Prentsa oharrak

Prentsa Oharren banner

Herrandarren kalea birnaturalizatzeko proiektuari esker bulebar berri bat irabaziko du hiriak, orainarte baino berdeagoa eta batez ere oinezkoentzat

– Udal-gobernua finantziazio bila dabil Europako funtsetan, hiri-zidor handi bat, lorategiak, hiri-baratzeak eta jolasguneak egingo dituen obrari ekin ahal izateko

 – Gorka Urtaranek iragarri du Udalak beste proiektu bat ere aurkeztuko duela Europako laguntzetara, egungo bidegorri-sarearen mantenimendua hobetzeko eta 24 kilometroan luzatzeko

 – Trantsizio energetikoko udal-planak ateak irekiko dizkio 120 milioi watioko planta fotovoltaiko bati, % 20an gainditzen duena Euskadirako diseinatutako handiena (Ekienea)

 

Gorka Urtaran alkateak Herrandarren kalea birnaturalizatzeko proiektua iragarri du gaur goizean. Proposamen horri esker, oinezkoak izango dira aurrerantzean protagonista nagusi, kalea hiri-azpiegitura berdeen irizpideei jarraiki zaharberritu ostean. Gasteizko Udalaren Mugikortasunaren eta Espazio Publikoaren Sailak kalea goitik behera aldatzeko diseinua osatu du dagoeneko, eta orain udal-gobernua obrei ekin ahal izateko beharrezko finantziazioa Europako suspertze-funtsetatik lortzeko lanean ari da. Laguntza horien artean badira ekosistemak eta horien baitako biodibertsitatea zaindu eta berreskuratzeari zuzenduak, bai eta hiriguneetan azpiegitura berdeak egiteari ere. Herrandarren kaleko proiektua ezin hobeto txertatzen parametro horietan.

“Herrandarren kalea birnaturalizatu nahi dugu, hartara bide berde eder bat bihurtzeko. Gaur egun asfaltozko kalea dena ibilbide handi bihurtu nahi dugu, hiri-zidor ederra, lorategi, hiri-baratze, jolasgune eta ur-txokoz hornitua. Proiektua ia-ia amaituta dago, Estatuaren deialdia noiz aktibatuko zain”, jakinarazi du alkateak udal politikari buruzko eztabaida orokorrean.

Herrandarren kalea aldatzeko lehen esku-hartzea handiari esker ibilgailuentzako galtzadak Ekialdean bilduko dira, hartara Herrandarren kaleko trafikoa Jose Mardones kalera aldatuko delarik. Horren ondorioz, oraingoz asfaltutako azalera handi bat askatuko da oinezkoentzako. Leku horretan hiri-zidor berde bat sortuko da, kilometro erdiko bulebar berde ederra.

Horrekin batera zenbait azpiegitura egingo dira: bidegorri berriak noranzko bietan, baratze-gune bat, aisialdi- eta jolas-gunea, euri-urez hornituko den urmaela, Herrandarren kaleko institutuaren ondoko kirol-gunea berdetuko da eta erabilera berria emango zaio autobus-geltoki ohiari. Izan ere, gaur egun bertan dauden haurrentzako jolasak kendu ondoren (Arana eta Estenaga Apezpikuaren kaleen arteko ingurura eramango dira, eta pergolen azpoian babestuko), autobus-geltoki ohiari bestelako erabilera emango zaio. Batetik, bizikletentzako aparkalekua izango da. Eta bestetik, salgaiak banatzeko gunea, inguru horri guztiari zerbitzu emateko.

