Prentsa Oharren banner

Prentsa-deialdiak (2020-09-17)

Prentsaurrekoa. Zurrumurruen kontrako Udal Estrategia aurkeztea

Parte hartzaileak. Bizikidetza eta Aniztasun zinegotzi Miren Fernandez de Landa; eta Leticia Perez Cruz eta Aida Ochoa García, Amekadi aholkularitza zerbitzuko ordezkariak

Eguna. Asteazkena, irailak 17

Ordua. 10:30

Tokia. Udaletxeko prentsa aretoa

———————————

Prentsaurrekoa. Europako Mugikortasun Iraunkorraren Astea aurkeztea

Parte hartzaileak. Mugikortasunaren eta Espazio Publikoaren zinegotzi Amaia Barredo

Eguna. Osteguna, irailak 17

Ordua. 11:00

Tokia. Udaletxeko prentsa aretoa

 

Share

Gasteizko Antzerki Jaialdian protagonismo berezia izango dute tokiko konpainiek

Datorren astean jarriko dira salgai abonamenduak

Urriaren 7tik abenduaren 21era bitartean egingo den Gasteizko 45. Antzerki Jaialdirako dituzten proposamenak aurkeztu dituzte tokiko antzerki konpainien ordezkariek, gaur, prentsaurrekoan. Jaialdian 32 ikuskizun izango dira, guztira, eta horietatik 20, euskal taldeenak.

“Aurtengo jaialdia 0 km-koa izango da. Tokiko sortzaileen bandera-ontzia izatea nahi izan dugu. Gure helburua da arlo honetako artista, langile eta ikusleek berriz ere segurtasun- eta normaltasun- sentsazioa izan dezatela antzokietan” adierazi du Gasteizko Hezkuntza eta Kultura zinegotzi Estibaliz Cantok.

Horren haritik, antzoki sarearen arduradun Marta Morfortek azpimarratu egin du Gasteizko jaialdian segurtasun-neurri guztiak beteko direla, saio bakoitzean edukieraren ehuneko 50a, eta jendearen artean eserleku bat libre. Artistei bertaratzeagatik eskerrak eman ondoren, hitza eman die, euren proiektuak azal ditzaten.

Lehenik, Zanguango taldeko Miguel Muñozek hitz egin du. Joan den astean kaleko ikuskizun onenaren Max Saria jaso zuen “Al otro lado” lanagatik. Oraingoan, ‘Aquí va a pasar algo’ aurkeztu du, pertsona guztientzat jolasa aldarrikatzen duen umore-ikuskizuna.

Teatro Paraísoko Pilar Lópezek, berriz, Úniko, el Príncipe destronado’ lanaren magiaren lilura sentitzera animatu ditu ikusleak. Etxera beste umetxo baten etorrerak lehentasuna galarazi diola sentitzen duen seme bakar baten istorioa kontatzen du. “Jelosia eta enbidia bezalako emozioen kudeaketaz ari da”.

“Enredados” deialdiaren baitan, beldurrari buruzko “No me toques” Juan 20:17’ lana aurkeztu du Thussiako Miguel Garcések . “Pandemia garaian pasaporte inmunitarioak kudeatzen dituen enpresa bati buruzko da” adierazi du.

Off Local

Ondoren, Off Lokal deialdian aurkeztutako proposamenak azaldu dituzte.

Ekomako Aitor Colladok ‘Con los pies por delante’ lanaren zentzua azaldu du: heriotza desmitifikatzea. Bi pertsonaiak heriotzari aurre egiteko dituzten ikuspuntu ezberdinak deskribatzen ditu umorezko lan honek.

Ondoren, Mananas Fruti Co. konpainiako Jasón Guerrak ‘Acoples & Desacoples lana defendatu du. Bertan, gure familia- eta gizarte-bizitzarekin konpromisoak izateari utziz gero beste mundu bat posible dela ikusarazten saiatzen da coach bat.

Pez Limbo konpainiako Unai López de Armentiak, berriz, ‘Marea baja’ lanaz eta gizonen arteko zainketaz hitz egin du.

