Prentsa Oharren banner

Prentsa-deialdiak (2020-12-03)

Prentsaurrekoa. Familia zaintzaileentzako MAITEKI laguntza-programa aurkeztea

Parte hartzaileak. Gizarte Politikak, Adinekoak eta Haurrak Arloko zinegotzi Jon Armentia

Eguna. Osteguna, abenduak 3

Ordua. 10:30

Tokia. Udaletxeko prentsa aretoa

————————————-

Prentsaurrekoa. Umbra Light Festival jaialdiaren bigarren edizioa bultzatzeko Gasteizko Udalaren, Arabako Foru Aldundiaren eta Eusko Jaurlaritzaren elkarlana

Parte hartzaileak. Alkateorde eta Ekonomia Sustapen, Enplegu, Merkataritza eta Turismo zinegotzi Maider Etxebarria; Enpleguaren Sustapen, Merkataritza eta Turismo foru diputatu Cristina González; Kontsumo, Merkataritza eta Turismo sailburu Javier Hurtado; eta Carlos Torrijos eta Joaquín Pérez-Goicoechea Argia Kultur Elkarteko ordezkariak

Eguna. Osteguna, abenduak 3

Ordua. 11:00

Tokia. Foru jauregiko prentsa aretoa

————————————-

Prentsaurrekoa. “Yo me comprometo. Har eta egin on” kanpaina aurkeztea

Parte hartzaileak. Ingurumen Kudeaketa eta Plangintza zinegotzi Cesar Fernandez de Landa; eta Igor Salazar, Merkataritza zinegotzia

Eguna. Osteguna, abenduak 3

Ordua. 11:30

Tokia. Udaletxeko prentsa aretoa

————————————–

Harrera-ekitaldia. Vitoria-Gasteiz Itzulpen Sariak banatzea

Haur eta gazte literaturaren alorrean euskarara egindako itzulpenik hoberenak saritzeko Vitoria-Gasteiz Sariak emateko ekitaldia

Parte hartzaileak. Gorka Urtaran alkatea eta saridunak egongo dira: Patxi Zubizarreta eta Xabier Olarra

Eguna. Osteguna, abenduak 3

Ordua. 12:00

Tokia. Oihaneder Euskararen Etxea (Montehermoso jauregia)

* Bertan, abenduaren 3a Euskararen Eguna dela-eta, erakunde-adierazpena irakurriko da

Share

(Argazkiez eguneratuta) Urtarrilean hasiko dira tranbiaren plataforma Salburuara luzatzeko lanak

Proiektuak hirutik bira murriztuko ditu Bulebarreko erreiak, metro arinak alboko trenbide batetik zirkula dezan

Datorren urtearen hasieran hasiko den hurrengo obra frontea Florida eta Jacinto Benavente kaleen arteko bidegurutzeari dagokiona izango da

Tarte berria 2,5 kilometro da luze eta bost geraleku berri jasotzen ditu

Euskal Trenbide Sareak, Eusko Jaurlaritzaren esku dagoen erakunde publikoak, Salburuan galtzada aldatzeari ekin dio, datorren urtarriletik aurrera tranbiaren luzapena Gasteizko auzo horretan sartzeko. Etorbide horretako gurpil gaineko trafikoaren zirkulazioa hiru errei izatetik bi errei izatera pasatuko da noranzko bakoitzean, eta tarte horretan metro arinak alboko trenbide batetik zirkulatuko du. Lan horien barruan erdibitzailea lekuz aldatzea sartzen da, eta erdibitzailea zegoen lekuan zuhaitzak landatuko dira.

Iñaki Arriola Lurralde Plangintza, Etxebizitza eta Garraio sailburuak, Ramiro Gonzalez ahaldun nagusiarekin eta Gorka Urtaran Gasteizko alkatearekin batera, 24,8 milioi euroko (15,5 milioi euro obra zibilean) aurrekontua duten obren garapena bisitatu du gaur goizean. Obren % 65 Eusko Jaurlaritzak finantzatuko du, eta gainerako % 35 Udalak eta Arabako Foru Aldundiak erdibana. Egikaritze epea 30 hilabetekoa da.

Galtzada zuzentzeko lana egin ahal izateko, ETSk hiri-altzariak kendu behar izan ditu, ukitutako zerbitzuak desbideratu eta bertan zegoen erdibitzailea zuzendu aurretik. Bertan landatuta zeuden zuhaitzetako asko udal haztegira eraman dira. Era berean, lursail bat okupatu da Salburuan, pilaketa-eremu gisa, eta beste bat Iliadan, obrako etxolak muntatzeko.

