Prentsa Oharren banner

Bost atxilotu asteburuan

Udaltzainek asteburuan 23 urteko gazte bat eta 17ko adingabe bat atxilotu zituzten lesio larrien, indarkeriazko lapurretaren eta agenteen aurkako atentatuaren ustezko delituen egile gisa.

Goizaldeko hiru eta erdiak inguruan gertatu zen, 092ra egindako dei batek Pablo Picasso kalean emakume bati eraso egin zitzaiola jakinarazi zuenean. Patruila batek topatu zuen biktima, aurpegia odolduta zuela. Hatz bateko falangea ere falta zuen, hozkada baten ondorioz. Biktimak azaldu zuenez, gizonezko batek eta emakumezko batek eraso egin zioten. Biak ezagutzen zituen eta han inguruko etxe batean bizi ziren.

Udaltzainek pertsona horien etxera sartzea lortu zutenean, gizonezkoak ostikoka hartu zituen eta emakumeak haietako baten aurka egin zuen, beraz, atxilotu egin zituzten. Pisu barruan eraso egindako emakumearen mugikorra topatu zuten.

Gizonezkoa atzo geratu zen epailearen esku, eta horrez gain, gertakarien lekukoek emandako adierazpenen harira, genero-indarkeriaren arloko lesioengatik ere ikerketapean dago.

Beste hiru atxilotu

Udaltzainek ostiralean 48, 26 eta 38 urteko hiru gizonezko atxilotu zituzten delitu ugarigatik.

Haietako lehenengoa Serafin Ajuria kaleko taberna baten kanpoaldean atxilotu zuten, alkoholdun edariak ari baitzen zerbitzatzen plastikozko edalontzietan. Pertsona horrek behin eta berriz uko egin zion identifikatzeari eta desobedientzia larriagatik atxilotzera zihoazenean, erresistentzia agertu eta agenteen aurka egin zuen.

Handik ordu batzuetara 26 urteko beste gizonezko bat atxilotu zuten. Gertakariak 18:30 aldera jazo ziren, Koordinazio Zentralak patruila bat eskatu zuenean Lakua auzoko merkataritza-establezimenduan bertaratzeko. Bertan, zenbait artikulu ebasteagatik inplikatutako hiru gizonezko zituzten atxikita. Haietako batek motxila-termo bat erabili zuen produktuak ezkutatzeko eta alarmak jo ez zezan.

Ebasketa non egin zuten ikertzeko agenteak zegozkien kudeaketak egiten ari zirenean, gizonezkoa zirkulazio-erreira joan eta bi ibilgailuren gainera joan zen. Ibilgailuek bat-batean geratu behar izan zuten, eta arriskua eragin zuen gizonezkoaren nahiz gidarien osotasunerako. Bidetik ateratzen saiatu zirenean, erresistentzia erakutsi zuen eta, beraz, azkenean atxilotu egin zuten.

Handik ordu erdira, Udaltzaingoak Olarizu etorbideko establezimendu komertzial batean arazoak sortzen ari zen 38 urteko gizonezkoa atxilotu zuen. Kanpora atera zutenean, gizonezkoak erresistentzia agertu zuen eta ez zituen aginduak bete, beraz, atxilotu egin zuten.

Covid-19 salaketak

Asteburuan, Udaltzainek 94 isun-proposamen egin ditu Covid aurkako neurriak ez betetzeagatik. Haietako 9 lonjetan, txokoetan eta lokaletan jarduera egiteagatik izan dira, ez baitago baimenduta. Horixe da Arana auzoko gazte-lonja baten kasua, igande goizaldeko 01:30ean adingabekoak baitzeuden bertan. Udaltzainek 9 adingabeko eraman zituzten Agirrelandara gurasoei jakinarazteko eta haien esku uzteko.

Gainerako isunak hauek izan ziren: 34 bilera batean baimendutako pertsonen gehieneko kopurua gainditzeagatik; 17 etxeratze-agindua ez betetzeagatik; 29 musukorik ez eramateagatik edo gaizki erabiltzeagatik; 4 bide publikoan alkohola kontsumitzeagatik, eta 1 beste arrazoi bategatik.

 

Share

Gasteizek erabiltzen ez diren 65 merkataritza-lokal eskainiko ditu alokairu-baldintza berezietan, tokiko merkataritzari laguntzeko

  • Horietako 20 Hirigune Historikoan daude, 22 Salburuan eta 23 Zabalganean
  • Onetsitako deialdia  ALHAOn argitaratzen denetik 30 eguneko epea emango da eskabideak aurkezteko

 

21 Zabalgunea sozietateak 65 merkataritza-lokal eskainiko ditu alokairu-baldintza berezietan, erosteko eskubidearekin, orain erabiltzen ez diren leku horiek biziberritzen laguntzeko.

