Prentsa Oharren banner

Prentsa-deialdia (2020-09-08)

–  Etxean konpostatzeko programa berriaren aurkezpena

Parte-hartzaileak: Ingurumen Plangintza eta Kudeaketaren zinegotzi César Fernández de Landa, eta Hondakinen Kudeaketarako Ataleko teknikari Diego Malo.

Eguna: asteartea, irailak 8
Ordua: 11:00
Lekua: udaletxeko prentsa-aretoa.

 

Share

SMSen bidez abisatuko du udal-garabiak, ibilgailuak kaletik kendu aurretik

Gaur martxan jarriko den zerbitzu hori baliatu ahal izateko, sisteman izena eman beharko da, Udalaren webgunearen bitartez

 

Gaur jarriko da martxan garabiak bide publikoan aparkatutako ibilgailuak bertatik kendu aurretik SMS bidez abisatzeko zerbitzua. Sistema horrek aukera ematen du mugikor-zenbaki bati alta emateko eta garabia titularraren ibilgailua eramatera doanean Udaltzaingoaren oharra jasotzeko SMS bidez.

Udal Administrazioaren eta Eraldaketa Digitalaren Sailak Herritarren Segurtasunaren Sailarekin elkarlanean garatu duen ekimen hori dela eta, ibilgailua dagoen lekutik kendu ahal izango du jabeak, udal garabiak eraman aurretik, egindako arau-hausteari dagokion isuna ordaintzetik salbuetsita geratuko ez bada ere.

“Gaur martxan jartzen dugun sistema berri honek teknologiaren potentziala aprobetxatzen du, udal zerbitzua hobetzeko. Arau-haustea gorabehera, gaizki aparkatutako ibilgailuak enbarazu egin ohi die beste pertsona batzuei. Bertatik lehenbailehen kentzea da gure helburua. Horregatik, SMSa bidaltzen dugularik, aukera bat emango dugu, ibilgailua lehenago kentzeko; digitalizazioa baliatuz, konponbide efizienteagoa aurkituko diogu arazoari, eta gertuagoko tratua emango erabiltzaileei”, adierazi du Udal Administrazioaren eta Eraldaketa Digitalaren zinegotzi Borja Rodríguezek.

Herritarren Segurtasunaren zinegotzi Marian Gutiérrezek, berriz, azpimarratu du 2019an udal-garabiak 3.821 ibilgailu kendu zituela kaletik, eta Agirrelandako ur-biltegira eraman. “Martxan jartzen dugun zerbitzu honekin, herritarrei eskaintzen diegun arreta hobetuko dugu, eta, bidenabar, udal baliabideak optimizatuko”.

Udalaren webgunearen bitartez izena eman beharko da zerbitzu horretan, esteka honetan

 

Gerora, tramitazio presentziala ere ezarriko da.

Poliziak eta garabiak prestutasunik handienarekin jokatuko dute beti ere, bizkortasunez, oztopatzea edo arau-haustea konpontzeko. Beraz, inolaz ere ez du itxoingo abisua jaso duen pertsona iritsi arte.

 

Share

‘Berriro elkartzearen poza’ aurkeztu du udal bandak

Zazpi kontzertu izango dira abonamendu-denboraldi berrian, irailetik maiatzera bitartean, Principal antzokian.

 

‘Berriro elkartzearen poza’ izenburupean, abonamendu-denboraldi berria aurkeztuko du Gasteizko Udal Musika Bandak —irailetik maiatzera bitartean izango da, Principal antzokian—.

Hezkuntza eta Kultura zinegotzi Estíbaliz Canto eta Udal Bandaren zuzendari Luis Orduña izan dira zikloa aurkezteko prentsaurrekoan. “Berriro biltzeko unea iritsi da. Musika zoragarriz inguratuko gara, bakarlari bikainak entzungo, zuzendari gonbidatuak lanean ikusiko, zoriontasunez bete gaitzan musikak”, adierazi du Cantok.