Ibilgailuen trafikoak bere behin betiko espazioa okupatzen duenean, aurreikuspenak betetzen badira 2021. urtearen hasieran, Salburuako bulebarraren mendebaldeko erdialdea libre geratuko da. Horri esker, tranbiaren plataforma eta Nikosia eta La Union geltokiak eraikitzeko lanak hasi ahal izango dira. Lan horiek Florida-Jacinto Benavente kaleen arteko bidegurutzean egongo den obraren beste fronte baten aurrerapenarekin batera gauzatuko dira.

Tranbia luzatzeari esker hiriaren ekialdean dauden auzoen konexio zuzena hobetu ahal izango da. Zehatzago esanez, Santa Luzia eta Salburua auzoek erdialdearekin, Lakuako autobus geltokiarekin eta une honetan dauden lineen zerbitzua jasotzen duten guneekin duten lotura hobetuko da. Horrez gain, auzo horiek Hegoalderekin eta EHU/UPVko campusarekin lotuta geratuko dira hegoaldeko luzapenari esker.

Mugikortasuna eta hiriburuaren erdialdearen eta auzoen arteko harremanak hobetzeaz gain, tranbia Salburuara luzatzeak urbanizatutako gune berriak sortzen eta bidegorri sarea hedatzen ere lagunduko du.

Ildo horretan, 2,5 kilometroko trazatu berriaren eraikuntzak 70.860 metro karratuko urbanizazio berria ekarriko du, horietatik ia 22.000 tranbiaren trazatuari eta bost geralekuei dagozkie: Santa Luzia, Iliada, Nikosia, La Unión eta Salburua. Geraleku horiek, 50 metroko luzera (sarrerako arrapalak barne), 3,5 metroko zabalera eta 25 zentimetroko altuera izango duten alboko nasekin diseinatu dira.

Proiektua egikaritzearen ondorioz, udal bidegorri sarea 2.390 metro luzeagoa izango da. Espazioaren gainerakoa, Eusko Jaurlaritzak eta Vitoria-Gasteizko Udalak adostutako jarraibideen arabera urbanizatuko da. Gainera, trazatu berriaren % 95ean, tranbiak bide berdetik zirkulatuko du.

Bisitan, Arriola sailburuak azpimarratu duenez, “tranbia, garraiobide modernoa eta hiria egituratzeko faktorea izateaz gain, Vitoria-Gasteizko ezaugarri bihurtu da”. Auzoan bizi diren pertsonei lanek eragindako eragozpenengatik barkamena eta ulermena eskatu ondoren, Garraio sailburuak hau gaineratu du: “obra guztiek deserosotasunak eragiten dituzte ezinbestean, baina ziur gaude horiek guztiz konpentsatuta geratuko direla tranbiak ematen duen hiri garraio zerbitzu azkarra, eraginkorra eta ekologikoa jasotzean”.

Bestalde, Ramiro Gonzalez Arabako ahaldun nagusiak Arabako Foru Aldundiak Gasteizen mugikortasuna garatzen laguntzeko egin duen apustua azpimarratu du. “XXI. mendean hiriak birpentsatzen ari dira, eta mugikortasunak berebiziko garrantzia du diseinu berri horretan, iraunkortasunaren ikuspegitik. Eta hortik dator azken hamarkadan izan dugun konpromiso politikoa eta ekonomikoa”, adierazi du. Ondoren, tranbiaren aldeko apustu horrek lurralde osoan egiten duen ekarpena ere aipatu du, lurralde oreka eta energia-trantsizioa, besteak beste. “Horrela egiten dugu aurrera abangoardiako Araba horretan, baita mugikortasunaren arloan ere, eta horren alde ari gara lanean erakundeetatik, baita Arabako Aldundi honetatik ere”.

Gorka Urtaran alkateak nabarmendu duenez, “tranbia Salburura luzatzea albiste bikaina da Gasteizentzat. Proiektu honek beste bultzada bat ematen dio mugikortasun jasangarri, eraginkor, puntual, irisgarri, elektrifikatu, moderno, seguru eta erakargarriaren alde egin dugun apustuari. Tranbiaren luzapena auzo honekin genuen konpromisoa zen. Gasteizko 37.000 bizilagunekin genuen konpromiso hori, erakundeen arteko lankidetzaren bitartez bete dugu. Proiektuak Salburua hiriaren gainerakoarekin lotuko du, garraio publiko sistema bikainaren bitartez, ibilbide osoaren berrurbanizazioarekin eta bizikleta bidezko konexioen hobekuntzarekin batera”.

