Prentsa Oharren banner
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  10 urtarrila 2019 12:09

Ikuskizun batzuetarako sarreren salmenta urtarrilaren 15era aurreratuko da, 31n hastekoa den salmenta ez kolapsatzeko

Udalaren Kultura Sailaren mendeko Antzoki Sarearen negu-udaberrietako denboraldiak 73 ikuskizun eskainiko ditu guztira. Antzerkia, dantza, musika klasikoa, popa, flamenkoa, beste musika mota batzuk, umorea, zirkua eta familientzako proposamen ugari ikusi ahalko dira. Aurten, beti bezala, kalitatearen alde egin da, eta besteak beste, Juan Echanove, Alex Ubago, Carmen Maura, Aitana Sánchez Gijón, José Sacristán, Ismael Serrano, Café Quijano eta Sweet California izango ditugu San Prudentzio kaleko agertokian.

Gizarte etxeetako zikloetan 17 ikuskizun eskainiko dira, eta Principal antzokian, 55; Jesús Guridi kontserbatorioan ere eskainiko da saio bat .

Principal antzokia:

  • Helduentzako abonamenduak 12 proposamen biltzen ditu: “La vuelta de Nora”, Aitana Sánchez Gijónekin; “Voltaire/Rousseau, la disputa”, Josep María Flotatsena; “Ensayo”, Teatro Kamikazerena; “Si no te hubiera conocido”, Unax Ugalderekin; “Rojo”, Juan Echanoverena; “El precio”, Gonzalo de Castro eta Tristán Ulloarekin; “7 años”, Miguel Rellánekin; “Copenhague”, Emilio Gutierrez Cavarekin; “La golondrina”, Carmen Maurarekin; “Todas las mujeres”, oso artista ezagunekin;  “La culpa”, Pepón Nietorekin, eta “Señora de rojo sobre fondo gris”, José Sacristánekin.
  • Dantza abonamenduan lau lan sartu dira: “Sutra”, “Rêverie Romantique”, “Cenicienta” eta “James Brown Tribute”.
  • Euskarazko abonamenduak ere lau lan barne hartzen ditu: “Ghero” (Euskaltzaindiaren mendeurrena ospatzeko ekitaldien barruan), “Kalaportu”, “Beroki gorria” eta “Koskak”.
  • Familientzako antzerki abonamenduan bost ikuskizun eskainiko dira: “Ludo Circus Show”, “Gag Movie”, “Aita ogroa da”, “Julietas Romeo Circo” eta Sun Magoaren “Lilurako Laborategia”.
  • Familientzako musikaren programazioan bost kontzertu sartu dira: hiru, Euskadiko Orkestra Sinfonikoaren eta Musika Gelaren laguntzarekin (“Pianissimo”, “Isiltasunaren haitzuloa” eta, abonamendutik kanpo, “Uauatxua”); bi, Udal Musika Bandarekin (“Pinotxo” eta “Sforzando”).
  • “Umore giroan” abonamendua: Faemino y Cansado eta Luis Piedrahita.
  • Kontzertu Handien abonamendua: “Orquesta Santa Cecilia”, “Malikian Simphonic”, “Soqquadro Italiano” eta “Ivo Pogorelich”.
  • Abonamendutik kanpo: “Madama Butterfly”, “Play Off” eta talde eta kantari ezagunen kontzertu ugari: Sweet California, Café Quijano, Ismael Serrano, Albert Plá, Goazen 5.0, Juan Perro eta “Mende berria Kantuz” (Euskaltzaindiaren mendeurrena ospatzeko ekitaldien amaiera).
  • Euskadiko Orkestra Sinfonikoaren abonamenduko zazpi kontzertuek eta Udal Musika Bandaren asteazkeneko lau kontzertuek osatzen dute Principal antzokiko eskaintza: 55 ikuskizun orotara.

