Prentsa Oharren banner

Prentsa-deialdiak (2021-05-12)

Euskadiko I. Zikloturismoari buruzko Foroa inauguratzea

Parte hartzaileak. Lehen alkateorde eta Ekonomia Sustapen zinegotzi Maider Etxebarria; Basquetour erakundeko zuzendari Daniel Solana

Eguna. Asteazkena, maiatzak 12

Ordua. 09:00

Tokia. Europa Biltzar jauregia, Green aretoa

———————————————-

Prentsaurrekoa. Zaramagan desiatua ez den bakardadearen sentsibilizazio kanpaina zertan den azaltzea

Parte hartzaileak. Gizarte Politikak, Adinekoak eta Haurrak Arloko zinegotzi Jon Armentia; eta Elkarrekin taldeko zinegotzi Gema Zubiaurre

Eguna. Asteazkena, maiatzak 12

Ordua. 11:00

Tokia. Udaletxeko prentsa aretoa

 

Share

Mariturriko haur-eskola datorren astean irekitzea espero du udalak

Kanpoko peritu-txosten baten arabera, duela 7 urte obra gaizki egin izanagatik erori da sabaia.

 

Haur-eskola eraiki zuen enpresari erantzukizunak eskatzea aztertzen ari da udala.

 

Mariturriko haur-eskola datorren astean ireki ahal izatea espero du udalak, maiatzaren 5ean sabaiaren zati bat erori eta bi haur zauritu ondoren itxi behar izan ostean.

Udalak agindutako kanpoko peritu baten txostenak jasotzen duenez, eroritako sabai faltsua behar bezala eginda ez egotea izan da istripuaren arrazoi nagusia, izan ere sabaiak ez zituen obra-proiektuan jaso eta fabrikatzaileak adierazitako adina ainguratze.

Txostenean adierazten denez, istripua ezin zaio inolaz ere eraikinaren mantentze-lan desegokiari egotzi, izan ere oso erabilera-baldintza onetan dago.

Bihar hasiko dira haur-eskolan dauden antzeko sabaiak konpontzen, eta horien berrikuspen xehatua egin eta desmuntatzen, ainguratze gehiago behar diren aztertzeko.

Mariturriko haur-eskola eraikin berria da, 2014an inauguratua, eta udala aztertzen ari da enpresa eraikitzaileak  sabai faltsuak behar bezala ez egitearen ondorioz izan ditzakeen erantzukizunak.

 

Share

Atariak Euskal Herriaren ikuspegi ezberdina proposatzen digu intsektuen bidez

Arantza Eziolaza ilustratzaileak “Euskal Herriko historia garraiolariak eta ibiltariak” erakusketa inauguratu du Atarian.

 

Arantza EziolazakHistoria garraiolariak” bere obra eskaintzen digu Atarian, eta ekainaren 20ra arte egongo da ikusgai. Erakusketan, intsektuen siluetak erabili ditu gure ohiturak eta kultura kontatzeko, baita Euskal Herriko zenbait toki garrantzitsu erakusteko ere. Horretaz gain, haien gorputzen zenbait atal marraztu ditu, haien testura bereizgarriak erakusteko.

Halaber, erakusketak badu bigarren atal bat, “Ibiltariak” izenekoa: horretan, “gure” intsektuak gizatiartu, eta, hala, bizitzan zehar dabiltzan benetako ibiltari bihurtu ditu. Horrekin, omenaldia egin nahi izan dio Antonio Machado poeta ospetsuaren poemarik ezagunenetako bati.

Animalia horiek planetako izaki bizidunen % 90 baino gehiago dira, guztira (200 bat milioi intsektu pertsona bakoitzeko); orain dela 550 milioi urte baino gehiagotik daude gure artean, eta posible egin dute gaur ezagutzen dugun bezala izatea bizia. Beraz, gure errespetu osoa merezi du haien kontserbazioak.

Historia pixka bat

Gure historiarik antzinakoen eta borrokalarienaren irudi batek ematen dio hasiera kontakizunari, eta Anthaxia scutellaris “bitxi-kakalardoa” ezin egokiagoa da Euskal Herriko sinbolo eta kondairetako batzuk kontatzeko. Bitxiloreetan eta beste unbelifero batzuetan (perrexila, anis-belarra, ezamihilua…) bizi da, eta arreta handiz begiratu beharra dago bera naturan ikusteko, ñimiñoa baita (5-6 mm luze). Garraiolari honek Gernikako Batzar Etxearen irudiak dakarzkigu: hura 1937ko apirilaren 26an bonbardatu izanak eman zion inspirazioa Pablo Picassori historiako margolanik ospetsuenetako bat sortzeko.