Trazatua

Trazatu berriaren lotunea Florida, Herran eta Las Trianas kaleek bat egiten duten puntuaren inguruan dago. Tranbia Unibertsitatera luzatzeko lanek maniobretarako mahuka bat prestatu dute bertan. 0+200 K.P.an trazatua, Calasanz – Escolapios ikastetxearen itxidurarekin paraleloan doan iparraldeko galtzadaren gainera sartzen da, eta tranbiaren plataformak galtzada hori okupatuko du.

Florida eta Jacinto Benavente kaleen intersekzioan dagoen biribilgunean, trazatuak eskuinerantz egiten du pixka bat, 230 metroko zuzenguneari bidea emateko. Bertan dago lehenengo geltokia, nasak alboetan eta katenariaren zutabeak erdian dituen Santa Luzia, Vicente Alexandre kalearekin intersekzioan dagoen biribilgunea zeharkatu aurretik.

Tranbiak Florida kaleko iparraldeko galtzadatik jarraituko du, eta Astronomoen kaleko intersekzioan dagoen biribilgunea igaro ondoren, trazatua Iliadako Pasealekuan sartuko da. Bigarren kale horretan dago tarteko bigarren geltokia, Iliada. Geltoki horrek ere nasak alboetan eta katenariaren zutabeak plataforman zentratuta ditu.

90 graduko bira egin ostean, tranbiaren plataforma bulebarreko mendebaldeko galtzadaren gainera doa, 645 metroko lerrokadura zuzenean. Bertan egongo dira Nikosia eta La Unión geltokiak.

Ondoren, tranbiaren plataformak La Unión plazako biribilgunea zeharkatu, Salburuako Bulebarreko tarteko galtzadatik aurrera egin, ibilbidea Aerodromoko Pasealekuko oinezkoentzako gunetik jarraitu, zenbait bidegurutze igaro eta, amaitzeko, Martxoaren 8 Etorbideko erdibitzailearen gainean dagoen pasealeku eta lorategi eremuaren gainetik doa.

Amaierako geralekua, Salburua, auzoaren erdialdean dago, gutxi gorabehera, Martxoaren 8 Etorbidearen erdian.

 

Share

Udaltzaingoak abiadura-kontrolak areagotu eta radar mugikorra adierazitako puntuetatik kanpo jarri du

Udaltzaingoak azken asteotan radar mugikorrarekin abiadura kontrolatzeko lana areagotu du; 2018-2023 Bide Segurtasuneko Udal Plan Estrategikoaren helburu den bideko segurtasuna zaintzeko beste urrats bat gehiago izango da hori.

Duela zenbait astetatik, Istripu eta Argiketen Ikerketa Taldeko Radar eta Zirkulazioaren Kontrol Unitatearen baitako agenteek radar mugikorra egokitutako eta seinaleztatutako puntuetan ez ezik, beste toki batzuetan ere jartzen dute. Horietan, aforatzaileen kontrolaren bidez, baimendutako abiadura-mugak gainditzen dituzten abiadurak detektatu dituzte. Hala ziurtatu du urtearen hasieratik Trafiko Zerbitzuarekin elkarlanean egin duten ikerketak.

Udaltzaingoak ikusi duenez, radar mugikorreko postuak mugatzea ez da eragingarria; izan ere, gidariek, kokapena zein den jakinda eta bertan egon daitezkeela ohartarazita, puntu horietatik igarotzeko garaian abiadura murrizteko eta puntuak igaro ondoren berriro areagotzeko joera izaten dute.

Gainera, radarra aldez aurretik non dagoen jakitea hiriko gainerako kaleetako bideko segurtasunaren kalterako da; izan ere, gidariek badakite toki horietan ez dela kontrolik egiten. Hori guztia dela eta, radar mugikorrak adierazi gabeko beste puntu batzuetara zabaldu du bere jarduera-esparrua eta, gainera, sendoago egingo du lan 30 eremuetan, muga hori ez dela errespetatzen hauteman baitute.