Gizarte etxeetako programazioa:

  • XXI. Mendeko Flamenkoa zikloa, Jesús Ibáñez de Matauco antzokian: Paco Cepero, La Macanita, Antonio Reyes eta Jesús Méndez, María Terremoto eta Paco del Pozo.
  • Ikuskizuna Ibaiondon zikloa, Felix Petite antzokian: “Contraescena”, “La Calderona, the remix, teatro clásico a ritmo de Hip hop”, “Jazz Bodas de Fígaro” eta “Las cosas extraordinarias”, Brays Eferena (Paquita Salasen protagonista ezaguna).
  • Jim Aktual abonamendua, Jesús Ibáñez de Mataucon: “Qué pasó con Michael Jackson”, “Galerna”, “Teníamos que haber empezado de otra manera” eta “Mundo Obrero”.
  • Dantza Sarean zikloan —bertako koreografoak ezagutarazteko eta dantza garaikidea gure programazioan normalizatzeko xedez iaz sortutakoa— hiru lan proposatuko dira Félix Petite antzokian: “Luz”, “The Big Game” eta  “Salüq”.
  • Gainera, AAVOZ  elkarteak Konpositore iberoamerikarren ganbera kantuak eskainiko ditu Jesús Guridi kontserbatorioan.

Abonamenduak urtarrilaren 24, 25, 26 eta 27an salduko dira. Hilaren 29 eta 30ean, abonamendu irekiak jarriko dira salgai, eta 31tik aurrera hasiko da salmenta arrunta. Bestetik, hilaren 31n salmenta kolapsatu ez dadin, ikuskizun hauetarako sarreren salmenta urtarrilaren 15eko 18:30era aurreratuko da: Ismael Serrano, Goazen 5.0, Sweet California, Café Quijano eta AAVOZen Konpositore iberoamerikarren ganbera kantuak.

Principal Antzokia. 2019 Urtarrila-Ekaina

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —  17 abendua 2018 13:01

Abenduaren 21ean eta 22an eskainiko da kontzertua, Foru Aldundiaren eta Vital Fundazioaren laguntzarekin

 

 

 

Gaur aurkeztu da Principal antzokiaren mendeurrena ospatzeko azken ekitaldia: Arkék abenduaren 21ean eta 22an eskainiko  duen “Al calor del invierno” kontzertua.

Eguberrietako kontzertuan Gasteizko Ganbara Orkestraren interpretazio bikainaz gozatzeko aukera izango da, eta Arabako abesbatzetako ahots handiez (Dzast Ahotsak, Claustrum Armonicum eta Sortilegio). Musika gau atsegingarriak izango dira, zalantzarik gabe, Eguberrietan Principal antzokira hurbiltzen direnentzat. Gainera,  Arabako konpositore goraipatuenetako baten lanaren erabateko estreinaldiaz ere gozatu ahalko dugu: “Glosas al libro Rimado de Palacio”, Francisco Ibáñezena.

Foru diputatu Igone Martínez de Luna eta Vital Fundazioaren zuzendari Josune Albizu ere izan dira aurkezpenean, bi erakunde horiek ekitaldiaren laguntzaile baitira.

Antzokitik nabarmendu dutenez, “amaiera bikaina izango da mendeurrena ospatzeko programa aberats, formatu askotariko eta publikoaren gertuko honetarako, horixe lortu nahi baikenuen San Prudentzioko agertokiaren 100. urteurrena ospatzeko ekitaldi guztiekin”.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  14 abendua 2018 22:42

Ospakizun-sorta bati egin dio San Prudentzio kaleko antzokiak; hilaren 18an joko du goia, 100 urte beteko dituen egunean

Datorren asteartean, abenduak 18, ehun urte beteko dira Gasteizko Nuevo Teatro antzokia —gaur egungo Principal antzokia— inauguratu zenetik, Garnieri-Marchetti opera- eta opereta-konpainiaren “La corte de Napoleón” lanarekin.

