erakundeetako eragileak ere izango dira.

Azkenik, Gasteiz Hiriburu Berdea dela eta, bertako enpresek arlo horretan azken urteotan bereganatutako esperientzia bildu dute antolatzaileek, Itun Berdea ordezkatzen duten enpresen aurkezpena egiteko gune bat sustatuz, sektore horretako enplegu aukera posibleen gainean gogoeta egite aldera.