Prentsa oharrak

Gasteizko Udala herritarren mugikortasun ohiturei buruzko inkesta bat egiten ari da 2019ko 17ra arte. Ausaz hautatutako udalerriko etxeguneetara telefonoz deituz egiten ari da inkesta. Jasotzen den informazioa guztiz anonimoa da, eta helburu horietarako baino ez da erabiliko.

Ingurugiro Gaietarako Ikastegiak sustatutako ekimenaren helburua da eguneroko joan-etorrietako ohiturei buruzko informazioa jasotzea, ezarritako mugikortasun iraunkorreko neurriak ebaluatu eta hobetzearren. Emaitzak udalaren web-orrian argitaratuko dira, 2014ko mugikortasun inkestarenak bezala.

2007an landutako Mugikortasun Iraunkorraren eta Espazio Publikoaren Planaren garapenaren barruan sartzen da inkesta. Plana 2023ra arte garatzekoa da, eta horren baitako ekintzak herritarren mugikortasun ohituren ezagutza zehatzean oinarritzen dira; hori dela eta, aldian behin inkesta egiten da informazioa jasotzeko xedez. 2011n eta 2014an egin ziren aurreko inkestak; 2019an, berriz, eguneratzea egingo da.

Ikertalde enpresa arduratzen da telefono-elkarrizketak egiteaz. Gasteizko bizilagunekin harremanetan jartzen den pertsona behar bezala identifikatuko da. Gasteizko Udalak laguntza eskatzen die herritarrei, ahal duten neurrian inkestari erantzun diezaioten haien etxebizitza hautatuetako bat izanez gero.

Informazio gehiago nahi izanez gero, Ingurugiro Gaietarako Ikastegira jo daiteke, 945162696 telefonora deituz edo helbide elektroniko honetara idatziz:ceaadmin@vitoria-gasteiz.org

• Campusa, free-to-play bideojokoen alorrean munduan egiten den lehena, Nordic Game biltzarrean aurkeztu zen joan den astean; industria horren Europako ekitaldi nagusia Malmon (Suedia) egiten da, eta 2.000 profesional inguru bildu ohi ditu urtero
• Maiatzaren 31n amaituko da eskabideak aurkezteko epea Arabako hiriburuan uztailetik irailera bitartean egitekoa den bigarren edizioan parte hartzeko

F2P Campus Vitoria-Gasteiz free-to-play bideojokoak ardatz dituen munduko lehen campus-azeleratzaileak indarrez abiatu du bigarren edizioa: eskabideak aurkezteko epea amaitzeko astebete baino gutxiago falta delarik, hainbat herrialdetako taldeek adierazi dute parte hartzeko interesa. Zehazki, Letonia, Errusia, Malaysia, Ukraina, Italia eta Txinatik iritsi dira kontsultak, besteak beste. “Oraindik goiz da esateko zenbat hautagai izango dugun aurten, baina F2P Campusa sektorean gero eta ezagunagoa dela nabaritu dugu. Lehen edizioaren arrakastak, eta nazioarteko enbaxadoreek, hala nola 2018an Gasteizen izan ziren nazioarteko mentoreak eta parte hartu zuten taldeak, campusa ezagutarazten lagundu dute; izan ere,campusak badu bereizgarri handia, free-to-play bideojokoetan zentratzen baita, hau da, merkatuan hazteko potentzial handiena dutenetan”, azaldu dute ekitaldiaren zuzendarikide Jon Beltran de Heredia eta Raúl Herrerok.

Gasteizko Udalak, Eusko Jaurlaritzak eta Arabako Foru Aldundiak bultzatzen dute campusaren bigarren edizioa. Free-to-play bideojoko berriak sortzen ari diren 5 profesional-talde ekarriko ditu, gehienez, Arabako hiriburura. Free-to-play deritze horietan aritzeko ordaindu beharrik ez dagoen jokoei. Apirilaren hasieran aurkeztu zenetik, antolatzaileek zenbait ekintza eta ekitaldi sustatu dituzte bideojokoen alorreko estatuko zein atzerriko industriari F2P Campus Vitoria-Gasteiz ezagutarazteko, horietako azkena Malmon (Suedia) egindako Nordic Game biltzarrean, zeina sektoreko profesionalen topaketa nagusia baita Europan —2.000 parte-hartzailetik gora—.

Campusaren zuzendarikideek stand bat jarri zuten bertan, nazioarteko egutegian lekua egiten ari den hitzorduaren potentziala agerrarazteko. Bartzelonan ere egin zuten aurkezpen bat, bideojokoen industriaren gune nagusia baita penintsulan, eta estatuko zein nazioarteko hainbat hautagaik hartu zuten parte. “Kataluniako hiriburuko topaketan 2018ko edizioan izan zen taldeetako batek, Garage 51 izenekoak, hartu zuen parte, zeinak campusaren benetako potentziala azaldu baitzuen, eta nola lagundu genien beren lana sustatzen; Julian Serravi ere izan zen, bigarren edizioan esku hartuko duten mentore berrietako bat. Serravi espezialista ezaguna da bideojokoen diseinuaren alorreko prestakuntza eta tutoretzan”, zehaztu du Jon Beltrán de Herediak.