Mendeurrena ospatzeko, gala bat izan da gaur. Antzokia goraino beteta zegoela, Gorka Urtaran alkatearen hitzak entzun dituzte lehenik herritar eta agintariek, eta azken aldian San Prudentzio kaleko antzokiko agertokira igo izan diren hainbat artistaren bideoa ikusi dute ondoren.

“Cienycientas” obra eskaini da gero; ehundik gora pertsona agertu dira agertokira, Mikel Gómez de Segurak zuzendutako emanaldi dibertigarrian. Gure irrati publikoaren partaidetza izan du, zeinek Principal antzokiaren historiaren 100 urte horietako ehunka oroitzapen eta sentipen helarazi baitizkigu. Topa egin da galaren bukaeran, baina ez antzokiaren 100 urteengatik bakarrik, baita antzezte-arteen eta kulturaren alde ere.

Hainbat agintari izan dira galan. Gorka Urtaran alkateak eta Kultura, Hezkuntza eta Kirol zinegotzi Estíbaliz Cantok egin diete harrera guztiei ere. Talde politiko guztietako zinegotzien ordezkariekin batera, bertan izan dira Iñigo Urkullu lehendakaria, Bingen Zupiria, Estefanía Beltrán de Heredia eta Maria Jesús San José sailburuak, Ramiro González ahaldun nagusia, Igone Martínez de Luna eta Cristina González foru-diputatuak, Eusko Legebiltzarreko lehendakari Bakartxo Tejería, Batzar Nagusietako lehendakari Pedro Elosegi, Kultura Ministerioaren ordezkari eta INAEMeko zuzendariorde nagusi Fernando Cerón eta beste zenbait agintari, eta hiriko kulturaren arloko jendea.

Gala horrekin, nahiz eta 2018 urte osoan beste ospakizunik ere izan den, mendeurrena ospatzeko ekitaldi sorta bati egin zaio. Abenduaren 22ra arte iraungo du, eta hilaren 18an joko du goia, Lola Herrera handiak “Cinco horas con Mario” antzezlana eskainiko duelarik. Larunbatean, ihes-areto handi bihurtuko da antzokia; hilaren 16an, “Gizon Zoriontsuaren Alkandora” antzeztuko du Teatro Paraíso taldeak; hilaren 17an, “Intxaur-hauskailua” Eguberrietako ipuina antzeztuko du Moskuko XXI. Mendea Ballet Klasikoak, Jose Uruñuela Dantza Kontserbatorioko ikasleak dantzari. Azkenik, hilaren 21ean eta 22an ,“Al calor del invierno” Eguberrietako kontzertua eskainiko du Arkék. Astelehen honetan bertan egingo da horren aurkezpena prentsaurrekoan.

 

Egitarau aberatsa, hainbat formatutakoa, ikusleengandik gertukoa, horiekin partekatu nahi baita ospakizuna. Ildo horretatik joan da gaurko gala ere, herritarren festa, 100 urteko historia hori haiekin batera errepasatzeko asmoz antolatua.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  21 otsaila 2018 09:24

San Prudentzio kaleko eraikin apartaren mendeurrenaren baitan aurkeztea aurreikusi da.

Estibaliz Cantok zuzentzen duen Kultura Zerbitzuak Gasteizko Principal antzokia hobetzeko eta dagokien arauetara egokitzeko azterlan teknikoa egiteko laguntza teknikorako baldintzak argitaratu zituen ostegunean kontratatzailearen profilean.

Hala iragarri du, gaur, Kulturako zinegotzi Estíbaliz Cantok prentsaurrekoan. Proiektua egiteko interesdunek martxoaren bira bitartean adierazi ahalko dute nahi hori. Esleipendunek hiru hilabete eta erdi izango dute azterlana burutzeko, eta hiru proposamen egin beharko dituzte. Eragindako zerbitzuek proposamenak aztertzeko denbora izango dute eta, kasurik onenenean, antzokiaren mendeurrenaren baitan aurkeztu ahal izango da.