Alkateak duela urte erdi iragarri zuenaren ildotik, gaur abiatu da tokiko merkataritza ezartzen laguntzeko programa: horren bidez,  merkataritza- eta zerbitzu-jarduera berriak martxan jarri nahi dituzten ekintzaileei aretoak eskainiko zaizkie alokairuan erosteko eskubidearekin (20 Hirigune Historikoan, 22 Salburuan eta 23 Zabalganean), arrisku ekonomikoa gutxitzea ahalbidetuko dien sistema batez, eta enpresa-proiektuaren hasieran negozioaren bideragarritasuna neurri handiagoan bermatuz.

“21 Zabalguneak birgaitzeko eta gizartea eta ekonomia biziberritzeko agentzia gisa sendotzeko asmoa du. Ekimen honen bitartez, orain erabilerarik ez duten aretoak eskainiko ditugu Hirigune Historikoan eta auzo berrietan, tokiko merkataritzaren sarea zabaltzen laguntzeko. Hartara, bi helburu lortuko ditugu: tokiko ekintzaileei aukerak ematea eta orain jarduerarik ez duten espazioak berraktibatzea“, azaldu du 21 Zabalgunearen lehendakari Ana Oregik.

Zehazki, aretoak gehienez zazpi urtez alokatzeko aukera emango da, eta errentak lokalaren balioaren % 3tik (lehen urtean) gehienez % 5era (bosgarren urtean) artekoak izango dira; gainera, aretoa guztiz egokitu beharra bada errenta-hobaria izango da. Aretoa egokitzeko eta jarduera martxan jartzeko egin beharreko gastu handia berdinduko da hartara.

Zazpi urteko epea amaitu ondoren, jardueraren titularra den ekintzaileak aretoa utzi edo jabetzan erosteko aukera izango du. Salmenta-prezioan ere hobaria ezarriko da tasazio ofizialaren ehuneko zehatz baten arabera, dagoeneko ordaindu diren errenten zati bat kenduta.

Gaur onetsi dira oinarriak, eta deialdia ALHAOn argitaratzen denetik hasita 30 eguneko epea izango da alokairuez baliatzeko eskabideak aurkezteko. 21 Zabalguneko teknikariek balioetsiko dituzte proposamenak, eta eskabidean lehenetsi den lokal mota, enpresaren tamaina eta hautaketa prozesuan eskuratutako puntuazioa kontuan izanik esleituko dira lokalak.

Balioespena gainditu baina areto erabilgarririk ez dagoelako lokala lortzerik izan ez dutenak itxarote-zerrenda batean sartuko dira.

Halaber, 21 Zabalguneak 9 lokal erreserbatu ditu. Erdi Aroko hiriguneko enpresa-zentrora bideratuko dira.

 

Share

Erabiltzen ez zen lursail berreskuratu bat saldu du 21 Zabalguneak, 2,2 milioi euroan, eta beste bat salgai jarri, Larreinen

Bestalde, Aretxabaleta-Gardelegiko 4 lursail jarriko ditu salgai udal sozietateak.

 

13 sektoreko (Larrein) RC-11 lursaila 2,2 milioi euroan Najera Novoa enpresari saltzea onetsi du gaur 21 Zabalgunea sozietatearen kontseiluak. Bi etxebizitza-dorre egongo dira lursail horretan;  guztira, babes ofizialeko 80 etxebizitza izango dira —76 hiru logelakoak eta 4 bi logelakoak—.  Horrez gain, Larreineko beste lursail bat salgai jartzea ere erabaki du kontseiluak, 2,1 milioi euroko prezioan.

Irailean iragarritako akordioaren parte dira bi lursail horiek; Larrein eta Aretxabaleta-Gardelegin hamaika lursail berreskuratu zituen Udalak horri esker, babes ofizialeko etxebizitzak egiteko. Izan ere, geldirik egon dira azken hamarkadan.

PNV, PSE-EE, PP eta Elkarrekin taldeek lortutako akordio hark 24 milioi eurotik gorako irabaziak ekarriko dizkio udal sozietateari, 13. eta 19. sektoreetako lursailak lehiaketa publikoaren bidez saltzen direlarik. Elkarrekin taldeak proposatuta, eta udal gobernuaren eta PP taldearen babesa tarteko, lursailen salmentatik lortzen den dirua hiriko auzoen biziberritzea sustatzeko erabiliko da.

21 Zabalguneko zerbitzu teknikoek bere garaian azaldu zutenez, akordioak urte askotan ezin konpondu izan den arazo bat desblokeatzen du. Aurkeztutako eskaintzak onuragarriak dira 21 Zabalgunearentzat, formula horren bidez lursailen jabetza udal sozietatearen eskuetara itzultzen delako eta sozietateak aukera duelako horiek esleitzeko beste prozesu batzuk egiteko.

 

Lau lursail salgai, Aretxabaleta-Gardelegin

Bestalde, Aretxabaleta-Gardelegiko lau lursail salgai jartzea erabaki du 21 Zabalguneak —deialdi publikoaren bitartez—. 150.000 eurotik 174.600 eurora artekoak izango dira hasierako prezioak, bakoitzaren aprobetxamendu urbanistikoaren arabera.

 

Share