Amaiurko monolitoa ere ageri da kakalardo honen barnean. Monolitoa dagoen tokian, lehen Amaiurko gaztelua zegoen, Nafarroaren defentsaren azken gotorlekuetako bat Gaztelako Koroaren konkistaren aurka (XVI. mendea). Errolan, berriz, bere izena duen “Kantuaren” protagonista da; Orreagako gudukari buruzkoa, ezagutzen den gesta-kantarik zaharrena da, seguruenik. Beste zenbait ikono ageri dira: Arrano Beltza (zeina Antso VII.ak zigilu pertsonala baitzuen), lauburua, eguzki-lorea eta argizaiola, besteak beste.

Euskal Herriko zazpi hiriburuak

Aurkezpen horren ondoren, Arantza Eziolazaren obrak Euskal Herriko zazpi hiriburuak erakusten dizkigu intsektu banaren bidez: Longitarsus melanocephalus urre-koloreko kakalardoa Donostiaren garraiolaria da; Lucanus cervus Europako kakalardorik handienak Maule garraiatzen du, Zuberoako hiriburua; Pyrrhocoris apterus malben izerdiaz elikatzen den zimitzak Baiona irudikatzen du; Psylliodes napi-k metal-tonuak dituen intsektuak Bilboko Guggenheim museoaren fatxadak garraiatzen ditu lepoan;  Anaglyptus mysticus urritzen, pagoen, astigarren, intsusen eta abarren hostoez elikatzen da, eta Gasteiz irudikatzen du; Albana m-griseum otaberaz elikatzen da, eta Iruñearen irudia dakar; eta Neocrepidodera ferruginea urre-koloreko distiraduna, gramineoz eta bitxilorez elikatzen da, eta Donibane-Garaziren garraiolaria da.

Erakusketa Euskal Herriaren etengabeko alegoria da: euskal kirolak (esku-pilota, estropadak, sokatira, herri-kirolak, eta abar), mus jokoa, musika-tresnak… erakusten dizkigu. Halaber, ondo antolatutako ibilbide batean, kultura gastronomikora eroaten gaitu, zer jan eta edaten dugun, zer ekoizten dugun berezi eta ezberdin, edo zer delicatessen ekoizten diren gure herrietan.

 

Share

Agenda zabala eskainiko du Bizikletaren XIX. Asteak maiatzaren 14tik 30era bitartean

Izena emateko epea zabalik dago programaren parte handi baterako

Abian da Bizikletaren XIX. Astea, bizikletaren inguruko jarduera-programa, Herritarren Partaidetzaren, Gardentasunaren eta Gizarte Etxeen Sailak eta Ingurugiro Gaietarako Ikastegiak antolatua. Maiatzaren 14tik, hots, datorren ostiraletik hilaren 30era arte iraungo du edizio berri honek, eta hiriko hainbat gizarte-etxetan eta kiroldegitan egingo diren ekitaldien agenda zabala izango du.

Ohi denez, eta pandemia gorabehera, jarduera- eta esperientzia-eskaintza interesgarria egingo da, zale guztiei zuzenduta, bizikletaren gainean ibiltzea gogoko duten profesionalekin lankidetza estuan.

Besteak beste, hitzaldiak, lantegiak, irteerak, erakusketak eta jokoak izango dira aurtengo edizioan, eta, aurreko edizioan bezala, bereziki emakumeei zuzendutako eskaintza diseinatu da.

Izan ere, bizikletaren inguruko hainbat ekintza bildu dira aste horretako egitarauan. Era askotako paisaiak ezagutzeko aukera izango da, hala nola bidaiak leku exotikoetara, txangoak lurraldean eta ingurunean barrena, mugikortasun osasungarri eta arduratsua, ekofeminismoa, jarduera fisikoa eta kirola, eta bizikleta sorkuntza artistikoaren iradokitzaile gisa.