Cantok gogora ekarri duenez,  “gobernuaren konpromisoa zen antzokia eraberritzeko azterlan bat egitea, behar berrietara eta irisgarritasun, erosotasun eta ikusizko eta entzutezko kalitate premietara egokitzeko beharrezkoak ziren lanak aztertzea, eta hala adierazi genuen lehen agerraldian. Beraz, oso harro gaude errealitate bihurtu izanaz.

“Gure antzokiak hiri-harrotasuna pizten du, eta horretaz gain, lurraldeko azpiegitura ere bada. Urtean 150 ikuskizun izaten dira, batez beste, eta Euskadiko hiriburuan erreferente da ikuskizunen mailari dagokionez. Baina, mende bat duenez, baditu denborak eragindako hainbat akats, eta horregatik ezagutu egin behar dira antzokiak gaur egungo ikuskizunen behar teknikoetara eta antzokiaren baliagarritasunera egokitzeko behar dituen eraberritze lanak, beti ere ikusleen erosotasuna eta kultur gune garaikide batek eskatzen duen espazioen antolakuntza kontuan hartuta, eta lan horiek egiteak zenbat balioko duen.

“Hiru proposamenak eta kosteak ezagutu ondoren, bat aukeratu eta nola egin erabaki beharko da, eta horretarako finantziazioa bilatu, izan ere Principal antzokia –beste bi hiriburuetako antzokiak bezala– lurraldeko azpiegitura izanik, lurraldeko finantziazioa izan behar du.  Dena ondo badoa, 2019an errealitate bihur daiteke horrenbeste aldiz esan baina egin ez den lan hori.” amaitu du Cantok.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  25 urtarrila 2018 10:28

PP, zeinak ez baitzuen ezer egin lau urtetan, gezurretan ari da Principal antzokiaren eraberritzea dela eta”, adierazi du Cantok, eta lehiaketa aste batzuen buruan deituko dela argitu du

Gasteizko Udaleko Kultura, Hezkuntza eta Kirol zinegotzi Estíbaliz Cantok Alderdi Popularraren adierazpen batzuei erantzun nahi izan die gaur, alderdi horrek esan baitu gobernuak ez duela ezer egin Principal antzokia eraberritzeko: “PP, zeinak ez baitzuen ezer egin lau urtetan, gezurretan ari da Principal antzokiaren eraberritzea dela eta. Gobernuaren konpromisoa eraberritzeari buruzko azterlana egitea da, eta agintaldi honetan beteko da, aste batzuen buruan aterako baita baldintza-agiria”.

Izan ere, EAJ-PNV eta PSE-EE alderdiek sinatutako gobernu akordioak —“zeina agiri publikoa baita”— 8.3 puntuan jasotzen du “Principal antzokia eraberritzeko plana lantzea”. “Badirudi, ordea —erantsi du Cantok—, PPri amorru ematen diola hori gauzatzeak, eta herritarrak nahastu nahi ditu, konpromisoa eraberritzea egitea zela esanez”.

Gainera, Cantok ukatu egin du “2017an ezer egin ez izana”. “Baldintza-agiri serio bat lantzen ari gara, emaitza gisa eraberritzeko plan serio eta errealista izango duena, gauzatzeko modukoa”. Zinegotziak azaldu duenaren arabera, “baldintza-agiria lantzen hasi ginenean, aldez aurretik egindako azterlanei buruzko zurrumurru ugari ibili arren, ez zegoen ezer ofizialik ez Kultura Zerbitzuan, ez Mantentze Zerbitzuan, ez Arkitekturan ezta Herritarren Segurtasunean ere, lau zerbitzu horiek aritu baitira urtebetez baldintza-agiria lantzen, PPren geldotasuna dela eta zerotik hasi behar izan dutenez behar zen denbora hartzea erabaki genuelako, agiri osoa eta ona izan zedin”.