Herrandarren kalearen zaharberritzea da Gorka Urtaranek planteatzen duen superhiri europarren eredua garatzeko proiektu garrantzitsuenetako bat. Baina ez bakarra. Izan ere, Gasteizko alkateak xede berbera duten beste esku-hartze batzuk iragarri baititu:

-Bizikleta bidezko mugikortasunari dagokionez, Udalak bizikletaz ibiltzeko sarea hobetu eta handitzeko plana ere erregistratuko du Europako funtsen deialdian. Plan horrek egungo bizikleta-erreien sarea (171 kilometro) onik zaindu, konpondu eta eguneratzea, Bizikletaren Gida Planaren araberako sare nagusia osatzea (24 kilometro berri), eta industrialdeetara joateko loturak finkatzea aurreikusten du.

-Era berean, Gasteizek 2030 klimaren aldetik neutroak izango diren Europako lehen 100 hirietako bat izateko hautagaitza aurkeztuko du.

-Gainera, datorren astean udal-gobernuak trantsizio energetikoko udal plana aurkeztuko du, zeinak Gasteizen 120 milioi watioko potentzia fotovoltaikoa instalatzeko aukera emango baitu. Potentzia horrek % 20an gainditzen du Euskadirako diseinatu den planta fotovoltaiko handiena, Ekienea.

 

Garraio publiko ea pribatua

Garraioa da Agenda gasteiztarraren estrategiaren beste ardatzetako bat. Horrenbestez, alkateak bi helburu nabarmendu ditu garraio publikoaren alorrean. Lehena, sistema digitalizatu, elektriko eta bidaiari kopuru handia hartzeko modukoak ezartzen jarraitzea (esaterako tranbia Salburura eramatea, BEA abian jartzea), hartara 2023an joan-etorrien erdia garraiobide elektrikoetan egin daitezen. Eta bigarrena, TUVISAren flota eguneratzea. Ildo horretatik, Autobus Elektriko Inteligenteak azken teknologiako 13 ibilgailu elektriko ekarriko ditu Gasteizera, Udalak 9 milioi euro inbertitu ondoren.

Baina horrez gain, beste bi neurri iragarri ditu ibilgailu pribatuei begira. Batetik, hiriaren Hegoaldean beste disuasio-aparkaleku bat eraikitzea, Gasteizko mendatetik behera A-2124 errepidean barrena hirira sartzeko gunean. Eta bestetik TAO zerbitzu beri bat, modernizatu eta diugitalizatua, “erraz, azkar eta erosoagoa”, zein aurreikusitako TAO guneak handitzeko lanak aprobexatuz ezarriko baita.

Gainera, Gorka Urtaranek hiriaren etorkizunerako funtsezko hiru proiektu babestera animatu ditu Udaleko talde politikoak: VIAPen eraikuntza Forondako aireportuan, Abiadura Handiko Trena hartu eta lurperatzea, eta automozioaren alorrean fabrikazio aurreratuko zentroa, sektoreari laguntzeko. “Seguru asko, horixe izango da Gasteizek berreskupenaren aldeko Europako estrategiaren bidez jorratuko duen proiektu anbiziotsuena”, esan du alkateak. “Gure enpresen etorkizunak baldintzatuko hiriarena. Jar gaitezen gure enpresen alde, berritzaile izan daitezen”, esan du.

 

Share

Gasteizek agintaldiko agendaren % 55 gauzatu du, 13 proiektu amaituta eta 73 abian dituelarik

Alkateak estrategia bat proposatu du udalaren aurrezpena eta inbertsio-ahalmena handitzeko, udal zerbitzuen sare iraunkorra eraikitzeko, auzoak eta espazio publikoa zaintzeko eta hiri seguruagoa eta garbiagoa edukitzeko.

 

Gorka Urtaran alkatearen adierazpenak

Alkateak udal politikari buruzko eztabaida orokorraren lehen saioaren erdia baino gehiago Agenda gasteiztarraren betetze-mailaren berri emateko erabili du; hau da, udal gobernuak 2019-2023ra bitartean martxan jarriko dituen ekimen nagusiak biltzen dituen agintaldiko planaren berri emateko. Programaren xede dira kalitatezko zerbitzu publikoei eustea, ekonomia berde eta lehiakorra garatzea, eta hiriari azpiegiturak ematea, Europan tamaina ertaineko hirien abangoardian egon dadin.