Orduñak nabarmendu duenez, “baikortasunak markatzen du 2020-21 denboraldi hau, baita poesiak, historiak, umoreak eta aldarrikapenak ere. Izan ere, uste dut garaia dela emakumeek musikan duten papera agerian jartzeko, eta, beraz, emakumezko orkestra-zuzendari bat izango dugu lehenengo aldiz, gonbidatua”. Ildo beretik, emakumezko musikagileen lanak eskainiko dira kontzertuetan, eta emakumeei protagonismoa emango.

Irailaren 30ean hasiko da ziklo berri horren egitaraua, zikloari izena eman dion ‘Berriro elkartzearen poza’ kontzertuarekin. Luis Gonzálezek parte hartuko du bertan, tronpeta-bakarlari gisa. Gainera, azaroaren 25ean, asteazkenez, ‘Haizea alde’ entzun ahal izango dute ikusleek, Isabel Rubioren zuzendaritzapean. Eta ‘Beethovenen Gasteiz’ izango da protagonista abenduaren 16an, asteazkenez, bandaren 2020ko programazioa itxiko duen kontzertuan.

Otsailaren 10ean, Marcel Ortegak zuzenduko du banda, ‘XXI zerumuga’ musika-emanaldian. Martxoaren 10ean, ‘Bizia koloretan’ emanaldia izango da, Victor de Andrés tronboi-bakarlari dela.

Ensemble Rayuela saxofoi-laukotea, berriz, gonbidatu gisa arituko da, apirilaren 21ean, ‘Globaliz-acción!’ kontzertuan, eta, denboraldiari bukaera emateko, maiatzaren 12an, ‘Optimismorako bidean’ emanaldian.

Bihar, irailak 8, jarriko dira salgai abonamenduak, 14 euroan, eta sarrera solteak, berriz, irailaren 22tik aurrera erosi ahal izango dira, 3 euroan, Principal antzokiaren ohiko salmenta-bideak baliatuz.

“Behar diren neurriak hartuko dira segurtasuna bermatzeko, bai artistena, bai emanaldietara joaten diren ikusleena”, azpimarratu du zinegotziak, eta orobat animatu ditu gasteiztarrak Udal Bandaren denboraldi berriko abonamendua erostera. “Aire freskoa iritsi da bandara. Ez ezazue galdu”.

 

Informazio gehiago: www.vitoria-gasteiz.org/banda

 

 

 

 

 

 

 

 

Share

Udalaren gizarte-zerbitzuek 32.965 pertsonari eman zieten arreta 2019an

 

Aurreko ekitaldiko oroitidazkia argitaratu du Gizarte Politiken, Adinekoen eta Haurren Sailak

 

32.965 pertsonari eman zien arreta Gizarte Politiken, Adinekoen eta Haurren Sailak 2019an, hau da, 2018an baino 883 pertsona gehiagori. Jon Armentiak zuzentzen duen sailak argitaratu berri duen oroitidazkian ageri da datu hori, kudeaketaren, eskarien eta Udalak emandako erantzunen inguruko datuen bilakaera jasotzen baita bertan.

2019ko abenduaren 31n, 14.986 familia-dosier zituzten aktibo Udalaren gizarte-zerbitzuek, aurreko ekitaldian baino % 5 gehiago. Dosier aktiboen % 58,8an erreferentziako pertsonak espainiar nazionalitatekoak ziren.

Problematika-motaren arabera, honela banatzen dira jarduerak: kasuen % 49,2an arazo ekonomiak ziren tarteko; % 28,3an, lan-munduan txertatzeko zailtasunak; % 24an, autonomia pertsonalaren mugak; % 17,7an, osasun-arazoak, eta % 16,9an, lan-munduan txertatzeko zailtasunak eta beste.