Abiaduren ikerketa

Erabaki horiek hartzeko oinarri gisa erabili duten Udaltzaingoak eta Trafikoak egindako ikerketak ehun ibilgailu baino zertxobait gehiago zenbatu dituzte aforatzaileek 50 eta 60 km/h arteko abiaduran kontrolatutako kaleetan zirkulatzen. Arau-hauste gehienak 60 eta 70 km/h arteko tartean daude (6.500 ibilgailu); aldiz, 1.900 pertsona ingururen abiadura 70 eta 80 km/h artekoa zen. 80 eta 90 km/h-ko tartean, kopurua gutxitu egiten da (ia 400 arau-hauste) eta ia ehun gidari harrapatu zituzten 90 km/h baino gehiagoko abiaduran zirkulatzen.

Hirigunean, baimendutako gehieneko abiadura 50 km/h-koa da, baina Arabako hiriburuan badaude 30eko kaleak ere eta horietan ezin daiteke muga hori gainditu. Arau-hauste hori egiten “harrapatzen” dituztenek 100 eta 600 euro arteko isuna duen administrazioko zigorra jaso dezakete. Bestalde, aurten, oraingoz, Udaltzaingoak 6 gidari ikertu ditu 110 km/h baino gehiagoko abiaduran zirkulatuta bideko segurtasunaren aurkako delitua egiteagatik.

 

Share

Abenduaren 3tik 18ra arte azoka enogastronomikoa egingo da Santa Barbara plazan

Aenkomerrek sustatu du Arabako baserritarren, tokiko saltokien eta upeltegien arteko topagune hori

 

Abenduaren 3tik 18ra arte 2020ko AEnkomer elikadura azoka egingo da Gasteizko Santa Barbara plazan, Araba osoko eskaintza enogastronomikoa elkartzeko asmoz.

Arabako Merkataritza eta Zerbitzu Enpresaburuen Elkarteak sustatu du ekimena, lurraldeko eta leku mugakideetako baserritarren, tokiko saltokien, upeltegien eta beste proposamen gastronomiko batzuen arteko topagunea bihurtzeko asmoz. Gasteizko Udalak, Arabako Foru Aldundiak, Vital Fundazioak eta Azoka Plazak emandako laguntzari esker antolatu ahal izan da.

Eskaintza bereizgarria duten produktuak eta establezimenduak ezagutaraztea da helburua, eta beste leku batzuetako produktuak ere eskaintzea horien osagarri, azoka aberatsagoa eta dinamikoagoa izan dadin.

Hauek izan dira azoka aurkezteko prentsaurrekoan: Igor Salazar, Enplegu, Prestakuntza eta Merkataritza zinegotzia; Felipe García, Enplegu, Merkataritza eta Turismo Sustapenaren foru zuzendaria; Arantxa Ibañez de Opacua, Vital Fundazioaren zuzendaria; Edurne Parro, AEnkomerren zuzendari-kudeatzailea, eta Eloy López de Foronda, Gasteizko Azoka Plazaren kudeatzailea.

“Bihartik aurrera azoka oso honetara etortzera animatzen ditugu gasteiztarrak, osasunaren arloko agintariek ezarritako neurri guztiak beteta leku segurua baita, eta bertan kalitate goreneko produktuak erosi ahalko baitituzte Eguberrietarako. Abenduaren 18ra arte egongo da zabalik”, azaldu du Igor Salazarrek.

Bigarrenez egingo da merkatua Gasteizko Azoka plazaren ondoan; egunero irekiko da, 10:00etatik 13:00etara eta 17:00etatik 20:30era.

 

 

Share

Udaltzainen eta suhiltzaileen esku-hartzeak

Udaltzainek azken 24 orduotan zirkulazioko hamaika istripu erregistratu dituzte eta hiru pertsona zauritu dira horietan.

Edukiontzia sutan

Suhiltzaileek atzo esku hartu zuten Urbasa Mendiaren kalean edukiontzi batean pizutako sutea itzaltzeko. Gainera, Nieves Cano kaleko paper-ontzi bateko sua eta Koroatzearen kaleko etxebizitza bateko sabaiko lanpara batean piztutako sua ere itzali behar izan zituzten. Azken horrek kalte txikiak eragin zituen.

 

Share

Asteburuan hasiko dira Gamarrako atea eraberritzeko lanak, eta zuhaitzak ordezteari ekingo zaionez trafikoari eragingo dio horrek

Asteburuan hasiko dira Gamarrako atearen zati bat eraberritzeko lanak: trafikoa eten eta zenbait zuhaitz kendu beharko dira. Ekonomia Sustapenaren Sailak eta Mugikortasunaren eta Espazio Publikoaren Sailak koordinatuko dituzte lanak, kalea modernizatzeko xedez. Oinezkoentzako espazioa zabaldu eta eraberrituko da, oinez ibiltzeko bideak hobetuko, bidegorri bat egingo, eta zuhaitz eta zuhaixkak landatuko, berdegunea hobetzearren.

