Prentsa Oharren banner

Prentsa-deialdiak (2021-07-30)

Gorka Urtaran alkatearen prentsaurrekoa

Gobernu-batzordearen ondoren, Vitoria-Gasteizko alkate Gorka Urtaranek Udalaren gaur egungo gaiak hizpide izango ditu.

Parte hartzaileak. Vitoria-Gasteizko alkate Gorka Urtaran

Eguna. Ostirala, uztailak 30

Ordua. 11:00

Tokia. Udaletxeko prentsa aretoa

Share

Gasteizko 2021eko Soziometroak erakutsi duenez, hiritarrek udalerriarekin asebetetze maila handia dute eta COVID-19aren pandemiaren ostean baikortasuna berreskuratu dela erakusten du

Hiriarekiko balorazioak 8,23ko nota jaso du; iaz 8,0koa izan zuen

 

Ekainean zehar egindako inkestetan 1.150 lagunek baino gehiagok hartu dute parte

 

Gasteizko Udalak gaur argitaratu du Gasteizko Soziometroaren hirugarren edizioa, hiritarrek udalerriaren beraren kudeaketaz, udal-kudeaketaz eta bertako zerbitzuez duten asebetetze mailari buruzko analisi zehatza da. Azterketa prestatu ahal izateko ekainean zehar egindako inkestetan, 1.150 lagunek baino gehiagok hartu dute parte Azterlanak aurreko urteetakoen antzeko egitura du eta gasteiztarrek udalerriaz eta Udalaz duten iritzia neurtzeko eta haren jarraipena egiteko aukera ematen du.

 

Azterlanetik atera daitekeen lehen ondorioa da Gasteizen bizi direnek nota bikaina ematen diotela hiriarekin, bizitzeko toki gisa, duten asebetetze mailari. Hain zuzen ere, 8,23ko balorazioa eman diote; 2020an erregistratutakoa, ordea, 8,02koa izan zen. Hiriak dituen alderdi positiboei dagokienez, inkesta egindakoek eremu berde eta pasealekuak eta zerbitzu publikoak nabarmendu dituzte, baita, oro har, bizi-kalitate ona ere.

 

Dokumentuak ekonomiari eskainitako blokea du, eta horren arabera, hiritarrek ekonomia pertsonalaren inguruan duten pertzepzioa nahiko positiboa da, 10etik 6,62 lortuta. Azterlanaren testuinguruan aztertu den beste gaietako bat izan da Gasteizerako lehentasunena. Eta, kasu horretan, inkestaren ondorioa izan da enpleguak eta ekonomiak izan behar dutela datozen urteetako jarduera-ildo nagusiak. Jarraian etorriko lirateke hirugarren adinekoen zaintza eta arreta, garraio publikoa eta hiri-mugikortasuna hobetzea eta auzoen arteko oreka, batez ere.

 

Gasteiztarrei hirirako proiektu berrien inguruan egiten duten balorazioa eta ezagutza maila zein den ere galdetu zaie. Arlo horretan, lortutako atxikimenduari dagokionez, honako hauek nabarmendu dira: Herrandarren kalearen etorkizuneko birgaitze integrala (7,27), kaltetutako eremuak berroneratzeko Ekoauzoak proiektua (7,25) eta tranbia Salburara eta Zabalganara zabaltzea (6,77). Balorazio baxuena jaso dutenen artean dago, aldiz, Iradier Arena berritzea (4,25).

 

Bestalde, Bus Elektriko Inteligenteari eskainitako atal bat ere badago. Garraio publikoaren etorkizuneko sistema horrek jendearen artean erabateko ezagutza maila du (%95,7), baina horren inguruko balorazioa zatituta dago, alde batetik proiektua onartzen dutenak (%44,4), eta bestetik, onartzen ez dutenak (48,1) eta %7,5ak ez du erantzunik eman nahi. Egoera horren ondorioz, desbideratze tipiko oso handia erregistratu da (3 puntu baino gehiagokoa), eta beraz, normalean baino polarizazio handiagoa erakusten du horrek. Balorazio negatiboaren motiboak, funtsean, BEA ezartzeko egin beharreko obrei eta zirkulazioan izango dituen ondorioei lotutakoak dira.