Esate baterako —zehaztu du—, antzokiko teknikariei makineriari buruz galdetu zaien lehen aldia izan da, zein berrikuntza behar duen jakiteko. PPkoek diotenean berek badakitela zer eraberritu behar den, jainkozko buru-argitasunari esker izango da”, adierazi du.

Horrekin lotuta, Cantok iragarri du baldintza-agiria “hilabete baino lehenago” aterako dela, eta esleitzen denean, “enpresa espezializatu batek zehaztuko du zein eraberritze lan egin daitekeen eta zenbat balioko lukeen, baita zein epetan egin litekeen ere, lau zerbitzuek emandako informazioa baliatuz. Izan ere, eraberritzea zatika egiterik bada, antzokia denboraldi batean edo bitan ixteko beharrik izan gabe, kontrakoa baino hobea izango da”.

Zerbitzuen jarraibideak kontuan hartuta enpresak eraberritzeko plana aurkezten duenean, “finantzaketa posiblea aztertuko dugu, eta orduan hasiko gara antzokiaren benetako eraberritzea begiztatzen. Mendea duen antzoki batek, hiriarentzat harrotzeko modukoa denak, ez du fikziozko borroka politikorik merezi, ezta presaka jardun izana, eskatzen diguten bezala. Presaka inauguratu edo eraikitzeko garaiak atzean utzi genituen”.

Garbi dago —amaitu du Cantok—  Principal antzokia eraberritzera eramango duten urrats serioak lehen aldiz egiteak ematen diola PPri amorru. Eta amorru ematen bide dionez, ahal beste oztopo jartzea erabaki du, eta beti EZEZKOAN egotea penagarri bada ere, uste dugu ez dela gehiegi eskatzea herritarrei gezurrik ez esateko behintzat”.

 

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  19 iraila 2017 14:04

 

 

 

 

 

 

 

Irailaren 23an, larunbata, “Lurra, Ardoa, Dantza” ikuskizuna estreinatuko da Principal antzokian; lanak dantza tradizionalaren, musikaren eta ardoaren arteko erlazioan sakondu nahi du. Ordubetez, 20 profesionalek —10 dantzarik, 9 musikarik eta aktore batek— osatutako taldeak ardoa egiteko prozesua antzeztuko dute, koreografia ezberdinak baliatuz.

Gaur aurkeztu da prentsaurrekoan ikuskizuna. Hauek izan dira bertan: batetik, lanaren babesleak, Estibaliz Canto, Gasteizko Udaleko Kultura, Hezkuntza eta Kirol zinegotzia; Joseba Koldo Pérez de Heredia, Arabako Foru Aldundiko Euskara zuzendaria, eta Josune Albizu, Vital fundazioaren ordezkaria; bestetik, José Sanchez, Mulixka dantza taldeko koreografoa eta zuzendaria; Iñaki Palacios, konpositore eta musika zuzendaria, eta Juanjo Monago, aktore nagusia.

Proiektuaren sustatzaileak

Mulixka taldeak sortu du ikuskizuna, zeinak ardoaren espiritua erakusten baitu dantza tradizionalaren ikuspegitik, José Sánchez koreografoak azaldu duenez; hiriko dantzari eta txistulari gailenek osatzen dute taldea, eta aurreskuarekin lotutako sari ugari irabazi dituzte.

Ardoaren sinbologiaren funtsezko elementuak antzezturik eta osagai modernoez horniturik aurkezten dituzte, eta argiak eta musikak ezinbesteko zeregina dute ikuskizunean. Sortzaileek landa-lana egin dute Arabako Errioxan, ardogintzaren une garrantzitsuenak ezagutu eta dantza eta musikaren bidez islatzeko. Berariaz sortutako bederatzi koreografiak osatzen dute lana, zuzeneko musikaz lagunduta interpretatuko direnak.

Orotara 20 profesional igoko dira Principal antzokiko agertokira larunbatean, 20:30ean: dantzariak, musikariak eta Juanjo Monago aktorea, zeinak ikuskizuna gidatuko baitu. Iñaki Palacios txistulari, konpositore eta musika-zuzendariak landu du musika.