Gorka Urtaranek bere konpromisoen betetze-mailaren berri emateaz gain, estrategia bat proposatu die talde politikoei, udalaren aurrezpen garbia eta inbertsio-ahalmena handitzeko, adinekoak eta ahulak artatzeko udal zerbitzuen sare iraunkorra eraikitzeko, auzoak eta espazio publikoa zaintzeko, eta hiri seguruagoa eta garbiagoa izateko, besteak beste.

 

Agintaldiko konpromisoen erdia baino gehiago beteta

Gorka Urtaranek adierazi duenez, agintaldiaren erdian agendaren % 55 gauzatuta dago; 13 proiektu eginda daude eta beste 73 martxan. Gainera, Agenda gasteiztarra auzoz auzo izan da berriki. 6.610 pertsonak ikusi dute eta 1.658 ekarpen egin dituzte, eta horrek herritarren konpromiso-maila erakusten du.

Alkateak hiriko arlo estrategiko handietan egindako lana azaldu du, eta garatu beharreko erronka zehatzak identifikatu ditu.

Gizarte-ongizateari dagokionez, alkateak esan du “adinekoen taldea lehentasunezko kolektiboetako da. Bakardadea eta isolamendu-egoerak saihesteko adinekoei laguntza emateko udal sarea funtsezkoa izan da, eta funtsezkoa da, adineko guztiak ondo zainduta egon daitezen”. 

Aurreko agintaldian, Piztu zure auzoa programa jarri zen martxan Pilarren, Koroatzean eta Landazurin adinekoen bakardade eta isolamenduari aurre egiteko, eta orain auzo guztietara zabaldu da. Eta aipatutako helburu hori lortzeko zerbitzuek aintzatespena jaso dute estatuan eta autonomia-erkidegoan. “Piztu zure auzoa programak” Pilares Fundazioaren sari nazionala jaso du, eta “Zurekin gaude” programak Euskadi Lagunkoia 2020 saria. Azken honen bitartez, telefono deiak egin zaizkie konfinamenduan bakarrik bizi ziren adinekoei.

Bete den beste konpromisoetakoa da iazko urtearen amaieran San Martin adineko zentro berria (BIZAN) inauguratu zela.

Alkateak Etxean Laguntzeko Zerbitzua ere nabarmendu du mendekotasuna duten adinekoei etxean laguntzeko eta, hartara, komunitatean parte har dezaten errazteko baliabide gisa. “Etxean Laguntzeko Zerbitzuaren aurrekontua duela sei urte sartu ginenean zuenaren halako sei da ia. 2015ekoa baino sei aldiz handiagoa da ia. Gure adinekoen aldeko apustu garbia. Ekintzak dira, ez hitzak”.

 

Eguneko arreta-zentroetako itxarote-zerrendak desagertzea

Halaber, Gorka Urtaranek gogorazi duenez, eta hartutako konpromisoa betez, udal gobernuak zorroari buruzko dekretuak ezarritako eskumenen berrantolaketa bultzatzea adostu zuen aldundiarekin. Bultzada horri esker, Gasteizek etxebizitza komunitarioetan 25 plaza gehiago ditu eta 40 gehiago eguneko arreta zentroetan, eta horiei Berpizkundearen plazako eguneko arreta-zentroan sortuko direnak gehitu behar zaizkie. Ildo horretan, gobernu-taldearen helburua eguneko arreta-zentroetako itxarote-zerrenda desagertzea dela iragarri du alkateak 

Haur eta Nerabeentzako Tokiko Plana, hau da, egoerarik ahulenean dauden haur eta nerabeei arreta egokia emateko abian jarri beharreko ekintzak jasotzen dituen bide-orria, % 75ean gauzatuta dago 

Agenda gasteiztarraren beste konpromisoetako bat gizartetik baztertuta geratzeko arriskua duten pertsonei arreta ematea da. Azken urteotan nabarmen igo da bizitegi-bazterketa bizi duten pertsonen larrialdi-egoerei aurre egiteko etxebizitzen kopurua. Agintaldi honetan, 34 leku izatera igo da. Gainera, 21 Zabalguneko etxebizitzak bizitegi-bazterketa bizi duten familiei alokairuan esleitzeko prozedurari esker, beste 8 etxebizitza gaitzen ari dira, eta guztira 15 etxebizitza izango dira baliagarri.