 

Mugikortasun arloan ere galdetu zaie gasteiztarrei zein den beren iritzia bizikletak espaloietatik ateratzeko Gobernuak aurkeztutako mugikortasuneko ordenantzaren proposamenaren inguruan. % 76 planteamenduarekin ados daude eta hiritarrek aldaketa hori errazteko txirrindularien azpiegitura-sarea hobetzen jarraitzea ere planteatu dute.

 

Udalaren kudeaketa

Soziometroak neurtu duen beste alderdi bat da Udalaren kudeaketarekin lotutakoa. Bloke honetan, Gasteizko Udalak 5,6/10eko puntuazioa lortu du. Ondorioz, iazko datuekin alderatuta, zertxobait hobetu dela esan dezakegu. Eta udal-kudeaketaren balorazio zehatza egiteko garaian, edonola ere, aztertutako esparru guztietan oso batezbesteko positiboa ikusi dugu: 6 eta 6,5 artekoa (10etik). Hala, nabarmendu beharrekoak dira honako hauek lortutako iritzi onak: kiroletako eta kultura arloko instalazioak (7,37), garraio publikoa (6,5), hiritarren segurtasuna (6,4) lorategi eta parkeen mantentzea (6,3) eta zabor-bilketa eta garbitasuna (6,3ko nota). Balorazio baxuena zirkulazioaren erregulazioak (5,1), tokiko jarduera ekonomikoari emandako laguntzak (5,5) eta lurraldearen antolamenduak eta lurzoruaren erabilerarekin lotutako hiriko diseinuak (5,8) jaso dute.

 

Era berean, beste bloke batek hiritarren parte-hartzearekin lotuta hiritarrek duten ikuspegia aztertu du. Inkestari erantzundakoen % 64,5ek diote parte-hartzearen inguruko berri badutela edo zerbait entzun dutela, eta ezinbestekotzat jo dute. Baina, pertsona horietatik, erdiak aitortu du horietako parte-hartzaile aktibo izateko prest egongo litzatekeela.

 

Egoera politikoa

Barometroak egoera politikoari buruzko bi atal ere baditu. Alde batetik, balorazio orokorra egin da eta bertan ikusi da hiriko alkateak, Gorka Urtaranek, ia ezagutza-kuota unibertsalak dituela; izan ere, gasteiztarren ia %  96ra iritsi da. Gasteizko alkateak 5,38ko balorazioa lortu du. Hain zuzen ere, Udaleko arduradun politiko guztien artean nota altuena lortu duena izan da. Bestalde, gehiengo handi batek (% 64 inguruk) ontzat eman du Gorka Urtaranek Gasteizko Udala zuzentzen egindako kudeaketa-lana. Era berean, udal-gobernuaren kudeaketak 5,7ko balorazioa lortu du 10etik, eta oposizioak, aldiz, huts egin du (4,81).

 

Galdetegiak, gainera, hauteskundeetarako azterlana ere jasotzen zuen. Ikerlan honetan haztatutako boto-asmoak agerian utzi du EAJk egungo egoerarekin alderatuta zinegotzi bat irabazi eta zortzi zinegotzi eskuratuko lituzkeela. Aldiz, EH Bildu Udalbatzan 6 ordezkari izatetik 7 izatera igaroko litzateke. PSE-EEk 6 zinegotziak mantenduko lituzke. PP 5 izatetik 4 izatera igaroko litzateke, eta Elkarrekin Podemos 3tik 2ra.

 

Pandemia

Soziometroak aztertutako azken blokea COVID-19aren pandemiarekikn lotuta dago. Inkestari erantzundakoen gehiengoak (% 76,6) uste du susperraldia mantsoa eta pixkanakakoa izango dela. Horrekin lotuta, deigarria da datu hau: pandemiak nolabait eragin dion zuzeneko galderaren aurrean, inkestari erantzundakoen % 42,4k inpakturik ez duela izan erantzun du. Dena den, % 55ek uste du eragin negatiboa izan duela eta bereziki konfinamenduarekin, sozializazio-gabeziarekin, tristurarekin, enplegua galtzearekin eta osasuna okertzearekin lotutako egoera psikologikoei dagokienez (besteak beste).