Estíbaliz Cantok azaldu duenez, sarrerak ekainean jarri ziren salgai, eta oso harrera ona izan dute, dagoeneko 600 saldu baitira. Hori dela eta, 2. anfiteatroa ere irekiko da, eskaerari erantzutearren.

Sarrerak ohiko lekuetan eskuratu daitezke, 15 eta 10 euroan eta deskontu bereziekin.

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  19 maiatza 2017 14:05

Jaime Azpilicuetak zuzendutako lanak zazpi funtzio emango ditu Gasteizen

Ikuskizunen historiako musikal ospetsuenetako bat, “Cabaret, el musical de Broadway”, ekainaren 8, 9, 10 eta 11n antzeztuko da Gasteizen, eta Principal antzokia Kit Kat Klub ezaguna bihurtuko da.

Kultura, Hezkuntza eta Kirol zinegotzi Estíbaliz Cantok, Teresa Abarcak —lanean Rally Bowles— eta Armando Pitak —zeremonia maisua— aurkeztu dute gaur prentsaren aurrean.

Cabaret musikala baino gehiago da. Zeremonien maisu dibertigarriak gobernatuta, Kit Kat Klubak hidra naziaren etengabeko gorakadaren eta protagonistek itxurak eginez erakusten duten egunerokotasuneko normaltasunaren arteko bizikidetza eszenifikatzen du.

Madrilen 2016an  estreinatu ondoren, musikal onentzat saritutako hori estatuko antzoki askotan eskaini da dagoeneko. Gasteizen zazpi funtzio emango ditu, eta sarreren % 40 oraindik salgai dago.

2014an musikal ospetsuaren beste bertsio bat ikusi ahal izan zen Principal antzokian. Bertsio hau proposamen dramatikoa da, 1966an New Yorken estreinatutakoari gehiago erreparatu diona, Liza Minellik protagonizatu zuen filmari ere erreferentziak eginez.

Hauek dira prezioak: 55 euro besaulki-patioan, 45 euro lehen anfiteatroan, eta 40 euro bigarrenean.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  23 urtarrila 2017 14:47

 

  • Urtaranen gobernuak eraberritzea aztertzeko konpromisoa berretsi du, eta teknikoki ahal den neurrian esku hartzeko gogoa
  • Edonola ere, antzokiaren egiturarekin lotutako eraberritze-lanik eginez gero haren jabe diren beste bi erakundeekiko elkarlanean ekingo litzaioke

Udal gobernuak adierazi du Principal antzokia doan lagatzeko hitzarmenaren berrikuntzak —Eusko Jaurlaritzak iazko urriaren 25ean onetsi eta Tokiko Gobernu Batzarrak abenduaren 29an berretsi zuen— ez dakarrela inolako aldaketarik eraikinean lanik eginez gero erantzukizunen banaketari dagokionez. Principal antzokian eraberritze-lanak egin eta finantzatzeari dagokionez, oraingo egoera juridikoa bai 1993an bai 2003an hitzartutako bera da. Hots, Udalak antzokiaren jabe diren beste bi erakundeen —Eusko Jaurlaritza eta Arabako Foru Aldundia— baimena behar du eraberritzeko obrak egiteko, eta hiru alderdiek erabakiko dute lanen finantzaketa bateratua.

Hori egiaztatzeko nahikoa da lagatzeko lehen hitzarmenaren testua eta duela gutxi sinatutakoa hitzez hitz alderatzea. 1993an, lagatzeko lehen hitzarmena egin zenean, baldintza hau aurreikusi zen:

 

 

Puntu horren hitzez hitzezko idazketa utzi da, bai 2003an sinatutako luzapenean bai duela gutxi egindako berrikuntzan. Halaxe agertzen da 2016ko urriko akordioaren testuan:

 

 

 

 

Era berean, lagatzeko hitzarmen horretan beti jaso da kudeatu eta mantentzeko gastuak Gasteizko Udalaren kontura joango direla. Horren erakusgarri da 1993az geroztik udal aurrekontuetan berariazko partida agertu ohi dela Principal antzokiko ekipoak onik mantentzeko eta erosteko.

