Prentsa Oharren banner
Kategoriak: Deialdiak  —  Komunikazio Zerbitzua / Servicio de Comunicación  —  29 urtarrila 2019 17:00

Prentsaurrekoa. Euskadi-Israel kultur elkarteak Vitoria-Gasteiz hiriari eskertzeko antolatu duen jarduera programa aurkeztea

Parte hartzaileak. Enpleguaren eta Garapen Ekonomiko Iraunkorraren zinegotzi Nerea Melgosa; eta Euskadi-Israel kultur elkarteko presidente Laurence Franks

Eguna. Asteazkena, urtarrilak 30

Ordua. 10:00

Tokia. Udaletxeko prentsa aretoa

————————————–

Prentsaurrekoa. AuzoEszena programa aurkeztea

Parte hartzaileak. Kultura, Hezkuntza eta Kirol zinegotzi Estibaliz Canto

Eguna. Asteazkena, urtarrilak 30

Ordua. 10:30

Tokia. Udaletxeko prentsa aretoa

———————————-

Bisita eskola-enpresen azokara

Parte hartzaileak. Enpleguaren eta Garapen Ekonomiko Iraunkorraren zinegotzi Nerea Melgosa; Arabako ahaldun nagusiorde Pilar Garcia de Salazar; BIC Arabako zuzendari David Montero; eta Vital Fundaziko zuzendari Josune Albizu

Eguna. Asteazkena, urtarrilak 30

Ordua. 10:30

Tokia. Andre Maria Zuriaren plaza

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   14:30

 

 

 

Urteko lehen jaialdiak ikusmin handia sortu du, Gasteizko Ogeta pilotalekuaren inaugurazioaren 40. urteurrenarekin bat egiten baitu

 

Zale arabarrek binakako txapelketaz gozatu ahalko dute Gasteizen egiten den pilota profesionaleko lehen jaialdian. Luxuzko egitaraua izango da, txapelketan jarraitzeko irabazi beharra duten bi bikotek hartuko baitute parte. Olaizola II.a eta Albisu —zazpigarren garaipena lortu dute jada— eta Artola eta Mariezkurrena II.a gazteak lehiatuko dira; gazte segail hori dugu profesionalen taldeko azken aurkikuntza, frontoian erakusten dituen dohainak direla eta.

Azken bikoteak besteak baino garaipen bat gutxiago lortu du, eta dena emango du hurrengo aldian onenen artean izateko. Aspeko Inaxio Errandoneak dioen bezala, “lau pilotariak saiatuko dira ondo jokatzen eta finalerdietarako puntuak lortzen”. Beraz, partida erabakigarria izango da, eta egitaraua oso erakargarria; enpresaren ordezkariaren ustez, “hiru partidak oso onak dira; azkena promoziokoa da, eta Dario aurrelari errioxarra nabarmentzen da, inguruan oso maitea baita”.

Gainera, jaialdia data historikoa baten inguruan egingo da. Izan ere, duela 40 urteko otsailaren 9an egin zen “Ogetan inauguratzeko partida”, Kultura, Hezkuntza eta Kirol zinegotzi Estíbaliz Cantok nabarmendu duenez. Hain zuzen ere, Ogetak —euskal pilotaren handietako bat— eta Arriaran II.ak osatutako bikotea Atano X.a eta Esparzaren kontra aritu ziren orduko hartan. Egun seinalatua izan zen gaur egun ere Euskal Herrian enblematikoa den instalazio batentzat: hirugarren frontoi handiena da, eta leku gehien duena. 40. urteurrenaren urtean, gainera, “bere historiako eraberritzerik handiena ezagutuko du, segurtasun eta ebakuazio arrazoiak direla eta gainerakoei egokituko baitzaie”; “aurten bertan” abiatuko dira eraberritzeko lanak, Andre Maria Zuriaren txapelketaren aurretik edo ondoren. “Edonola ere”, esan du Cantok, “txapelketa eta urte osoko jarduera bermatuta egotea nahi dugu, baita lanak egiten diren bitartean ere, mugak muga”.

Bihar, hilak 30, jarriko dira sarrerak salgai, 11:00etatik aurrera, partidaren bezperara arte; aurretiazko salmentan 15 eta 30 euro balioko dute, eta 5 euro gehiago leihatilan.

Euskal Pilotako Arabako Federazioko lehendakari Iker Geretak ohartarazi du “egun horretan eta hobekuntzak irauten duen urtean pilotalekuaren edukiera mugatuta” egongo dela “segurtasunagatik eta autobabes-planarekiko koherentziagatik”, baina nabarmendu nahi izan du “zinegotzia eta Udala ahaleginak egiten ari” direla “obrak irauten duen bitartean jarduerari eutsi ahal izateko”.