 

Txostena esteka honetan dago irakurgai: https://v-g.eus/377eLdn

Share

Alkateak eta Segurtasuneko sailburuak zuhurtzia eta laguntza eskatu diete herritarrei, datozen egunetan osasun-araudia errespeta dadin

Gorka Urtaran alkatearen adierazpenak

Vitoria-Gasteizko Udaltzaingoak eta Ertzaintzak elkarrekin koordinatuko dira segurtasun-distantziak behar bezala bete daitezen, edukiera-mugak errespeta daitezen, aglomerazioak saihets daitezen, kalean alkohola kontsumi ez dadin, maskarak erabil daitezen eta kutsadurak ez ugaritzeko diseinatutako gainerako osasun-araudia bete dadin

Gorka Urtaran Gasteizko alkateak eta Josu Erkoreka lehenengo lehendakariorde eta Segurtasuneko sailburuak gaur goizean deitu dute Ertzaintzaren eta Vitoria-Gasteizko Udaltzaingoaren arteko Koordinazio Batzordea, hau da, Eusko Jaurlaritzaren eta Udalaren arteko segurtasun publikoaren arloko lankidetza-organo gorena. Bileraren helburu nagusietako bat izan da bi polizien artean koordinatutako neurriak eta operatiboak aztertzea eta planifikatzea, indarrean dagoen osasun-araudia errespeta dadin, batez ere abuztuaren 4tik 9ra bitartean; izatez, egun seinalatuak dira horiek Vitoria-Gasteizen, jaiak egun horietan ospatzen baitira —bigarren urtez jarraian bertan behera geratu dira—.

Ildo horretan, Erkorekak eta Urtaranek gogorarazi dute aurten jaiak modu publikoan ez ospatzeko eskatu dutela erakundeek. Hori dela eta, erantzukizunerako mezu argia eta irmoa eman dute, egun horiek indarrean dagoen osasun-araudia errespetatuz bizi daitezen. Bi agintariek adierazi dutenez, garrantzi handikoa da aglomerazioak saihestea, eremu publikoan edari alkoholdunik ez kontsumitzea, aforoen mugak errespetatzea, babes-maskara erabiltzea, segurtasun-tarteei eustea, eta abar.

Bi erakundeek ezinbestekotzat jotzen dute gasteiztarren eta egun hauetan euskal hiriburura joaten diren pertsonen laguntza indibiduala eta kolektiboa. Segurtasunaren aldeko polizia-koordinazioaren adibide gisa nabarmendu da Vitoria-Gasteizko esperientzia eta eredua; izatez, bi polizien arteko lankidetza-protokolo espezifiko bat dago aspalditik, berriki berritu dena.

Andre Mari Zuriaren plaza eta Erdi Aroko Hirigunea

Ertzaintzak eta Vitoria-Gasteizko Udaltzaingoak prestatzen dituzten dispositiboen artean, nabarmentzen da Andre Mari Zuriaren Plazan pilaketak saihesteko aurreikusitakoa, batez ere abuztuaren 4an. Iragarri denez, ez da Zeledonen jaitsierarik izango, eta, istiluak saiheste aldera, erabaki da Andre Mari Zuriaren Plazaren perimetroa hesi bidez ixtea, Ertzaintzako eta Udaltzaingoko kideen zaintzarekin. Itxiera hori 16:30etatik 19:00etara egingo da. Gainera, 15:00etik 19:00etara bitartean ez da plazan mahaiak jartzea baimenduko, nahiz eta barneko jarduera baimenduko den.

Era berean, jendea pilatu ohi den kaleetan eta tokietan prebentzio-lana areagotuko da, eta arreta berezia eskainiko zaio Erdi Aroko Hirigunean izaten den jende-pilaketari. Udalak egindako kontzertuak eta jarduerak izango dira ekitaldi ofizial bakarrak, eta ekitaldi horietan Udalak berak kontrolatuko ditu aforoa eta parte-hartzaileen arteko distantziak.