Dena dela, klausula bat sartu da 1993tik egin baina aurreko akordioetan argi geratzen ez zen alderdi bat legeztatzeko: egokitzeko lanak maizterraren kontu egingo direla, eta berrikuntzak, jabe diren erakundeen kontu. Paragrafo horrek udal-finantzaketaz orain arte egin diren mantentze  eta egokitzeko lanak estaltzen ditu, eta ez du ordezten hiru jabeek antzokiaren egitura eta konfigurazioa aldarazten duten eraberritze-lanak finantzatu behar izanaz ezarritakoa. Hauxe da testua:

 

 

 

 

 

 

Hain zuzen ere, antzokia doan erabiltzen lagatzeko hitzarmena lehen aldiz berritu zenean, 2003an, orduko alkateorde Miguel Ángel Echevarríak gutun bat bidali zion Eusko Jaurlaritzari, eta bertan aitortzen zuen “kudeaketa integrala gure Udalari eskuordetu izana, bai eta mantentzea eta herritarrei eskaini zaion programazioa eskuordetu izana ere, eta gastuak osorik gure gain hartu izana, guztiz arrakastatsua gertatu da”.

Gogoratu beharra dago, bestetik, doan lagatzeko hitzarmena hamar urtean behin berritzea aurreikusi zela, baina egin behar zenean, 2013an, Alderdi Popularrak ez zuela gauzatu, eta oraingo gobernuak arduratu behar izan duela horretaz, sortutako hutsune juridikoa betetzeko.

Principal antzokia berritzea  EAJ-PNV eta PSE-EE alderdien arteko gobernu hitzarmenaren puntuetako bat da. Aurtengo aurrekontu proiektuan eraberritzearen aurretiazko proiektua egitea aurreikusi da, zeina agintaldi honetan egingo baita, jabe diren erakunde guztien diru-ekarpenarekin. Principal antzokia lagatzeko azken hitzarmenak ez dakar inolako aldaketarik aurreikuspen horiei edo obrak finantzatzeko mekanismoari dagokionez, eta ez du inola ere esaten gainerako erakundeak eraikina eraberritzea finantzatzetik salbuetsita daudenik.

Gobernu taldeak argi utzi nahi izan du, Kulturako zinegotzi Estíbaliz Cantoren bitartez, zein den bere “konpromisoa: azterlana egitea eta zerikusia duten erakundeekin lan egitea, antzokia eraberritu ahal izateko, ikuspuntu teknikotik bideragarria dela zehaztuz gero, eraikinaren mugak aintzat izanik. Kasu horretan, Udalak, Eusko Jaurlaritzak eta Aldundiak finantzatuko lukete obra, ez bakarrik jabekideak direlako, baizik eta garrantzi handiko obra delako: Euskadiko hiriburuko Principal antzokiarena”.

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —  30 azaroa 2016 16:37

Urriaren 6tik azaroaren 29ra bitartean programatutako 35 lanetako hamarretan sarrera guztiak saldu dira

Atzo amaitu zen Nazioarteko Antzerki Jaialdiaren aurtengo edizioa. Guztira 15.959 ikusle izan ditu, ikuskizunak eta jarduera paraleloak batuta, hau da, 2015ean baino ia mila ikusle gehiago; batez besteko asistentzia % 82koa izan da, eta hamar ikuskizunetan areto osoa bete da.

“Jaialdiak programazio ona, ausarta eta berritzailea proposatu du, ohi duenez, eta jarduera osagarri ugari, ikusle aktibo eta inplikatuek, antzerkiaz gozatzen dutenek, eskatzen duten bezala. “Ikuslea Ikusgai” da jaialdiaren lema, ikusleek eta herritarrek beti ematen duten erantzun fidela aitortu eta eskertzeko”, nabarmendu du Kultura, Hezkuntza eta Kirol zinegotzi Estíbaliz Cantok.