Programazioa

Ostiralean hasiko da Bizikletaren XIX. Astea, Salburua gizarte-etxeko liburutegiko ‘Bizikletaz gozatu’ erakusketarekin. Astelehenean, hilak 17, ‘El camino del Cid’ erakusketa inauguratuko da Aldabeko gizarte-etxean.

Asteazkenean, maiatzak 19, Aldabeko gizarte-etxeko areto nagusian, ‘Biela y Tierra, nuestra alimentación como motor de cambio’ hitzaldia izango da, Ana Santidrían eta Edurne Caballeroren eskutik. Egun horretan bertan, ‘Entrenamiento y nutrición en el ciclismo’ hitzaldia izango da Salburuko gizarte-etxean.

Maiatzaren 20an, berriz, ‘Kham Tibet bizikletaz; Yunnan eta Sichuan probintziak, Tibet historikoa’ hitzaldia izango da Aldabeko gizarte-etxean, Igone Mariezkurrenaren eskutik.

Egun berean, ‘Psiconutirición, ansiedad y salud’ gaia jorratuko du Epic Fitek Salburuko gizarte-etxeko areto nagusian, eta orobat emango du ‘Entrenamiento y biomecánica’ hitzaldia maiatzaren 25ean. Baita ‘Entrenamendua eta nutrizioa txirrindularitzan’ hitzaldia ere, Salburuko gizarte-etxean bertan.

Bizieskolak eskaintzen dituen jarduerak era nabarmentzekoak dira: ‘Bizikletaz seguru mugi zaitez’, Landazuriko kiroldegian, maiatzaren 21ean eta 29an, eta ‘Bizikletaren oinarrizko mekanika’, hilaren 24an, leku berean.

Emakumea bizikletaren kulturan ahalduntzeko She is Cicling gizarte-mugimenduaren jarduerak ere nabarmentzekoak dira, hala nola ‘Errepide bizikletan hastea’, 16 urtetik gorako emakumeentzat, Salburuko gizarte-etxean.

Belén Álvarez eta Laura Mambrilla BTT gidarien eskutik, berriz, mendiko bizikletan hasteko bi irteera egingo dira, hilaren 22an eta 30ean. Maiatzaren 23an, berriz, igandez, ‘Gertuko herriak bizikletaz ezagutzen’ jarduera izango da, eta hilaren 29an, ‘Salburuko gizarte-etxetik Armentia basora GR-tik’.

Bizikletaren inguruko hainbat lantegi ere izango dira, guztiaren osagarri.

Izena emateko epea zabalik dago dagoeneko jarduera gehienetarako —Udalaren webgunearen bitartez, 010 telefonora deituz edo gizarte-etxe eta kirol instalazioetara joz egin daiteke—.

Share

Hiriburutza-kanona berritzearekin, erakusketa batekin eta ikurrina altxatzearekin ospatuko du Gasteizek Euskal Autonomia Erkidegoaren hiriburua izendatzearen 40. urteurrena

 

2020an bete zen 40. urteurrena, baina datorren maiatzaren 23ra aldatu zen oroipen-ospakizuna pandemiaren ondorioz

Gasteiz Euskal Autonomia Erkidegoko hiriburu izendatu zen maiatzaren 23ko 1/1980 Legearen bidez.  Urtemuga dela eta, zenbait oroitzapen-ekitaldi egingo ditu Udalak.  Hala, maiatzaren 23an bertan, Gorka Urtaran alkateak eta Iñigo Urkullu lehendakariak hiriburutza-kanona sinatuko dute Ajuria Enean.  Sinatze horren ondorioz, 40 milioi euro emango dizkio Eusko Jaurlaritzak Gasteizi, hiriburua izateagatik;, hiriaren beste zenbait proiektu gehitu behar zaizkio horri, haietan Eusko Jaurlaritzak ere parte hartzen baitu.  Hiriarekiko Eusko Jaurlaritzaren inplikazioa ez da berria.  Alkateak eta Lehendakariak hiriburutza sinatu zuten aurreko aldian ere, 40 milioi euro jaso zituen Euskal Autonomia Erkidegoko hiriburuak.