Berdintasun Planak eta indarkeria matxistari aurre egiteko borroka ere alkateak azaldutako konpromisoetakoak izan dira, hiri plural eta inklusiboa izateko, non identitate eta orientazio guztiek leku izan dezaketen.

Garbiketa eta hondakinen kudeaketa ere izan ditu hizpide, kontrata berriak ekarriko dituen hobekuntzekin. Halaber aipatu ditu hirian segurtasuna hobetzeko emandako pausuak.

Gorka Urtaranek Kultura Sailaren ahalegina ere nabarmendu du, kultura sektorearentzat bereziki zailak izan diren hilabeteetan. Alkateak Kultura Bizia plataformari emandako laguntza gogoratu du,  Iradier Arenan —Euskadiko, Arabako nahiz Gasteizko erakundeekin elkarlanean— kultura-programazio zabala garatzen ari baita horri esker. Hezkuntzaren eta euskararen arloan emandako pausuen berri ere eman du.

 

Udalaren instalazioak eta espazio publikoa berritzea

Azken hamabost urteetan 75 udal eraikin eta instalazio berriri eman zaie alta (gizarte-etxeak, futbol-zelaiak, pilotalekuak, haur-eskolak, enpresa-mintegiak, auzokoentzako lokalak….). Ia denbora tarte berean, urbanizatutako azalera % 40 handitu da, hiria Salburua, Zabalgana eta Aretxabaletarantz hedatu baita. Bi datu adierazgarri horiek kontuan harturik, alkateak azpimarratu egin du  gero eta handiagoa dela erakinak, instalazioak, kaleak eta parkeak onik zaintzeko beharra.

“Ekitaldi honetan 7,2 milioi soberakineko dirua ere baliatu dugu herritarrek gehien eskatzen dituzten elementuak mantentzeko: udal eraikin eta instalazioetako inbertsioak, kaleen asfaltoa berritzea, zuhaitz-inausketak, espazio publikoko argiztapena hobetzea eta pandemiak gehien kaltetutako sektoreei laguntzea. Aurtengoa apartekoa izan da kudeaketa ekonomiko arduratsuari esker, eta denboran zehar jarraitu beharko luke” azpimarratu du alkateak.

Kirol eta osasun arloko ekintzei dagokienez, Gasteiz Sleep Smart City proiektua eta kirol-instalazioak hobetzeko inbertsio-ahalegina aipatu ditu Gorka Urtaranek.

 

Herritarrek aurkeztutako proiektuak, guztiak eginda edo martxan 

Herritarrek Vitoria-Gasteiz Hobetuz programaren bitartez aurkeztutako proiektuen betetze-mailari dagokionez, alkateak gogorarazi du lehenengo bi edizioetako proiektu guztiak gauzatuta daudela edo gauzatzen ari direla.

 

Zorroztasuna ekonomia-kudeaketan

Alkatearen ustez, XXI. mendeko hiriaren ardatzetako bat da konbinazio harmonikoa izatea industria-aztarna handia duen tokiko ekonomiaren eta ekonomia berdearen aldeko apustua egiten duen hiriaren artean.

“2020. urtea parentesi bat da, guztion osasuna izan baita lehentasuna. Orain, 2021eko udan, indarberritu egin behar dugu: bada baikorra izateko arrazoirik, zuhurtziaz ari gara bizitza-soziala, aisialdia eta kultur jarduerak berreskuratzen. Azken hamabi hilabeteetan, Orain Gasteiz Planaren lehentasunetako bat izan da tokiko ekonomiari, gure industriari, merkataritzari eta ostalaritzari laguntzea”  gogorarazi du alkateak.