Jaialdiak bere ohiko ezaugarriei heldu die, programazio ausart eta berritzailearen alde egin baitu. Bertako eta nazioarteko ekoizpenak sustatzen jarraitu du, bai eta sorkuntza eszenikoari buruzko eztabaidaguneak ere.

Urriaren 6tik azaroaren 29ra arte, 35 ikuskizun ikusi ahal izan ditugu: nazioarteko hamar ikuskizun, sei dantza ikuskizun, euskarazko sei lan, eta Euskadin sortutako hamar proposamen; hamazazpi lan estreinaldiak izan dira gure lurraldean, eta sei erabateko estreinaldiak. Bestetik, Haurtxoak proiektuan leku guztiak bete dira.

Atzerriko sortzaileak etorri dira, hala nola Nelly Hunter (Royal Shakespeare Company), Flute Theatre, Claudio Tolcachir, Mauricio Jartum eta Lindsay Kemp, bai eta estatukoak ere: Bárbara Lennie, Alicia Borrachero, Fran Perea, Isabel Ordaz, Verónica Forqué eta Nuria Espert.

Gainera, Antzerkia Zabaltzen atalean eszenarekin lotutako hainbat jarduera antolatu dira: solasaldiak, ikuslekiko topaketak, etab. Principal antzokia ezagutzeko bisitaldi gidatuek ere harrera ona izan dute, bai eta Arte Eszenikoen Jardunaldiek ere, zeinetan ia 70 profesionalek hartu baitute parte.

Nabarmentzekoa da euskarazko ikuskizunetan, dantzan eta helduentzako antzezlanetan asistentzia progresiboki gorantz doala.

Jaialdiak 380.000 euroko aurrekontua izan du: 250.000 euro Antzoki Sareak jarri ditu, 45.000 euro beste erakunde batzuek (INAEM eta Eusko Jaurlaritza), eta 85.000 euro sarrera salmentatik lortu da.

“Azken batean, Nazioarteko Jaialdiaren 41. edizioa beste urrats bat izan da ekitaldia zein antzezte arteak gure hiriko eta lurraldeko kulturaren protagonista gisa sendotzeko”, amaitu du Cantok.

20161130 BALANCE

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —  30 abuztua 2016 14:19

Atzo arratsaldean, Principal antzokiko sabai akustikoari eusten dioten kableetako bat hautsi egin zen, eta agertokiaren gainera erori elementu bat. Lurrean jo zuen, eta hainbat kalte eragin bi habetan, baina egitura ondatu gabe, eta ez zen inor zauritu.

 Egokitze-lanak egiten ari ziren bitartean gertatu zen ezbeharra, baina oraindik ezin izan da jakin zergatik hautsi zen kablea.

 Suhiltzaileak bertaratu ziren, eta, antzokiko teknikariek lagundurik, lurrera jaitsi zuten sabai akustikoa. Arriskuak ekiditeko, pieza eskegita dagoen bi motorretako bat erabili zuten horretarako.

 Lehenengo momentutik, lanean jarri zen Kultura Zerbitzua, ez bakarrik egoera konpontzeko, baizik eta orobat bermatzeko aurki bertan izatekoak diren ekitaldiak egiterik izango dela. Esate baterako, Europa jauregiko aretoak blokeatu ziren ahalik eta lasterren, Principal antzokian egin ohi den FesTVala bertara aldatzeko.

Nolanahi ere, bihar arte ezingo da jakin zenbat denbora beharko den gaur bertan hasiko diren konponketa-lanak burutzeko. Baina bai ziurta daiteke FesTVala egin egingo dela, okerrenean ere Europa jauregira aldatuta, baldin eta ordurako obrak bukatzerik ez badago.

 

Share