“Joan den urtean, autonomia pertsonalaren eta osasunaren inguruko arazoen gorakada antzeman genuen, eta, aldiz, behera egin zutela langabeziarekin eta bizikidetza-desorekekin zerikusia zutenak”, azaldu du Jon Armentia zinegotziak. Gainera, bere sailak garatutako hiru ildo estrategikoak nabarmendu ditu: “eskubideak eta bizi-kalitatea bermatzea; garapen komunitarioa eta aurre egin behar diegun erronka handiei ekiteko baliabideak, programak eta prestazioak hornitzea, eta herritarrentzat gertuko erreferentea izatea nahi dugun gizarte-zerbitzuak sendotzeko berrikuntza eta kalitatea”.

 Helburu horiek betetzeko eta dauden beharrei erantzuteko, Gizarte Politiken, Adinekoen eta Haurren Sailak 67,6 milioi euroko aurrekontua gauzatu zuen, hau da, Gasteizko Udalaren aurrekontu osoaren % 18,13.

 

 

Share

Bi gizonezko atxilotuta udaltzainei eraso egiteagatik

Udaltzaingoak autoritate-agenteen aurkako atentatu-delituaren ustezko egileak izateagatik bi pertsona atxilotu ditu asteburuan.

Larunbatean, 40 urteko gizonezko bat atxilotu zuten Jesusen Zerbitzarien kalean hura identifikatzen saiatu ziren udaltzainei eraso egiteagatik. Udaltzainak ostalaritza-establezimendu batera joan ziren lokaleko bezeroak arazoak sortzen ari zirela eta musukoak jantzita ez zituztela zioten salaketak jaso ostean.

Establezimendua hustu, arduraduna identifikatu eta gertatzen ari ziren arau-hausteak salatu ostean, gizonezkoak musukoa kendu eta udaltzainak iraindu zituen.  Hura identifikatzen saiatu zirenean, erresistentzia handia jarri eta poliziei eraso egin zien. Ondorioz, atxilotu eta polizia-etxera eraman zuten. Izapidetzeak egin ostean, aske utzi zuten agintaritza judizialaren aurrean agertzeko betebeharrarekin.

Ostiralean, udaltzainek 24 urteko gazte bat atxilotu zuten Adurtzako taberna bateko altzarietan kalteak eragiteagatik eta edalontziak hausteagatik. Udaltzainak iristerako, lokaletik alde eginda zegoen, baina gertuko kale batean topatu zuten handik gutxira. Identifikatzeko garaian, udaltzainei eraso egin zien; ondorioz, atxilotu eta polizia-etxera eraman zuten.

Sutea nekazaritzako pabilioi batean

Suhiltzaileek Aberasturi udalerriko nekazaritzako pabilioi batean piztu zen sua itzaltzeko lan egin behar izan zuten ostiralean. Kalte dezenteak jasan zituen pabilioiak.

 

Share

Aurrera doaz SmartEncity proiektuaren barruan Koroatzearen auzoan bero-sarea ezartzeko obrak, Eulogio Serdan kalean barrena

 

 

Gaurtik aurrera, Eulogio Serdan kalean barrena jarraituko du Koroatzearen auzoko SmartENcity proiektuko bero-sarearen hedapenak.  Giroa enpresa arduratuko da kanalizazio berria instalatzeaz, hilabete luze iraungo duten obrak direla medio. Zirkulazio-lerro bakarra izango da —alboko aparkalekuetako bat baliatuko da horretarako— eta 40 aparkaleku baino gehiago kenduko dira aldi batez, ahal den neurrian, pixkanaka, atzera zabalduko badira ere.

Astelehenean hasiko dira eremua hesiekin ixten, lanerako zona seguru bat prestatu eta inguratzen, bizilagunengandik bereizita gera dadin.

Bi aparkaleku-ilarak kenduko dira, lanek irauten duten bitartean trafikoa eten ez dadin, ezkerreko aparkalekuan barrena desbideratuko baita.