Ekonomia Sustapenerako Sailak 3.81 milioi euroko aparteko funtsa bideratu du ehun ekonomikora, eta enplegua sustatzeko neurrien bitartez, 445 lanpostu sortzen lagundu du pandemia hasi zenetik.

Testuinguru ekonomiko benetan zail batean, diru-sarrera publikoen arloko ziurgabetasun handia eta pandemiari lotutako gastuen igoerarekin, pentsatu dugu ezinbestekoa zela udal gobernu serio eta zorrotza izatea” azaldu du Gorka Urtaranek. Berak azaldu duenez, 2020an 38 milioi euro murriztu dira diru-sarrerak, eta pandemiarekin lotutako gastuak, berriz, 23,12  milioi euro igo dira.

Zailtasun objektibo horiek gorabehera, lortu egin dugu aurrekontu-egonkortasunaren helburuak betetzea, hornitzaileei ordaintzeko batez besteko epea betetzea  (20,71 egun), zor publiko biziaren gehieneko mailen oso azpitik egotea eta gastu-araua betetzea.

 

Beste erakunde batzuekin hitzarmenak egitea hirira inbertsioak ekartzeko.

Ekonomia kudeaketarekin lotuta, ekintza hauek ere aipatu ditu: Iruzur Fiskalaren kontrako Plana 2021-2023, zeinen bidez hiru urte horietan 10.5 milioi euro lortu nahi diren;  Elkarrekin Podemos taldearekin lortutako aurrekontu-akordioa, hiriko inbertsioak finantzatzea xede udalaren lurzoru-ondarea saltzeko eragiketak zehazteko; hiriburutza kanona, 40 milioi euro lau urtean; foru-kanona, 2,5 milioi euro urtean lurraldean eragina duten inbertsioetarako; eta beste erakunde batzuekin egindako hitzarmenak hirira inbertsioak ekartzeko.

Atal honetan, berriki CONAMAn aurkeztu den Vitoria-Gasteiz Green Deal planarekin ematen ari diren aurrerapenak azpimarratu nahi izan ditu alkateak. “Zientzian oinarritutako plana. Zientziak lagunduko digu pandemiatik ateratzen, eta zientziak emango dizkigu eredu ekonomiko berrian ondo kokatzeko gakoak. Orain, inoiz baino gehiago, munduak eredu ekonomiko iraunkorrago eta “berdeago” baterako trantsizioaren alde egiten du. Europako ekimen nagusiekin bat gatoz eta norabide egokian pausoak ematen ari gara “.

 

 

Share

Covid-19ari aurre egiteko Udalak baliatu dituen 23,12 milioi euroek eskatu duten ahalegin ekonomiko handia azpimarratu du alkateak

  • Pandemiaren kontrako borrokan buru-belarri aritu direnei omenaldia egingo zaiela udazkenean, iragarri du Gorka Urtaranek

 

Gorka Urtaran alkatearen adierazpenak

Gasteizko Udalak Covid-19ri aurre egiteko abian jarritako ekimenen balantzea egin du alkateak udal politikaren inguruko debate orokorreko mintzaldiaren lehen partean. Datu bat nabarmendu du Gorka Urtaranek: pandemia hasi zenetik, 23,12 milioi euro bideratuak ditu Udalak Covid-19ari eta horren ondorioei aurre egitera. Orain Gasteiz Planeko hogeita hamar neurrien bitartez eman zaio bide ahalegin ekonomiko horri, eta aurrekontuan jasotako hainbat ekimen eta proiektu gehitu zaizkie horiei.