Udalak 623.448,50 euro (BEZa barne) inbertituko ditu esku-hartze horretan, zeina industria-sektoreak eta enpresek berek diseinatutako Ekonomia Suspertzeko Planean aurreikusi baita. Lanek 410 metro lineal hartuko dituzte, Kantabrikoaren hiribidearekiko eta Santo Tomas Ibaiaren plazarekiko bidegurutzeen artean.

Lanak abenduko zubian hastea erabaki da, ahalik eta enbarazu txikiena sortzeko. Batez ere trafikoari dagokionez. Abenduaren 6an eta 8an, zati hori guztiz itxita egongo da 8.00etatik 20.00etara. Hilaren 7an, berriz, bi noranzkoko errei bat egokituko da, guztiz itxi beharrik ez izateko.

Lehen lanek zuhaitzei eragingo diete, gaur egun ia espaloi osoa hartzen baitute. Makalak dira, eta  egoera txarrean daudenez igandean bertan hasiko dira ordezten. Ehun zuhaitz inguru ordeztuko dira. Hasieran 45 zuhaitz kentzea aurreikusi zen, espaloietako batean, baina azkenean bi espaloietakoak kenduko dira, kontratuaren esleipendunak aurkeztutako eskaintzan sartutako hobekuntzari esker. Makalen ordez tamaina handiko zuhaitzak landatuko ditu Udalak, ingururako egokiak eta enpresetako hesietatik urrun; hainbat espezietako zuhaixkak ere landatuko dira. Zehazki, platanoak eta altzifreak jarriko dira. Hartara, kalea berdeagoa izango da, eta espezieak askoz egokiagoak.

Esteka honetan kontsulta daiteke esku-hartzeari buruzko informazio guztia:

Share

Gasteizko ostalaritzarako aparteko laguntzen bidez areto bakoitzak 600 euro jasoko du

Dirulaguntza-deialdia datorren astean argitaratuko da, eta eskabideak sarrera-hurrenkeraren arabera balioetsiko dira, 500.000 euroko partida agortu arte

 

Gasteizko Udaleko Ekonomia Sustapenaren Saila ostalaritzarako aparteko laguntzen programa azkentzen ari da: datorren astean argitaratuko da, eta areto bakoitzeko 600 euroko zuzkidura aurreikusiko du. Eusko Jaurlaritzaren azaroaren 6ko 38/2020 Dekretuaren bidez ezarritako itxierak hirian eragindako ostalaritza-establezimendu oro baliatu ahalko da laguntza-ildo horretaz; eskabideak sarrera-hurrenkeraren arabera balioetsiko dira, 500.000 euroko partida agortu arte.

Ostalaritzarako laguntza horiek beste erakunde batzuek emandako dirulaguntzen osagarri izan ahalko dira, eta ez dira itzuli beharko. “Sektorearen behar urgenteenak betetzeko balioko dute, hau da, argia, ura, berokuntza, telefonoa, alokairua, hipoteka edo gestoria gastuak ordaintzeko”, azaldu du Maider Etxebarria alkateordeak. Ekonomia Sustapenaren zinegotziak gehitu du laguntzek atzerako eragina izango dutela, lokaletan urriaren 25az geroztik sortutako gastuak ordaintzerik izan dadin, orduan ezarri baitzen bigarren alarma-egoera.

Ekonomia Sustapenaren Sailak Ogasun Sailarekin elkarlanean sustatu duen laguntza-programa berria “datorren astean” argitaratuko da Arabako Lurralde Historikoaren Aldizkari Ofizialean (ALHAO). Deialdiaren xehetasunak eta eskabideak aurkezteko epea zehaztuko dira iragarkian. Interesdunek agiri bakarra bete beharko dute, aurrez aurre edo Udalaren erregistro elektronikoan.

Ostalaritzarako laguntza horiek Eusko Jaurlaritzako Turismo, Merkataritza eta Kontsumo Sailak emandakoen osagarri izango dira (3.000 eta 4.000 euro artekoak areto bakoitzeko). Horretaz gain, Gasteizko Udalak beste ekintza batzuk bideratu ditu sektorera, hala nola Ekonomia Suspertzeko Plana, terrazak handitzeko baimena eta tasa eta zergen ordainketa etetea edo atzeratzea.

 

Share