Hodien ‘ferraria’

Tarte horretan, sarearen bi hodi nagusiak instalatuko ditu enpresak, joaneko eta itzulerakoa, argot profesionalean mota horretako hodien ‘ferrari’tzat jotzen diren instalazioak. Hoditeria zurruna da, 12 metroko barretan; isolamendu termikoa dentsitate handiko PUR aparrezkoa, 0,027 W/mK-ko lamdarekin, hodiari eta inguratzaileari gogor atxikitzen zaiona, erresistentzia mekanikoa eta, aldi berean, galera termiko minimoak dituen material konposatua eratuz, eta ihesak antzemateko sistema bat du, +/- 1 m-eko zehaztasunarekin.

Bidegorria baliogabetu egingo da tarte horretan, bi noranzkoetan, harrapatzeko arriskua dela eta; 3,5 metroko arauzko espazioa baino ez baita geratuko, ibilgailuentzat.

Joan den uztailean hasi ziren Koroatzearen auzoan energia berriztagarria darabilen bero-sarea ezartzeko lanak, SmartEncity proiektuari atxikitako auzokoak ur beroz eta berokuntzaz hornitzeko. Aldabe gizarte-etxeko aparkalekuaren inguruan hasi zituen obrak instalazioa eraikitzeaz arduratzen ari den Giroa Veolia enpresak, bertan egongo baita galdara-gela, eta Eulogio Serdan pasabidean.

Obrek 12-14 hilabete irautea aurreikusten da. Une horretatik aurrera hasiko dira auzokoei zerbitzu ematen. Oraingoz, 28 bizilagun-komunitatek egin dute bat bero-sarearen proiektuarekin, Domingo Beltran de Otazu kaleko gimnasio batek, Eulogio Serdan kaleko Koroatzearen parrokiak eta Aldabeko gizarte-etxeak.

“Energia berriztagarria baliatzen duen bero-sareak etxebizitzak energetikoki birgaitzeko proiektua osatzen du. Proiektua oro har aukera paregabea da Koroatzeko auzokoen bizi-kalitatea hobetzeko, eta etxebizitzen energia-eskaria % 50 inguru murriztea lortzeko, dagoeneko eraberritu diren etxeetako emaitzek erakusten dutenez; horri esker, gainera, CO2 emisioak nabarmen gutxitzen dira. Gaur egun, eraikin gehienek ez dute isolamendurik ez fatxadetan ez estalietan, beraz, elementu horiek energetikoki birgaitzeak nabarmen hobetuko ditu etxebizitzen baldintza termikoak eta barruko erosotasuna”, azaldu du Lurraldearen eta Klimaren aldeko Ekintzaren zinegotzi Ana Oregik.

Koroatzearen auzoko bero-sareak energia termikoa (ur beroa) banatuko du bide publikoan barrena, sarera konektatzen diren etxebizitza eta eraikin pribatu guztiak ur bero sanitarioz eta berokuntzaz hornitzeko. Zehazki, ur beroa auzoko espaloietatik banatuko da, lurpetik doazen hodi aurreisolatuen bitartez, eraikin bakoitzaren hartuneraino.

Gasarekin bezala, hodi batek ur beroa igoko du eraikinean gora, etxebizitza bakoitzaren trukagailuetaraino, zeinek oraingo galdarak ordeztuko baitituzte. Energia termikoa (ur beroa) Aldabeko gizarte etxearen atzealdean jarritako galdara-gelan sortuko da. Auzoko galdara horrek biomasa erabiliko du erregai nagusitzat.

Udalak Europako sei herrialdetako beste 34 bazkiderekin batera hartzen du parte H2020 I+G+B europar programaren barruko “Hiri eta komunitate adimentsuak” proiektuan; Gasteiz ereduzko hiria da horretan, eta energia-eraginkortasunaren, garraioaren eta IKTen inguruko irtenbideak modu integratuan aplikatuko dira bertan. Proiektua 2016ko otsailaren 1ean abiarazi zen, eta bost urte eta erdi iraungo du.