“Zailtasunik izan bada ere, eta izan da, Udalean, maila eman dugu. Ondo egindakoak eta akatsak gorabehera, pandemiari aurre egiteko baliabideak jarri ditugu”, adierazi du alkateak, pandemia hasi zenetik aste gutxira Orain Gasteiz Plana bezalako tresna bat edukitzearen garrantzia azpimarratu du. Urtebete geroago, plan horren % 80 gauzatua dago jada, eta hartutako konpromiso guztiak urtea bukatu aurretik bete ahal izango direla aurreikusten du alkateak. Hiru lehentasunetan zentratutako konpromisoak izan dira: osasuna babestu, pertsona guztien ongizatea bermatu eta gure ekonomia aldeztu.

Alderdi bat nabarmentzen da Covid-19ari aurre egiteko baliatu diren 23,12 milioi euroen banaketan, politika sozial eta soziosanitarioena. Izan ere, arlo horretan hainbat laguntza emateko baliatu dira 15 milioi euro baino gehiago. Ekonomia lokala garatzeko zuzeneko laguntzetara bideratu dira ia 4 milioi euro; besteak beste, merkataritzarako, ostalaritzarako edo enplegua sortzeko dirulaguntzetara. Beste 3,7 milioi euro gehitu behar zaizkio kopuru horri, pandemiak gehien kaltetu dituen sektoreentzako laguntza fiskalak direla eta. Pandemiaren ondorioz beren jarduerak bertan behera utzi behar izan zituzten kulturaren eta kirolaren arloetara 1,5 milioi euro bideratu dira.

Hau da burututako jardueren banaketa ekonomikoa:

 

Omenaldia, pandemiaren kontra borrokatu direnei

Alkatearen ustez, pandemiaren kontrako borroka, administrazio publikoen lehentasuna izateaz gain, gizarte osoaren ahalegina izan da. Batez ere osasun-langile guztiena, zeini esker ona helarazi baitie berriro ere. “Pandemiaren kontrako borrokan buru-belarri aritu direnei omenaldia egingo geniela agindu genuen orain urtebete; pandemiaren bilakaerak oraingo joerari eusten badio, urteko azken hiruhilekoan egingo dugu, ongi merezia baitute”, adierazi du Gorka Urtaranek.

Argiro erakusten dute datuek nolako ahalegina egin den: 210.000tik gora txerto jarri dira Arabako Erakunde Sanitario Integratuan; dagoeneko, 90.000 inguru pertsonak txerto osoa hartua dute, eta beste 120.000 pertsonak lehen dosia. “Bizitzak salbatzen dituzten zenbakiak dira, geure bizitza berreskuratzen lagunduko diguten zenbakiak”, nabarmendu du alkateak.

Gasteizen Covid-aren eraginez hildako 618 pertsonak ere gogoan izan ditu Gorka Urtaranek, eta haien senideak. “Ez ditugu ahazturik. Haien oroigarri iraunkorra izango da irailean inauguratutako Sempervirens espazioa”, adierazi du alkateak.

 

 

Share

Gorka Urtaran: “Dugun onena emateko unea da, eta hiriaren alde ahalegin betean lan egitekoa, ideologia hau partekatuz: Vitoria-Gasteiz”

Gerardo Armesto gasteiztarraren “Akordioen lekuan” lanaz baliatu da alkatea zinegotziei akordioak lot ditzaten eta ekarpen positiboak egin ditzaten eskatzeko. 

 

 

 

20210624 Udal Politika Orokorraren diskurtsoa

Udal politikari buruzko eztabaida orokorra egiteko hirugarren osoko bilkura ezohiko moduan hasi da.  Izan ere, alkateak Gerardo Armesto Larzabal artista eta irakasle gasteiztarraren “Akordioen lekuan” izeneko lana aurkeztu du, zeina udalaren arte garaikideko funtsen barruan baitago.  Lan horren bitartez, Gorka Urtaranek “udal politika orokorraren gaineko eztabaidari begira” duen “asmo nagusia irudikatu nahi izan du.