Eremu publikoan alkohola kontsumitzeko debekua ere gogorarazi behar da. Hori dela eta, Herritarren Babeserako patruilak, jai-ospakizunak saihesteaz gain, “kale-edanak” eta antzekoak saihesten saiatuko dira; pertsonei debeku horren berri emango diete, eta, behar izanez gero, zehapen-proposamenak egingo dituzte.

Bileran aditzera eman denez, funtsezkoena izango da osasun-arauak errespetatzea eta COVID-19ak eragindako pandemiaren egoera oker dezaketen arrisku-egoerarik ez sortzea.

Koordinazio Batzordea

Ertzaintzaren eta Vitoria-Gasteizko Udaltzaingoaren arteko Koordinazio Batzordean” parte hartu dute, Josu Erkoreka lehendakariorde eta Segurtasuneko sailburuaz eta Gorka Urtaran Vitoria-Gasteizko alkate eta EUDELeko presidenteaz gain;

  • Herritarren segurtasunaren zinegotziak, Marian Gutiérrez
  • Herritarren segurtasunaren koordinatzaile nagusiak, Víctor García Hidalgo
  • Herritarren segurtasunaren zuzendariak, Javier Sáez Lanas
  • Vitoria-Gasteizko Udaltzaingoko komisarioak, Roberto García Tobalina
  • Vitoria-Gasteizko Udaltzaingoko komisariondokoak, Salva Alvarez
  • Segurtasuneko sailburuordeak, Josu Zubiaga.
  • Ertzaintzaren Arabako Lurraldeko intendente buruak, Karmelo Martínez Sarobe.
  • Vitoria-Gasteizko Ertzain-etxeko Herritarren Babeserako komisario buruak, Iñaki Larruri.
  • Koordinazio Batzordeko ofizial idazkariak, Alfredo Orodea.

 

 

 

 

 

 

 

Share

Herri-kirolak izango dira Landatxoko kiroldegian abuztuaren 6an, 7an eta 8an

Herri-kirolak programatu ditu Gasteizko Udalak abuztuko hiru egunetarako; hain zuzen ere, hilaren 6, 7 eta 8rako. Ezingo da erabili halakoetan ohikoa den lekua, Foru plaza, egoera sanitarioaren ondoriozko murrizketak direla eta, baina alternatiba bat aurkitu da, Landatxoko kiroldegia. Kirol-ekitaldiak ikusleekin egiteko aukera bermatzen du ekipamendu horrek, 119 lagunentzako edukierarekin abuztuaren 6an eta 8an, eta 107 lagunentzakoarekin, hilaren 7an —ikusle batzuk harmailetan, besteak aulkietan—.

Udalak bultzatu eta Arabako federazioak diseinatutako programazioak hainbat modalitate bilduko ditu, ezagunenak eta hain ezagun ez direnak. Programak Laboral Kutxaren laguntza dauka, gainera. Herri-kiroletan aritzen diren emakumeei ikusgarritasuna eman nahi izan zaie, eta, horrenbestez, programazio orekatua bilatu da, emakumezko nahiz gizonezko modalitateekin, baita modalitate mistoekin ere.

Hiru egun izango dira, eta herri-kiroletako erreferente lokalak ikusteko aukera izango da. Nabarmentzekoak, Garbiñe López de Uralde eta Ruth Linaza, ‘lasto jasotze’ modalitateko Arabako txapelduna eta txapeldunordea. Orobat parte hartuko du ‘lasto jasotze’ modalitateko Arabako txapeldun eta Euskadiko txapeldunorde Andoni Elizondok. ‘Trontza’ modalitate mistoan, Garbiñe López de Uralde eta Jon Lapazaran arituko dira, hainbat urtez txapeldun izanak. Jon Lapazaran, gainera, ‘ingude’ eta ‘sega’ modalitateetako Euskadiko txapelduna izana da. Nabarmentzekoa, era berean, Kerman Perez de Heredia, hainbat urtez Arabako eta Euskadiko ‘txinga’ modalitateko txapeldun izana.