Tranpola konpainiako Josune Velezek ‘Txilin Hotsak’ aurkeztu du. Kristalezko ontzi huts batean zer dagoen esango dute lan horretan.

Pizifaktoriako Mikel Ayllón ‘Elkar ezagutu genuen eguna’, lanaz aritu da; internet bidezko harremana duten bi pertsonen arteko istorioa. “Bakoitzak bide desberdina aukeratzen du zoriontasuna bilatzeko” azaldu du.

Amaitzeko, Ypárchoumeko Marina Suárezek hartu du hitza. Existentzia mugimendu gisa aztertzen du ‘Hara Nori’ lanean.

Irailaren 21ean hasiko da antzerki-jaialdirako abonamendu salmenta (abonamendu irekietarako hitz ordua eskatu beharko da aldez aurretik). Sarreren salmenta irailaren 28an hasiko da.

Informazio gehiago

Share

Udalak Judimendi, Adurtza eta Salburura zabalduko du superetxadien plana

Mugikortasunaren eta Espazio Publikoaren zinegotzi Amaia Barredok azaldu duenez, Santa Luzia, Jose Uruñuela, Dultzaina eta Mariano San Miguel Musikariaren kaleak izango dira estrategiaren barruan sartzen hurrengoak, eta Salburuko sektore batean ere esku hartuko da, zeina Brusela hiribideak, Deba Arroaren kaleak eta Salburua bulebarrak mugatzen baitute.

 

Udalaren superetxadien plana Santa Luzia eta Mariano San Miguel Musikariaren kaleetan (Judimendi) eta Jose Uruñuela eta Dultzaina kaleetan (Adurtza) jarraituko da garatzen, Mugikortasunaren eta Espazio Publikoaren zinegotzi Amaia Barredok arloko batzordean jakinarazi duenez. Horretaz gain, Salburuko sektore batean ere esku hartzea aztertzen ari da saila, zeina Brusela hiribideak, Deba Arroaren kaleak eta Salburua bulebarrak mugatzen baitute, eta Zabalganeko Ilustrazioaren hiribidean esku hartzea aurreikusi da halaber.

Amaia Barredok gogora ekarri duenez, auzoz auzo zehazten ari dira jarduketa horiek, espazioak baketzeko, trafiko masiboa moteltzeko eta soberako trafikoa kanpora ateratzeko, aparkalekuak kendu gabe: “espazio publikoa berriz diseinatzeko proposamena oinarrituko den funtsezko pieza dira. Horri esker, ingurumen-kalitatea areagotuko duten aldaketak egin ahal izango dira, hiriko berdeguneak eta kaleko aisialdiko erabilerak eta jarduerak areagotzeko aukera emanez, eta kaleen erosotasuna eta bizigarritasuna are gehiago hobetzera bideratutako kontzeptu berriak sartu ahalko dira, baita oinezko joan-etorriak eta herritarrek espazio publikoa erabili eta gozatu dezaten sustatu ere”.

Amaia Barredoren iritziz, superetxadiak “aukera paregabea dira merkataritza dinamizatzeko, oinezkoentzat egokitu diren guneetan egiaztatu ahal izan denez, esaterako, Antso Jakitunaren kalean, Santa Barbara plazan eta, berriki, Tornay Medikuaren kalean. Ildo horretatik, trafikoa moteltzeko esku-hartzeak egin dira, bidegorri berriak egokitu, eta oinezkoentzako lehentasuna ezarri zenbait kaletan”.

Jarduketa horietako bat San Antonio kalearen berregituratzea da, non hosto laranja eta gorrixkekiko bi eguzkilore handi margotu baitira Florida kalearekiko bidegurutzean eta Legebiltzarreko tranbia-geltokiaren ondoan. Sinbolo horrek sustrai sendoak ditu euskal folklorean, antzinatik paratu ohi baita baserrietako ateetan babesgarri gisa. Udalak oinezkoen lehentasuna irudikatzeko aukeratu du, eta beste kale batzuetara ere zabalduko du, superetxadiak hedatu ahala. “Espazio publikoa beste modu batean kudeatzeko ari gara lanean. Esku-hartze horrek irauteko asmoa du, hirian espazio publiko berria eratzeko xedez. Horrexegatik dago sinbolismoz betea, eta Udalak espazio publikoaz duen ikuspegia ongi islatzen duela uste dut. Herritarrek seguru mugitzeko duten eskubidea bermatu ahal duen espazio publikoa izateaz gain, urrunago joan nahi dugu.  Espazio publikoaz gozatzeko eta herritar orok hura bizi ahal izateko eskubidea bermatzen duen lekua izatea nahi dugu”, nabarmendu du zinegotziak.