Hasteko, hiriak dituen erronka nagusiak identifikatu ditu alkateak, “diagnostiko errealista eta hurbilekoa eginez“. Orobat, udal zerbitzuen jardunaren eta pandemiak sortutako beharrei heltzeko inbertsioen berri eman du, eta Agenda Gasteiztarrean jasotako ekintzen betetze-mailaren kontu ere eman du. Ondoren, talde politikoekin adostu nahi dituen erronkak jarri ditu mahai gainean, “zerbitzu publikoen, ekonomia lehiakorraren eta ingurumen-iraunkortasunaren alorretan erreferentziazko superhiria bihurtzeari begira“.

“Gasteizen alde jo eta ke lan egin dezagun aukeratu gaituzte gure bizilagunek Udalbatza osatzen dugun hogeita zazpi pertsonok. Udalaren gurpilera igotzen garenean, pedalei gogoz eta erritmo bizian eragiteko da, hurrengo belaunaldiari lekukoa eman arte. Balia dezagun udalbatzan gauden denbora dugun onena emateko. Ekarpen positiboak egiteko“, nabarmendu du alkateak; izan ere, uste osoa du “dugun onena emateko unea” dela, eta “hiriaren alde ahalegin betean lan egitekoa. Alkatea naizen aldetik, oso argi dut nire ideologia Gasteiz dela. Parteka dezagun ideologia hori“.

Gainera, Gorka Urtaranek akordioetara heltzeko borondatea berretsi du, “erantzukizunez eta eskuzabaltasunez jokatuz. Osoko bilkura hau guztien ongiaren aldeko konpromiso pertsonala hartzeko lekua bihur dezagun. Bihur dezagun osoko bilkura hau irrikatzen ditugun akordioak lortzeko leku, pandemiaren ondoren Gasteizerako garai oparoa argitu dezaten”.

 

Alkateak proposatutako akordioak

Bere hitzaldian, Gorka Urtaranek akordiorako zenbait erronka eta gai aletu ditu. Zehazki, zahartzeari aurre egiteko udal zerbitzuen sare jasangarri bat osatzeko akordioa; bizitegi-bazterketako egoeran dauden familia ahulei arreta emateko akordioa, legez kanpoko okupazioari kontra eginez; udalaren inbertsio-ahalmena hobetzeko akordioa, aurrezpen garbia handituz; auzoen, instalazioen eta espazio publikoaren mantentzea bermatzeko; Hiri Antolamenduko Plan Orokor berria onartzeko, hiri industriala eta hiri berdea batuko dituena, eta hiriak mugikortasun iraunkor, seguru eta karbonorik gabekoa edukitzeko ordenantza berria izan dezan.

Gorka Urtaranek, halaber, adostasuna eskatu du Forondako aireportua eta industria logistiko eta aeronautikoa sustatzeko VIAP proiektua abian jartzeko, eta Miñaoko parke teknologikoaren azalera handitzeko, enpresa berriak erakartzeko aukera izan dezan.

 

Garatu beharreko ekimen zehatzak

Alkateak ekimen zehatzak identifikatu ditu udalaren ahalegina areagotzearren, gasteiztarren osasuna zaintzeko, adinekoentzako eguneko arreta-zentroetako itxarote-zerrendak desagerrarazteko eta bizitegi-bazterketa egoeran dauden pertsonentzako ostatu-baliabideak handitzeko, besteak beste.

Alkateak nabarmendu dituen ekintzen artean fabrikazio aurreratuko zentroaren abiaraztea dugu, baita startup enpresen azeleragailuarena ere, proiektu berritzaileak erakartzearren; tokiko ekonomia ehunari laguntzen jarraitzeko asmoa ere aipatu du, eta Gasteiz 2030erako karbonoan neutro diren lehen 100 hiri europarretako bat bihurtzea.

Energia berriztagarriak bultzatzeko plan bat ere jarri du mahai gainean Gorka Urtaranek, eguzki-energiaren bidez 120 megawatt sortuko dituena, bizikletentzako sarea mantendu eta zabaltzeko plan berezia, eta Herrandarren kaleko korridore berdea sortzea.