Egun horretan, halaber, “40+1, Vitoria-Gasteiz, Euskal Autonomia Erkidegoko hiriburua” erakusketa inauguratuko da, Andre Maria Zuriaren plazan; irudi bitxien bidez erakutsiko digu Gasteizek 80ko hamarkadatik hona izan duen bilakaera: Jaurlaritzak Lakuan eta Legebiltzarrak Floridan izan zituzten lehen egoitzak, lehen gizarte-etxearen eraikuntza, aireportua abian jartzea, Foru plazaren azken erremateak, oinezkoentzako bihurtu zen lehenengo kalea, eta hiriaren lau hamarkada hauetako beste mugarri batzuk. Salburua eta Zabalgana auzoetara ere joango da erakusketa, gizarte-etxeen kanpoko zabaldietara.

Euskal Autonomia Erkidegoko hiriburutza ospatzeko egun horretako ekitaldiak, zeinak 2020rako aurreikusita baitzeuden jada, Forondako atean egingo den ekitaldi sinboliko batekin amaituko dira: ikurrina altxatuko da han, hiriburutzaren ikur gisa.

 

 

 

 

Share

Udan ez da erreserbarik beharko Mendizorrotzera eta Gamarrara sartzeko

  •  Igerilekuetara sartu ahal izateko, denbora errealean kontrolatuko da edukiera eta pertsona bakoitza egunean, gehienez, bost orduz egon ahal izango da
  • Udako denboraldia maiatzaren 28an hasiko da
  • 1.500 udako abonamendu inguru eskainiko dira Gamarrarako

 

Mendizorrotzeko eta Gamarrako kirol-esparruek normaltasuna berreskuratuko dute pixkanaka aurtengo udako kanpainan, oraindik ere pandemia egoeran gaudela ahaztu gabe. Izan ere, koronabirusa agertu aurreko ordutegiak eta zabaltze-aldia berreskuratu dira, eta erabiltzaileak aldez aurretik erreserbatu gabe sartu ahal izango dira. Hala ere, edukiera errespetatu beharko da, eta osasun eta segurtasun neurriak mantendu.

“Uda honetan, iaz bezala, aisia eta segurtasuna uztartu beharko ditugu, baina jakin badakigu egoera ez dela berdina. Ohiz kanpoko urte honetan kirol-instalazioak kudeatzen ikasi duguna kontua hartuta, udako kanpaina erosoago eta luzeago bat proposatzen dugu, gure kirol-esparruak bereizten dituen zerbitzuaren kalitatea mantenduta eta osasun egoerak exijitzen dituen berme guztiekin”, adierazi du Kirol eta Osasun zinegotzi Livia Lópezek.

Udako kanpaina honetan, berritasun garrantzitsuena sartzeko eta edukiera kontrolatzeko sisteman egongo da, aurten ez baita aldez aurretik erreserbarik egin beharko igerilekuetara sartzeko. Gehieneko edukiera gainditzen ez bada, posible izango da sartzea. Denbora errealean egiaztatu ahal izango da Mendizorrotzeko eta Gamarrako betetze-maila, bai Udalaren webgunean, bai eta instalazioetako hiru sarreretan egongo diren informazio-pantailen bidez.

Beste berritasun bat ere egongo da: pertsona bakoitza egunean 5 orduz egon ahal izango da igerilekuetan. Ordu horiek egunean zehar banatu ahal izango dira, eta bi instalazioetan, betiere leku libreak badaude. Eguneko muga behin eta berriro gainditzen duten erabiltzaileei sarrera mugatuko zaie.

“Bi neurri horiekin, alegia, hitzordua eskatu behar ez izatea eta sartzeko baldintzak malguagoak izatea, erabiltzaileak erosoago egongo dira. Gainera, pertsona gehiagok izango dute instalazioak erabiltzeko aukera. Iaz, bi kirol-esparruak kontuan hartuta, egunean 12.000 pertsonara arte sar zitezkeen, eta aurten edukiera hori ia % 50ean gainditu ahal izango dugu”, azpimarratu du Livia Lópezek.

Gehieneko edukierak

 Mendizorrotzeko kirol-esparruan 3.000 pertsona sartu ahal izango dira, eta Gamarrako parkean 3.500 (lur-eremua handiagoa delako eta ur azalera handiagoa duelako). Kupo horiek zehazteko orduan, iaz fase pilotua amaitzean zehaztu zirenen antzekoak, kontuan hartu da aurreko kanpainan ondo funtzionatu zutela, ia eskari osoari ematen baitzitzaion zerbitzua segurtasun-berme guztiak mantenduz. Edonola ere, edukiera horiek osasun egoeraren arabera aldatu ahal izango dira.