 

Orain Gasteiz plana

San Antonio eta Miranda de Ebro kaleetako jarduketak Urtaranen gobernuak landutako Orain Gasteiz planean espazio publikorako iragarri ziren ekintzen barruan sartzen dira. Gasteizko ia auzo guztietan barrena hainbat jarduera martxan jartzea proposatzen zuen planak, hiria normaltasun berrira egokitzeko.

Mugikortasun Iraunkorraren eta Espazio Publikoaren Plana oinarri hartuta, hiru eremutan diseinatu ziren neurriak: espaloiak zabaltzea oinezkoak ibiltzeko zenbait espaziotan, bizikleta-konexioak sortzea lantokietara eta industrialdeetara, eta Mugikortasunaren eta Espazio Publikoaren Planean —berrikusten ari da orain— identifikatutako superetxadietan jarduketak garatzea.

Plana betetzeko 400.000 eurotik gorako inbertsioa egingo da; zehazki, 8,5 kilometro espaloi handituko dira, 8 kilometro bizikleta-bide berri egingo, eta superetxadien barruan esku hartuko.

Plana mailaz maila garatzen ari da, fase bakoitzari emandako lehentasunaren arabera, eta 2020an zehar ezartzea da asmoa. Zegokionean esan zen bezala, jarduera horietako batzuk behin betikoak izango dira, eta beste batzuk behin-behinekoak, baina baliteke azken horiek denboran irautea.

Hasteko, jende ugari dabilen espazioetan oinezkoentzako espaloiak zabaltzeko esku-hartzeak egin ziren. Lan gehienak baliabide propioak erabiliz egin ziren, behin-behineko, piboteak, hesiak eta pintura baliatuz batez ere, deseskalatze prozesuaren 0 fasean.

Sei kaletako espaloiak zabaltzeko jarduera horiei esker, segurtasun-distantzia bermatu ahal izan zen hasierako faseetan, mugikortasuna oso mugatua baitzen, ordu-tarteetan banatuta. Maiatzaren hasieran ekin zitzaien lanei, hiriko kale jendetsuenetan: Manuel Iradier eta Florida kaleak; gero, Frantzia eta Ortiz de Zarate kaleetara zein San Antonio eta Frantzia kaleen arteko bidegurutzera zabaldu ziren; azkenik, Domingo Beltran de Otazu eta Ramiro Maeztu kaleen arteko bidegurutzean eta Tomas Zumarraga Dohatsuaren kalean, Done Jakue hiribideko zubian (Madril kalearen gainetik), Bake kalean eta Zadorra hiribidean jarraitu zuten.

Hiriko lantokietarako eta industrialdeetarako bizikleta-konexioak hobetzeko alternatibei dagokienez, aurreikusitako gehienak garatu dira, eta zenbait lan txiki baino ez da geratzen bidegorri berriak amaitzeko kale hauetan: Artapadura, Gamarrako atea, Ozeano Barea, Legutianoko Atea eta Oto hiribidea.

Abiarazteko geratzen zen azken konexioa Bremen kaleko bidegorria zen, eta Udalak joan den irailaren 4an esleitu zuen, 133.783,92 euroan. Bide  horrek Mariturri hiribideko eta Antonio Machado kaleko bizikleta-bideak lotuko ditu, eta laster hasiko dira egiten. Promociones y Pavimentaciones enpresari esleitu zaio kontratua, eta gauzatzeko epea hiru hilabetekoa da.