 

 

Gerardo Armestoren “mahaia”

Mahaiak, objektu misteriotsu gisa, ez dira inguruan esertzeko mahaiak, plataforma-mahaiak dira, elkarretaratze batean mugitzeko espazioak, elkarretaratze lasai, magiko, baketsuetarako. Irlatxoak dira, non ez baita pilatzeko aukerarik.  (…) Akordioen lekua hurrengo urratsa da; bertan komunikazioa agertzen da, ez da pertsona bakarrarentzako uhartetxoa, egoteko gela bat baizik, hiru aulki daude, eta espazioaren partiketak txoko babestuak sortzen ditu. Leku lasaia da niretzat. Nire koadernoan idatzi dut: ezer txarrik gerta ez daitekeen irlatxoa.

Gerardo Armesto

Diptikoa

 

Share

Herritarrek parte hartzeko Hobetuz programak 200 proposamen jaso ditu orain arte

  • Ideiak aurkezteko epea datorren astelehenera arte egongo da irekita, baina dagoeneko aurreko edizioan baino 30 proiektu gehiago ditu Udalak mahai gainean

 

Aurrekontu parte-hartzaileen Gasteiz Hobetuz programak, zeina Udaleko Partaidetzaren eta Gardentasunaren Zerbitzuak sustatzen baitu, 200 proposamen jaso ditu gaur arte. Aurreko edizioaren aldean handitu egin da kopurua, orduan 170 jaso baitziren. Ekainaren 28ra arte (astelehena) jarraituko du zabalik proposamenak aurkezteko epea.

 

Herritarren Partaidetzaren zinegotzi Borja Rodríguez:  “Aurtengo edizioa arrakastatsua izaten ari da parte-hartzeari dagokionez, eta oraindik bada ekarpenak egiteko denborarik. Gasteizko bizilagunak dituzten ideiak aurkeztera animatu nahi ditut. Hiria hobetu nahi dugu, haien proposamenak entzunez. Eskaerak gauzatzeko 3 milioi euroko aurrekontua erreserbatu dugu”.

 

Hobetuz aurrekontu parte-hartzaileak egiteko programa da, eta hari esker herritarrek erabaki dezakete Gasteizko aurrekontuko 3 milioi euro zertara bideratzen diren. Azken batean, zuzeneko demokraziarako tresna da, gasteiztarrek zuzenean erabaki dezaten zertan inbertitu nahi duten udal aurrekontua.

Aurtengo edizioan, maiatzaren 3tik ekainaren 28ra arte aurkez ditzakete proposamenak herritarrek. Proiektuak balioesten direlarik, urriaren 4an argitaratuko dira udalaren webgunean, herritarrek azarotik aurrera gustukoenak aukeratzerik izan dezaten. Bozketak online edo aurrez aurre egin ahalko dira, herritarrei laguntzeko bulegoetan (gizarte-etxeetan zein San Antonio kaleko bulegoan), San Martineko bulego teknikoetan, eta, lehen aldiz, adinekoentzako zentro soziokulturaletan.

Aurreko edizioetan bezala, zenbait haztapen-irizpide ezarri dira: belaunaldien arteko bizikidetza, genero-berdintasuna,eta kultura aniztasuna eta/edo dibertsitate funtzionala. Aurten hiru irizpide berri gehitu dira: talde ahulenen gizarte-inklusioa, iraunkortasuna eta ingurumenaren babesa, eta arrakala digitala txikitzea.

Hobetuz programak badu beste berritasunik: hiriko haurrek ere parte hartu ahalko dute programan, eta udal aurrekontuko 200.000 euro zertan gastatu erabaki. Gainera, lehen aldiz, aurrekontu osoaren % 20 jarduera-programetara bideratuko da, eta gainerako % 80a inbertsioetara.

 

 

Share