Kirol eta Osasun zinegotzi Livia Lópezek aurkeztu du egitaraua, Arabako Herri-kirolen Federazioko lehendakari eta lehendakariorde Jesus Atxa eta Jon Lapazaranekin batera. “Urte gogorra izan da kirolarentzat. Bereziki gogorra euskal kirolei dagokienez. Izan ere, espazio irekietan egin ohi dira, gure kale eta plazetan, eta horietan oraindik ere ez da ikuslego handirik biltzea. Hala ere, uda honetan, herri-kirolak izango ditugu hiru egunez, beren protagonista handiekin eta Landatxoko kiroldegira jotzen duten ikusleen harrera beroarekin”, adierazi du Livia Lópezek.

Hau izango da egitaraua:

2021eko abuztuaren 6an:

  • Zaku eramatea: Zakua sorbalda gainean hartuta, ibilbide jakin bat egin behar da ahalik eta azkarren. 4 gizonek parte hartuko dute.
  • Harri jasotzea: Lurretik bizkarrera altxatu behar da harria, eta bertan berdindu. 2 gizonek parte hartuko dute.
  • Orga Jokoaren Arabako Txapelketa: Gurdi bat altxatu behar da atzealdetik, eta behin altxatuta, endaitza ardatz gisa hartuta eta punta lurreko leku finko batean finkatuta, haren inguruan birarazi, gurpilek lurra ukitu gabe, eta ahalik eta distantziarik handiena egin. 4 gizonek parte hartuko dute.
  • Txinga eramatea: Ahalik eta distantziarik handiena egin behar da, bi txingarekin, denbora mugarik gabe. 2 gizonek eta 2 emakumek hartuko dute parte.

2021eko abuztuaren 7a: 

  • Arabako trontza txapelketa: Helburua neurri jakineko enborrak ahalik eta azkarren moztea da, horretarako trontza erabilita 4 gizonek eta 4 emakumek parte hartuko dute.
  • Lokotx bilketa: Ilaran jarritako lokotxak (1.25 metroko tartea lokotxen artean) saski batean ahalik eta azkarren batu behar dira. 2 gizonek eta 2 emakumek parte hartuko dute.
  • Arabako lasto-jasotze txapelketa, emakumeak: Ahalik eta gehienetan jaso behar da lasto-zama altuera jakin bateraino. 4 emakumek parte hartuko dute.
  • Zaku eramatea: Zakua sorbalda gainean hartuta, ibilbide jakin bat egin behar da ahalik eta azkarren. 4 emakumek hartuko dute parte.

2021eko abuztuaren 8a:

  • Arabako lasto-jasotze txapelketa, gizonezkoak: Lasto-zama altuera jakin bateraino ahalik eta gehienetan jaso behar da. 4 gizonek parte hartuko dute.
  • Arabako ingude txapelketa, emakumeak: Ahalik eta gehienetan igo behar da burdinazko ingudea oinarri jakin batetik altuera jakin batera. 4 emakumek parte hartuko dute.
  • Aizkolaritza: Aizkoraz halako neurriko enborrak albait azkarren moztea da jokoa. 3 gizonek parte hartuko dute.
  • Harri jasotzea: Lurretik bizkarrera altxatu behar da harria, eta bertan berdindu. Gizon batek parte hartuko du.

12:00etatik 13:00etara bitartean egingo dira saioak. Sarrera librea izango da, erreserbatu beharrik gabe eta lekuak bete arte. Ateak 11:45ean irekiko dira ikusleentzat.

 

Share

Atxilotua agenteak iraintzeagatik eta eraso egiteagatik

Udaltzainek atzo 27 urteko gizonezkoa atxilotu zuten agintaritza-agenteen aurkako atentatuaren ustezko delitua egiteagatik.

21:15 inguruan, Koordinazioko Zentralak patruila bat eskatu zuen Jesusen Zerbitzarien kaleko ostalaritza-establezimendu batean, gizonezko bat arazoak sortzen ari zelako. Agenteek egiaztatu ahal izan zutenez, arratsalde horretan bertan zenbait gorabeheraren protagonista izandako pertsona bera zen.

Gizonezkoa bere onetatik aterata zegoen eta patruila iraintzen hasi zen, bere buruari lesioak eragiten, barneko altzariak kolpatzen eta agenteen aurka eraso egiten; beraz, atxilotu egin zuten.

Guardiako epaitegiari dagozkion eginbideak egin ostean, aske utzi zuten.

 

Share