Oraingoan ere, zirkuluak marraztuko dira lurrean, pertsonak ondo banatu eta segurtasun neurriak errespetatzen direla bermatu aldera. 1.800 zirkulu inguru markatuko dira, 2 eta 4 metroko diametroarekin, eta igerilekuetatik hurbil jarriko dira.

Irekiera egunak eta ordutegiak

2021eko udako kanpainak ohiko hasiera- eta amaiera-datak berreskuratuko ditu. Maiatzaren 28an irekiko dituzte ateak bai Mendizorrotzek, bai Gamarrak; azken eguna, berriz, irailaren 5a izango da Gamarran eta irailaren 19a Mendizorrotzen.

Ordutegiari dagokionez, 8:00etatik 22:00etara egongo dira zabalik. Aurten ez dute eguerdian itxiko, eta, horri esker, instalazioen edukiera handituko da.

Sartzeko baldintzak eta abonamendu berria Gamarrarako

Iaz bezala, bazkideek lehentasuna izango dute, eta, horregatik, Mendizorrotzeko kirol-esparrua haiek bakarrik erabiltzeko izango da.

Hala ere, bazkide ez diren pertsonek abonamendu bat erosi ahal izango dute Gamarrarako hasieratik. 1.500 udako abonamendu inguru eskainiko dira kirol-gune horretan sartzeko, eta herritarrek Udalaren webgunean —Herritarren Udal Txartela badute— edo aurrez aurre herritarrei laguntzeko bulegoetan —hitzorduarekin— erosi ahal izango dituzte.

Ezingo dira eguneko sarrerak erosi, ezta txartela ahaztuz gero igerilekura sartu ahal izateko sarrera bereziak ere. Iaz bezala, bi urtetik gorako haurrek abonamendua beharko dute igerilekuetara sartzeko, eta abonamendua doakoa izango da 5 urte bete arte. Abonamendu hori eskuratu nahi duten familiek herritarrei laguntzeko bulegoetan eskatu ahalgo izango dute, aldez aurretik hitzordua hartuta.

Erabilgarri egongo diren ekipamenduak

 Kirol esparruetan iaz baino instalazio eta gune gehiago erabili ahal izango dira. Esaterako, aurten txirristak eta haurren jolastokiak irekita egongo dira. Gauza bera gertatuko da futbitoko, saskibaloiko, hondartza-boleiboleko eta mahai-teniseko kirol-pistekin, eta Gamarrako minigolfarekin, edukiera mugatuta egongo den arren eta jokatzeko hainbat arau errespetatu beharko badira ere.

Bestalde, tenis eta padel pistak aldez aurretik erreserbatu beharko dira erabili ahal izateko. Edonola ere, kontuan hartu behar da zelai horiek erreserbatuta ere, ezinbestekoa izango dela kirol-esparruetara sartzeko leku libreak egotea. Edukiera beteta egonez gero, erreserbaren dirua itzuli egingo zaio erabiltzaileari.

Aldagelak eta barruko dutxak irekita egongo dira, baina edukiera % 35ekoa izango da. Ez da hamaka-zerbitzurik egongo, baina nork bere hamaka erabili ahal izango du. Mendizorrotzen solariumean soilik jarri ahal izango dira. Gamarrako barbakoa gunea ezingo da erabili.

COVID-19ari aurre egiteko beste segurtasun neurri batzuk

Maskara erabiltzea derrigorrezkoa izango da beti, bereziki sarrera gunean eta gune komunetan. Salbuespen gisa, ez da beharrezkoa izango bainatzeko unean edo erabiltzailea bere lekuan eserita/etzanda dagoenean. Ezinbestekoa izango da, ordea, bainu-txanoa erabiltzea bainatzeko.

Azkenik, garbiketa indartuko da, eta, ateak ireki aurretik eta itxi ondoren, sakonean desinfektatuko dira instalazioak egunero. Gainera, egunean zehar ere desinfektatzeko txandak egingo dira, batez ere igerilekuetako ontzietan maiz ukitzen diren gainazalak garbitzeko.

DOSSIERRA

Share