Energia-eraginkortasunaren arloan, Gasteizko Udalak orain hasitako bero-sareak Visesa sozietate publikoa (Etxebizitza Sailburuordetza) eraikinetan egiten ari den birgaikuntza-lanen osagarri da.

Koroatze auzoaren birgaikuntza energetikorako proiektu hau izan zen Europar Batasunak aukeratutako lau proiektuetako bat —guztira 42 proiektu aurkeztu zituzten 100 hirik baino gehiagok—, eta biomasa baliatuko duen hiri-berokuntzako sistema bat instalatzea aurreikusten du.

Aldi berean, Gasteizko Udalak espazio publikoan esku hartuko du, beste 2 milioi jarrita. Auzokoek egindako partaidetza-prozesuan erabakitakoari jarraituz, obra hauek egingo dira: Aldabe kalea oinezkoentzat izango da zati batean, eta modernoagoa; Aldabe plaza egoteko eta elkartzeko lekua bihurtuko da, eta Ziudadela plaza, parterreak kenduta, oinezkoak igarotzeko errazagoa izango da. Inguruko argiztapena ere hobetuko da.

Hiriko bero-sarearen ezaugarriak

Koroatzeko Plan Berezian zedarritutako esparruan ezarriko da sarea: iparraldetik, Andre Maria Zuriaren Koroatzearen kaleraino eta Ziudadela plazaraino iritsiko da; ekialdetik, Arriagako ateraino eta Jesusen Zerbitzarien Fundatzailearen kaleraino; hegoaldetik, Badaia kaleraino eta Aldabe plazatxoraino; mendebaldetik, azkenik, Domingo Beltran de Otazu kaleraino. Era berean, bero-sarea alboko kaleetara hedatzeko aukera aurreikusten da.

Giroa enpresaren ordezkari Juanma Taracenak nabarmendu duenez, “azpiegitura honen onura nagusiak dira energia-kontsumoa gutxitzea, auzoko galdara eraginkorragoa erabiliz; atmosferara isuritako CO2 emisioak murriztea; energia berriztagarriak erabiltzea, eta erregai fosilak erabiltzeak dakarren kanpoko energiarekiko mendekotasuna ere apaltzea. Gainera, baliabide propioen balioa nabarmentzen da, Gasteiztik gertuko basoetako ustiapen jasangarrietatik datorren biomasa erabiliko baita”.

Galdara-gela Aldabeko gizarte etxean jarriko da. Biomasa eta gas naturaleko galdarek osatuko dute, eta biomasa gordetzeko silo bat ere izango da, gero beroa sortzeko.

Antzeko instalazioetan esperientzia duten teknikari kualifikatuak arduratuko dira galdara-gelaz, eta azken belaunaldiko kontrol-sistema bat baliatuko da zerbitzua bermatzeko.

Bestalde, birgaitutako eta sarera konektatutako etxebizitzen kalifikazio energetikoa hobetuko da. OHZren murrizketa eskatu ahalko dute horri esker. Etxebizitzen segurtasuna ere handituko da, kendu egingo baitira horietan lehendik dauden tximiniak.

Auzoko berokuntza-sistema zentralera konektatuta dagoen etxebizitza bakoitzari dagokion faktura egingo zaio, eta gutxienez kontzeptu finkoa edo eskuragarritasuna ordaindu beharko ditu, gehi erregistratutako kontsumoari dagokion kontzeptu aldakorra. Etxebizitza hutsik badago, kontzeptu finkoa edo eskuragarritasuna ordaindu beharko ditu, ez zati aldakorra, ur, argi edo gas gastuekin gertatu ohi den bezala.

Sistema berria auzoko etxebizitzetan orain dauden gainerako guztiak —gas naturaleko galdara zentrala, gas naturaleko banakako galdara, butanoko galdara, berogailu elektrikoak— baino merkeagoa izango da. Kontuan izan behar da, gainera, etxebizitzen jabeek ez dutela oraingo instalazioaren mantentze-gasturik ordaindu beharko, ezta etorkizunean berritzeko gasturik ere.

