Prentsa Oharren banner

Gomendioak, izotza eta muturreko tenperatura baxuak direla eta

Gasteizen egun hauetan izango den izotza eta tenperatura baxuak direla eta, Gasteizko Udalak aktibo mantenduko du Larrialdietarako Plana. Bidenabar, Udaleko Herritarren Segurtasunaren Sailaren eta Eusko Jaurlaritzako Larrialdietarako Zuzendaritzaren hainbat gomendio gogora ekarri nahi ditu, egoerari aurre egiteko.

Prebentzioko neurriak:

  • Ondo jantzita ibili, batez ere, kanpora irten behar baduzu. Bereziki, eskuak eta burua babestu; jantzi oinetako egokiak eta ahoa estali arnasa hartzean aire hotzegia ez arnasteko.
  • Erregaien erreserba hobetze aldera, ez berotu etxe osoa; hobe da gelak ixtea eta soilik behar den lekuetan jartzea berogailua.
  • Kontu izan berogailu lagungarri, sutontzi edo estufekin, ezustekoren bat gerta daiteke-eta.
  • Hirian, ahal izanez gero, ez paseatu leku ospeletan barrena, handiagoa baita izotza izateko arriskua, eta, batetik bestera joateko, ahal izanez gero erabili garraio publikoa.

Bidaiatzekotan:

  • Eskatu informazioa abiatu aurretik, jakiteko bideak nola dauden eta eguraldiak zer egingo duen.
  • Eguraldia benetan txar-txarra bada, hobe da bidaian ez ateratzea. Ahal dela, erabili garraio publikoa.
  • Alabaina, ezinbestekoa baduzu bidaiatzea, ziurtatu pneumatikoak, galgak eta izotz-kontrakoa ondo daudela, hartu kateak, erregai-tanga beteta eraman eta ez ahaztu berokiak. Ahal baduzu, eskuko telefonoa eraman beti; bereziki, bigarren mailako errepideetan gidatu behar baduzu.
  • Poliki ibili, izotz-plakarik balego adi beti, batez ere, laiotzean.
  • Aurreko autoari tarte handia lagata ibili, normalean uzten den tartea baino handiagoa.
  • Ez aldatu noranzkoa tupustean. Bolanteari gozotasunez eragin, eta martxa laburretan ibili.
  • Izoztuta dagoen zati batera sartzean, ez zapaldu galga, utzi ibilgailuari bere inertzia hutsez aurrera egiten.
  • Izotza edo elur gogorra topatuz gero jarri kateak, baita zirkulazioko agenteek agintzen dizutenean.
  • Irrati oso lagungarria izan daiteke, une oro ondo informatuta egoteko.

Ibilgailua geratzen bada:

  • Egon bertan, kotxe barruan.
  • Motorra piztuta eta berogailua jarrita eduki, eta berriztatu airea tarteka.
  • Saiatu loak ez hartzen. Tapakiren bat eskuratu, eta bero jantzita ibili.

Larrialdirik gertatuz gero, 092 edo 112 telefonora deitu.

 

Share

Atxilotua udaltzain bati eraso egiteagatik

Udaltzainek 57 urteko gizonezkoa atxilotu zuten agintaritza-agenteen aurkako atentatuaren ustezko delitua egiteagatik.

Gertakariak joan den astearteko 18:30 aldera izan ziren, 092ra egindako dei batek ohartarazi zuenean gizonezko bat, ziurrenik mozkortuta, Zurbanoko Atean zirkulatzen ari zela. Patruila batek Kontzeju kalean topatu zuen gizonezkoa, eta esku hartu zutenean, udaltzainei irain egin zien. Lehen alkoholemia-proba egin zuen, baina uko egin zion bigarrenari, eta udaltzainetako bati eraso egin zion, beraz, atxilotu egin behar izan zuten. Guardiako epaitegian zegozkien eginbideak egin ondoren aske utzi zuten.

Ebasketa

Asteartean 31 urteko gizonezko bat ere atxilotu zuten, ebasketa-delitu baten ustezko egilea izateagatik.

16:00ak baino pixka bat lehentxeago, patruila bat eskatu zuten Koordinazio Zentraletik Alaba Jeneralaren kaleko saltoki batera joan zedin; zenbait produktu hartu zituen, gizonezko bat atxikita baitzuten bertan. Ustezko lapurrak ez zuen ematen fidantza emango lukeen bizilekuaren berririk, beraz, atxilotu eta Agirrelandako bulegoetara eraman zuten eta atzo geratu zen epailearen esku.

Urtarrilaren 5etik, asteartetik, hamabost zirkulazio-istripu gertatu dira eta lau zauritu izan dira istripu horietan.

Sutea galdara-aretoan

Suhiltzaileek joan den asteartean esku hartu zuten Paula Montal kaleko eraikin bateko galdara-aretoan izandako sutea itzaltzeko. Suak alboko lokalari erasan zion. Urarekin itzali ondoren, erasandako lokalak aireztatu zituzten.

Izotzagatik hiriko puntu ugaritako galtzadetan gatza botatzeko lanetan ere jarraitu dute. Hiru esku-hartze izan dira bidea oztopatzen zuten adar eroriak edo erortzeko arriskuan ziren adarrak kentzeko, eta 56 esku-hartze, berriz, teilatu eta hegaletatik elurra erortzeko arriskuagatik.

Share