Izan ere, baimendutako edukiera txikitu egin da. Hasieran 2.100 leku zeuden; duela urte batzuk, 1.800 izatera igaro zen, eta lanen aurretik zein lanak egiten diren bitartean aplikatzen den araudiari jarraituz, 1.200 leku egongo dira: 250 errebote eta harmailetan, eta 933 kantxan.

Esan bezala, 1979ko otsailaren 9an inauguratu zen pilotalekua, eta urte hartako uztailean jarri zioten Ogeta izena. Bada, 40. urteurrenean, 2019an, partida handien arteko batekin emango zaio hasiera pilota profesionalaren denboraldiari, hiru partida bikain biltzen baititu egitarauak.

 

Share
Kategoriak: Udaltzaingoaren eta suhiltzaileen jakinarazpenak  —  Etiketak:   —  Komunikazio Zerbitzua / Servicio de Comunicación  —   12:06

Atzo hiru txirrindulari zauritu ziren hirian gertatutako trafiko-istripu desberdinetan.

Lehena goizeko zortziak jota gertatu zen, auto batek 15 urteko txirrindulari bat harrapatu baitzuen Santa Maria Josefa kalean oinezkoen pasabide batean, Mediterraneo hiribidearekin duen bidegurutzean. Adingabea anbulantzia batek eraman zuen Txagorritxu Ospitalera.

Argiketa-talde bat Gaztelako Atea kalean gertatutako beste istripu baten nondik norakoak ikertzen ari da; istripu horretan, bizikleta batean zihoan 44 urteko emakume bat zaurituta geratu zen. Osasun-langileek artatu zuten bertan, baina ez zen beharrezkoa izan ospitale batera eramatea.

20 urteko beste txirrindulari bat ere zaurituta geratu zen auto batekin izandako istripu batean, Teodoro Dublang Margolariaren kalean. Argiketa-talde bat istripu horren nondik norakoak ikertzen ari da. Gaztea anbulantzia batek eraman zuen Santiago Ospitalera.

Istripu anizkoitza

Atzo, goizeko zortzietan, istripu bat gertatu zen Artapadura kalean hiru ibilgailuren artean. Ibilgailu horietako batean zihoan 47 urteko emakume gidaria eta beste batean zihoan 39 urteko bidaiari bat zauritu ziren. Bertaraino joandako larrialdi-zerbitzuek artatu zituzten, baina ez zen beharrezkoa izan ospitalera eramatea.

Udaltzainek beste 19 trafiko-istriputan esku hartu zuten atzo, nahiz ez zen inor zauritu eta ez zen inor ikertu bide-segurtasunaren aurkako delituak egiteagatik. Horrez gain, 23 salaketa izapidetu eta polizia judizialaren 13 jarduera egin zituzten.

Kutxatila batek su hartu du

Puerto Rico kaleko kutxatila elektriko batean piztutako sute batek argirik gabe utzi zituen atzo inguru horretako zenbait etxebizitza eta denda. Suhiltzaileak bertara joan ziren, eta ikusi zuten zenbait kable erreta zeudela. Iberdrolak bere gain hartu zuen ezbeharra.

Haizearen ondorioz ere suhiltzaileek zenbait esku-hartze egin behar izan zituzten, eta suhiltzaile-talde bat Otxandiora joan zen, tximini batean piztutako sutea itzaltzera. Azkenik, Bizkaiko suhiltzaileek beren gain hartu zituzten itzalketa-lanak.

Share
Kategoriak: Prentsa oharrak  —  Komunikazio Zerbitzua / Servicio de Comunicación  —   11:18

35 gazte eta helduentzat izango dira, eta 37 familia eta umeentzat; horietako 42 euskaraz, 30 gaztelaniaz eta bat elebitan izango dira.

 

 

 

Liburutegien otsaila-maiatza arteko jarduera-programa abian da. Programaren helburua da herritarrak Udal Liburutegien Sareak dituen espazio eta zerbitzuetara hurbilaraztea eta irakurtzeko ohitura hartu eta sendotzen laguntzeko tresna dinamizatzailea izatea, eta aurten irakurtzeko zaletasuna zabaltzeko 72 jarduera eskainiko ditu.

Kultura, Hezkuntza eta Kirol zinegotzi Estíbaliz Cantok aurkeztu du gaur prentsaren aurrean. Haren hitzetan, helburua ez da bakarrik “irakurketaren alderdi ludiko eta atsegina sustatzea, baizik eta gurasoak inplikatzea seme-alabei ikasten eta irakurtzeko ohitura hartzen lagundu diezaieten, eta gazteak eta helduak jardueretan parte hartzera ohitzea”.