Maiatzaren 31n eskabideak aurkezteko epea amaitzen delarik,  5 profesional-talde hautatuko dira gehienez, uztailean Gasteizko campus azeleratzailean parte hartzerik izan dezaten; bideojokoak garatzeko beharrezko diren hainbat arlotan erreferente diren nazioarteko hogei mentorek baino gehiagok emango diete aholkularitza.

2019ko edizioaren berritasun nagusia jende guztiarentzat irekita egongo den F2P Campus Academy formatua izango da; izan ere, horren ildotik irailean zehar hainbat jarduera antolatuko dira gazteak bideojokoen sektorera sartzea sustatzeko eta gazte horiei erakusteko zeinen zabalak diren Espainian 713 milioi euro baino gehiago fakturatzen dituen industriak eskaintzen dituen aukerak. F2P Campus Academy-ren barruan hitzaldi irekiak egingo dira sektoreko adituen eskutik, eta eta beren lehen bideojokoa sortu nahi duten gazteei zuzenduriko tailer bat ere egingo da.

Abeslariak antzokia bete du jadanik eta gonbidapen guztiak agortu dira 

Ahalduntze Feministarako Eskolak gaur arratsaldean emango dio amaiera 2018-2019 ikasturteari, baita modu oso berezian egin ere: Rozalén kantautoreak kontzertu bat emango du Ibaiondoko gizarte-etxeko Félix Petite antzokian. Abeslariak antzokia bete du jadanik eta gonbidapen guztiak agortu dira.

Gorka Urtaran alkateak eskerrak eman nahi dizkie gaur arratsaldean hurreratuko diren pertsona guztiei “ikasturte zinez berezi honen itxierara etortzearren, bai eta urte guzti hauetan zehar eskolaren parte izan zaretenoi ere. Zuen interesak, zuen engaiamenduak lortu du gaur egun eskola erreferente izatea berdintasunaren aldeko prestakuntzari, sentsibilizazioari eta bistaratzeari dagokionean”. Horretaz gain, alkateak Berdintasun Zerbitzuaren lana ere eskertu du, bai eta “zerbitzuarekin besoz beso lan egin duten emakume-kolektibo guztiena ere. Zuen iradokizunak, interesak eta kritika eraikitzaileak beti izango dira ongi etorriak”.

Ahalduntze Feministarako Eskola jadanik sendotuta dagoen erreferentziazko zentroa da Gasteizen, eta hazten jarraitzen du. Ikasturte honetan 73 jarduera egin dira, aurrekoan baino 6 gehiago.

#FeminismoanItzel: txikien Eskola

Edizio honetan lehen aldiz, 10 eta 18 urte bitarteko haur eta gazteentzako jarduerak antolatu ditu Vitoria-Gasteizko Ahalduntze Feministarako Eskolak. Herritar batek iradoki zuen ekimena, “Mejorando Vitoria-Gasteiz Hobetuz” programa parte-hartzailearen bidez. Programa horretan, udal-aurrekontuaren zati bat zertan gastatu erabakitzeko aukera ematen zaie herritarrei.

Ikasturte honetan 130 adingabek eta familiak hartu dute parte, eta hasiera hau ikusita esan genezake etorkizun oparoa iragartzen diogula jarduera-ildo honi. 

Gainera, Eskolak espazio berria izan du eskura: Etxanobe jauregia. Bertan egin dira jarduera gehienak eta, laster, Sorginenea-Emakumeen Etxea proiektuarekin partekatuko du gune hori.

Ikasturte honetako beste berrikuntza bat izen-aldaketa izan da; orain Ahalduntze Feministarako Eskola du izena, zerbitzuaren udal politikek duten ikuspegia azpimarratze aldera.

Eskolaren helburua transbertsaltasuna eta aniztasuna lantzea da ahalik eta ikuspuntu gehienetatik, pertsona ororen identitateak ulertu eta konprenituz eta horrek dakartzan desparekotasunak identifikatuz; intersekzionaltasuna analisi-tresnatzat hartzea sarri gure gizartean nagusi den homogeneizaziotik urruntzeko.

Hori dela eta, kolektibo zehatzekin egin da lan: buruko gaixotasunak dituzten emakumeak, desgaitasun intelektualak dituzten emakumeak, desgaitasun funtzionalak dituzten emakumeak, lgtbi gaiak, emakume musulmanak eta emakume ijitoak.

Eskolaren indarguneetako bat da Gasteizko gizarte-kolektiboekin eta mugimendu feministarekin lanean eta lankidetzan jorratzen duela proiektua, hain zuzen ere, 20 bat kolektibo eta elkarterekin.

Eskolak hirian duen eragina handitzen jarraitzen du, Eskolaren eskaintzan urtez urte parte hartzen duen publiko fidela sendotu baita, eta bada parte-hartzaile berririk ere.