 

Share

15 ikastaro eta lantegi programatu ditu Haurtzaro eta Senitarte Zerbitzuak ikasturte berrirako

15 jarduera programatu ditu Haurtzaro eta Senitarte Zerbitzuak, 2020-2021 denboraldirako Udalaren ikastaro- eta lantegi-eskaintzaren barruan.

Irailaren 7tik, zabalik dago izena emateko epea, eta urriaren 7an hasiko dira jarduerak. Gai ugari jorratuko dira bertan; esaterako, nola bizi duten seme-alabek gurasoen banaketa, edo nola landu pazientzia, seme-alaben heziketan.

010 telefonoan eman daiteke izena, edo Udalaren webgunearen bitartez.

Astean klase bana izango da ikastaro guztietan, salbu eta Senidegune familientzako gunean, horretan bi izango baitira.

Hasiera batean, aurrez aurre egiteko pentsatuta daude jarduerak. Hala ere, egoera sanitarioa eta Covid-19aren kontrako babes-neurri espezifikoen direla eta aurrez aurre egiterik ez badago, formatu birtualean egiteko aukera izango da, baita material didaktikoa eta laguntza-bideoak erabiltzeko aukera ere.

Ikastaro eta jarduerak:

  1. Emozioak lantzen (6 urtetik 8ra bitarteko seme-alabak dituzten gurasoak).
  2. Emozioak familia barruan (gurasoak).
  3. Emozioak eta mindfulness familia giroan (3 urtetik 5era eta 6 urtetik 8ra bitarteko seme-alabak dituzten gurasoak).
  4. Nola bideratu emozioak (6 urtetik 8ra eta 9 urtetik 1ra bitarteko haurrak).
  5. Senidegune, familientzako gunea, 3 urtera arteko nahiz 4 urtetik 6ra bitarteko seme-alabak dituzten gurasoentzat. Haurdun dauden emakumeak eta bilobak zaintzen dituzten aiton-amonak ere joan daitezke bertara.
  6. Modu positiboan hezten (4 urtetik 6ra bitarteko seme-alabak dituzten gurasoak).
  7. Bihotzez eta zentzuz hezten (6 urtetik 11ra bitarteko seme-alabak dituzten gurasoak).
  8. Pazientziaren giharra entrenatzen (gurasoak).
  9. Nola bizi dute seme-alabek gure banaketa? (gurasoak).
  10. Nerabezaroa: gurasoak ahaldunduz (gurasoak).
  11. Atxikimendu segurua sustatzeko lantegia (2 urtera arteko seme-alabak dituzten gurasoak).
  12. 9 gako hezteko (6 urtetik 9ra bitarteko seme-alabak dituzten gurasoak).
  13. Autozainketa eta indarkeriarik gabeko komunikazioa (18 eta 65 urte bitartekoak).
  14. Gurasoentzako erresilientzia (gurasoak).
  15. Txikientzako erresilientzia (6 urtetik 9ra bitarteko haurrak).

 

Share

Udaltzainen eta suhiltzaileen esku-hartzeak

Udaltzainek azken 24 orduotan 12 zirkulazio-istripu erregistratu dituzte. 4 pertsona zauritu dira horietan.

Sute elektrikoa

Atzo arratsaldean, suhiltzaileek Pio XII.a kaleko eraikin bateko elektrizitateko banaketa-kaxa batean piztutako sua itzali behar izan zuten. Kalteak txikiak izan ziren.

 

Share

Prentsa-deialdiak (2020-09-15)

Prentsaurrekoa. Nazioarteko 45. Antzerki Jaialdian parte hartuko duten tokiko konpainien lanak aurkeztea

Parte hartzaileak. Miguel Muñoz, Zanguango; Pilar Lopez, Teatro Paraíso; Miguel Garces, Thussia; Unai Lopez, Pez Limbo; Josune Velez, Trampola; Mikel Ayllon, Pizifaktoria; Aitor Collado, Ekoma; Jason Guerra, Manana fruti; eta Udal Antzoki Sareko arduradun Marta Monfort

Eguna. Asteazkena, irailak 16

Ordua. 11:30

Tokia. Teatro Principal Antzokia

Share