Programak otsaila, martxoa, apirila eta maiatza hartzen ditu barne, eta gizarte etxeetako liburutegietan haur, familia, gazte eta helduentzat eskainiko diren jarduerak biltzen ditu. Guztira, 72 jarduera izango dira: 35 gazte eta helduentzat, eta 37 familia eta umeentzat. 42 euskaraz, 30 gaztelaniaz eta bat elebitan (euskaraz eta ingelesez).

Haur eta familientzako jardueren artean ipuin-kontalariak, antzerkia, txotxongiloak, musika, tailerrak eta abar izango dira, hainbat alderdi lantzeko: aniztasuna eta desberdinekiko sentiberatasuna, jolasa, musika, zientzia, olerkigintza, genero berdintasuna, jakin-mina eta irudimena.

Gazte eta helduentzako jardueren artean tailerrak, ipuin-kontalariak eta antzerkia antolatu dira, bai eta idazleekiko topaketak, bakarrizketak eta errezitaldiak ere.

Azpimarratzekoak dira otsailaren 18tik apirilaren 23ra (liburuaren eguna) Twitter bidez antolatuko den gazteentzako nanoipuinen lehiaketa eta “Irakurri, Gozatu eta Oparitu” kanpainaren hirugarren edizioa. Kanpaina horren helburua kultura sustatzea da, irakurketa oro har eta euskarazkoa bereziki hauspotuz, bai eta herritarren aisialdia aberastea ere.

Gainera, Patxi Zubizarretak koordinatzen duen “Idazleekin solasean” programak Harkaitz Cano eta Arantxa Urretabizkaiaren bisitak jasoko ditu, eta topaketak antolatuko dira Amaia Olasolo, Álavaro Arbina eta Mamen Moreu idazleekin. Horrez gain, Manuel Iradier Elkarte Afrikanistakoek “Emakume oinutsa” aurkeztuko digute, eta beste hainbat jarduera ere egongo dira eskura: antzerkia, errezitaldiak, olerkigintza, tailerrak, irakurleen klubak etab. Irakurle kluben artean, aipatzekoa da LHko 1. eta 2. mailetako haurrei zuzenduriko “Familiartean irakurri” ekimenaren bigarren edizioa.

20190129 Haur eta familientzako

20190129 GAZTE ETA HELDUAK 2019

 

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   10:15

Gasteizko Udalak Enpresak Sendotzeko Programaren beste edizio bat jarri du abian, enpresa sortu berrien iraupena luzatzeko xedez. Horretarako, prestakuntza praktikoa eskainiko die ekintzaileei, lau mintegi monografikoren bidez, baita banakako aholkularitzako ordu-multzo bat ere. Parte hartzen duten enpresei hausnarketa estrategikoa egiteko aukera eman nahi zaie, eta metodologia arrakastatsua aplikatuz negozioaren kudeaketan aurrera egiten laguntzea.

Hasteko, enpresaren kudeaketa mailaren aurretiko diagnostikoa egingo da, eta horren ondoren, otsailetik apirilera bitartean antolatu diren mintegi eta prestakuntza-lantegietan hartu ahalko dute parte:

 

  • Hurbilketa (otsailak 12, 9:00 – 14:00).  Kalitatearen kontzeptuaren eboluzioa aztertuko da mintegi horretan. Estrategia zer den eta enpresa baten barruan nola garatu daitekeen ere landuko da.
  • Antolakuntza (otsailak 5, 9:00 – 14:00). Analisi estrategikoa izango da abiapuntua. Negozio ereduak, balio proposamena, arrakasta faktoreak eta beste aztertuko dira. Eragileak eta mugatzaileak, AMIA eta AMIA gurutzatua ere sartzen dira programan.
  • Garapena (martxoak 26, 9:00 – 14:00). Estrategia definitu eta formulatuko da. Xedea, ikuspegia, balioak, konpetentziak, GAP azterketa eta visioning estrategikoa aipatuko dira.
  • Ezarpena eta ebaluazioa (apirilak 16, 9:00 – 14:00). Azken mintegian, hedatzea, ezarpena, ekintza plana, neurketa eta segimendua landuko dira.  Aginte koadro integralaren tresna ere aurkeztuko da.

Prestakuntza fasearen ondoren, hirugarren fasean, aholkularitza pertsonalizatua, tutoretzak eta tresnen ezarpena eskainiko dira. 10 ordu inguru izango dira, otsailaren eta maiatzaren artean. Azkenik, programaren bukaerako diagnostikoa eta ebaluazioa egingo dira.

“Hala beren jarduera sendotu nahi duten enpresei nola merkatu berriak bilatuz edo lehiakortasuna hobetuz hazteko asmoa duten enpresei zuzentzen zaie programa. Izan ere, behin abian jarrita, sustraitzea eta haztea dira enpresak aurre egin beharreko bi erronka nagusiak. Enpresak Sendotzeko Programa hau oinarri ona da bi erronka horiei erantzuteko”, adierazi du Enpleguaren eta Garapen Ekonomiko Iraunkorraren zinegotzi Nerea Melgosak.