Share

Hamargarren urteurrena ospatuko du Jabetze Feministarako Eskolak, berdintasunerako kolektibo, erakunde eta elkarteen eginkizun eraldatzailea nabarmenduz

 

Gaur irekiko da epea, 77 jarduera —online, lehen lauhilekoan— eskainiko dituen eskolaren 10. edizioan izena emateko

 

Estatuan urratsak eman zituen lehen eskola feministetako bat da Jabetze Feministarako Eskola, eta hamar urte beteko ditu aurten, programazio sendoarekin, “desberdintasunetan arreta jartzen jarraitzeko akuilu, bereziki azken garaiotan, baita zenbait foro publikotan ere, erdi ezkutuan zenbaitetan, bortizki beste batzuetan, emakumeen eta LGTBI pertsonen eskubideen inguruan zalantzak erakutsi dituenik agertu den honetan. Hamar urte hauetan, Berdintasun Zerbitzuak ez du bakarrik egin bidea. Aldean izan ditu kolektibo feministek eta LGTBI-kolektiboak, emakume-elkarteak eta elkarte mistoek, eta hainbat gobernu-talde, zeinek proiektu horren iraunkortasuna bermatu baitute, ikuspegi feministatik”, azaldu dute Miren Fernández de Landa Berdintasun zinegotziak eta Mireia Espiau zerbitzuburuak, ikasturte berriko programazioaren aurkezpenean.

Hamar urte horietan, eskolak bilakaera handia izan du, 2011ko azaroan emakumeei zuzendutako ikastaro eta lantegietatik hasi —gizartean eragina izan zezaten— eta jardueren agenda oso bat edukitzeraino, zein ikuspegia zabaltzen joan baita errealitate gehiagotara. Duela bi urte #FeminismoMola eskola txikia ireki zen, eta hirian Emakumeen Etxea sortzen lagundu, aurrerapen nagusi gisa, besteak beste.

Gaur ireki du Gasteizko Jabetze Feministarako Eskolak izena emateko epea, irailetik maiatzera arteko programazioko 77 jardueretarako. Bi nobedade izango dira ikasturte honetan: feminismo dekolonialari buruzko Herri Handi hitzaldi-zikloa —mundu osoko ekintzaileek emango dituzte hitzaldiak—, eta feminismoari buruzko ikerketa-lanen lehiaketa, Euskal Herriko Unibertsitateko Gizon eta Emakumeen Berdintasunaren Masterrarekin —berdintasun-agenteak— elkarlanean.

Planetako beste latitude batzuetan sortutako diskurtso eta praktikak ekarriko ditu Gasteizera hitzaldi-zikloak.  ‘Herri txiki, infernu handi’ esaeran oinarrituta dago izenburua. Hori egia izan litekeelakoan, batez ere emakumeentzat eta sexu- eta genero-disidentzientzat, askatasunak aldarrikatzeko orduan ‘herri handiaren’ elkartasuna martxan jartzeko gonbita egingo dute hainbat hizlarik.

Bestalde, “gure eskolan ezagutza eta ikerketa feminista sustatzeko eta, horrela, udalerrian ahalduntze feminista lortzen laguntzeko helburuarekin jarri da abian ikerketa-lehiaketa. Aurkezten dituenarentzat interesgarri diren gaien ingurukoak izango dira ikerketa-proiektuak, eta ahalduntze feministaren esperientziak aztertu beharko dira, edota emakumeen eta LGTBI pertsonen eskubideen aldeko eraldaketa sozialari ekarpenak nola egin”, azaldu du zinegotziak. Eskolaren webgunean daude eskuragarri lehiaketaren oinarriak:  www.vitoria-gasteiz.org/eskolafeminista

Lehen lauhilekoan, jarduerak online izango dira, Covid-19aren komunitate-transmisioari aurre egitea helburu.

Jabetze Feministarako Eskolaren programa, 2020-2021 (pdf)

Share