Europako Gizarte Funtsaren finantzaketa du Enpresak Sendotzeko Programak; Erdi Aroko hiriguneko udal enpresa-zentroan egingo da, eta izen ematea doakoa da.

+Informazio gehiago: Enpresak Sendotzeko Programa

 

 

Share
Kategoriak: Prentsa oharrak  —  Etiketak: ,   —  Komunikazio Zerbitzua / Servicio de Comunicación  —   10:07

Ataria guneak “Saguzarrak, gauaren aliatuak” erakusketa inauguratuko du astearte honetan, urtarrilaren 29an. Bilduma horrek Saguzarrak Kontserbatu eta Ikertzeko Espainiako Elkarteko kide diren Juan Tomás Alcalde, Iñaki Martínez eta José Manuel Castrilloren argazkiak biltzen ditu.

Martxoaren 3ra arte ikusgai egongo den bilduma hori baliabide didaktikoa da; izan ere, Saguzarrak zaintzeko garrantzitsua da haien biologia eta ekologiarekin lotutako alderdiak ezagutaraztea, baita natur ekosistemetan eta nekazaritzan izan dezaketen onuraren berri izatea ere.

Erakusketa honen bidez, autoreek hainbat erakusgai ekarri dizkigute Ataria 31 gunera, besteak beste, 31 argazki, batzuk formatu handikoak, eta metro bat garai den egurrezko saguzar formako tailu bat; kiropteroen onurak ezagutarazi eta mito faltsuak uxatzeko baliabide didaktiko berria eskaintzea da asmoa. Argazki, bideo eta soinuen bitartez, saguzarrak ikusi eta entzuteko aukera izango da, espezie desberdinak alderatu, aparteko moldaerak miretsi, eta kontserbatzeko beharraz ohartu.

Iberiar penintsulako kiropteroei buruzko erakusketa grafikoa da, haien biologia, dibertsitatea, babeslekuak eta zaintzeko neurriak bereziki azpimarratzen dituena. Irudi, bideo, soinu eta beste elementu batzuen bidez, ugaztun harrigarri horiek jendearengana hurbiltzea da helburua, ezezagunak baitira orokorrean, eta gaizki ulertuak askotan.

Saguzarrena oso animalia talde ugaria da, 1.000 espezie inguru daude mundu osoan zehar barreiatuta. Hala ere, badaude saguzar guztiek dituzten ezaugarri komunak, besteak beste, gautarrak dira, hegalariak, isilak, orientatzeko aukera eman dien ekolokazio sistema bat dute, babesleku helezinetan bizi dira, etab.

Gasteizko Udala ohartu da antzina-antzinatik ostrazismora kondenatuta egotearen ondorioz, espezie horiek kontserbazio-egoera kezkagarrian daudela eta, horregatik, hainbat proiektu lantzen hasi da ahanztura hori iraultzeko.

Hala, bi proiektu jorratu ditu, saguzarren populazioa handitzeko eta espezie horri loturiko balioak hedatzeko. Eraztun Berdearen eta Biodibertsitatearen Atalak, lehenik, Gasteizko Goi Mendietako kontserbazio-eremu bereziko mehatxatutako espezieak kontserbatzeko proiektua proposatu zuen eta, geroago, Lautadako harizti-irlen biodibertsitatea hobetzekoa jarri du martxan. Azken horren helburua udalerrian dauden lau harizti-irlen biodibertsitatea hobeto ezagutu eta sustatzea da.

Bien ala bien xedea hariztien eta saguzarren kontserbazio-egoera hobetzea da, eta Eusko Jaurlaritzaren finantzaketa izan dute.

Kiroptero espezieen egoera hobetzeko egin diren ekintzen artean aipagarriak dira zuhaitz-guneetan saguzarrak finkatzeko babes-kutxak instalatzeko proiektua eta arriskupean dagoen ugaztun talde horren egoera hobeto ezagutzeko ikerketak. Guztira, 15 espezieren presentzia antzeman da, eta kopuru handia da hori, kontserbazio-eremu bereziak animalia horientzat duen garrantzia nabarmentzen duena. Gainera, antzemandako espezietatik lau arriskuan dauden espezieak dira, Mehatxatutako Espezieen EAEko Katalogoaren arabera, eta saguzar bibotedunaren ugalketaren berri izan da. Nabarmentzekoa da saguzar biboteduna ugaltzen den Euskal Herriko bigarren lekua dugula kontserbazio-eremu berezia.

 

Share