Prentsa Oharren banner

Covid-aren ondorioak kudeatzeko proposamenetan zentratuko den Kaleidos Sarearen lehen patronatuaren buru izango da Gasteiz

● Sendotze lokala, harreman ekonomiko berrietarako trantsizioa eta errealitatea aztertzeko indize berriak jorratuko dira jardunaldi teknikoan
Kaleidos Sarearen patronatuaren buru izango da Gasteizko Udala gaur arratsaldean, sarea osatzen duten bederatzi udalerrietako arduradun politiko eta teknikoak bilduko dituen topaketan. Sendotze lokala, harreman ekonomiko berrietarako trantsizioa eta errealitatea aztertzeko indize berriak jorratuko dira Borja Rodríguez Herritarren Partaidetzaren eta Gardentasunaren zinegotziak inauguratuko duten jardunaldi tekniko horretan. Gasteiz, gaur egun sarearen buru denez gero, anfitrioi izango da oraingo honetan, eta modu birtualean egingo da topaketa.
Gasteiz, Sant Boi de Llobregat, Getafe, Malaga, Bilbo, Burgos, Alacant, Santiago de Compostela eta Valentziako udalek osatzen dute Kaleidos sarea, 2000 abian jarritako proiektua, zeinen helburua baita administrazio lokalaren eta herritarren arteko interakzioa hobetzeko lan egitea. Topaketen giltzarria da udalek beren esperientziak eta proposamenak partekatzea, herritarren partaidetza hobetzeko, eta, hartara, bizi diren hiriei buruzko erabakiak hartzeko orduan inplikatu daitezela lortzeko.
“Sare honen bereizgarria da Espainia osoko udalak biltzen dituela, tamaina eta ezaugarri desberdinekoak, kolore politiko bateko eta bestekoak. Denok gara jakitun udalerriaren rola, udal-politikarena, inoiz baino erabakigarriagoa izango dela herritarrek Covid-aren ondoko aroa biziko duten moduan, eta erabakiak hartzen inplika daitezen lan egin beharra dago”, adierazi du Herritarren Partaidetzaren, Gardentasunaren eta Gizarte Etxeen Saileko zinegotzi Borja Rodríguezek.
Patronatuaren bileran, konfinamendu betean grabatutako bideo bat aurkeztu da, zeinek zuzenean laburtzen baititu sareko udal batzuen eta besteen proposamenak. Hain zuzen ere, zortzi proposamen zehatz lantzen eta garatzen ari da Kaleidos Sarea, Covid-19aren pandemiak eragindako egoera eta horren ondorioak kudeatzeko.
Sareko hirien ikuspegi estrategikoak partekatzea da gaurko topaketaren helburua, jakitun izanik udalek eragile izan behar dutela, krisialdi honetan, hirietako bizitza suspertzeko orduan. “Pobrezia ekiditea, desberdintasunak murriztea, zaurgarritasunari aurre egitea, gure lurraldea lehiatzeko eta lankidetzan jarduteko posizionatzea, horiek dira Covid-aren ondorengo politika lokalaren ardatzak”, adierazten da bere dokumentuetan.
2000. urteaz geroztik ari da lanean Kaleidos Sarea, atxikitako udalen esperientziak eta ikuspegi estrategikoak partekatzeko, honako hauen inguruan: sentsibilizazio-, partaidetza- eta komunikazio-prozesuak herritarrekin; administrazioen modernizazioa, aurrez aurreko lana eta lan telematikoa txertatuz; hurbileko ekipamenduak birdiseinatzea; harreman ekonomikoen eredu berrietarako trantsizioa; etika publikoko sistemak indartzea; errealitatea aztertzeko indize berriak planteatzea, eta gardentasun-mekanismo guztiak sendotzea.
Share

21 Zabalguneko lehendakariak Gasteizko bizitegi-eraikinak birgaitzeko arau berria lantzeko lantaldearen lehenengo bilerara deitu ditu kontseilukideak

Atzo eratu zen Gasteizko bizitegi-eraikinak birgaitzeko arau berria lantzeko lantaldea, eta 21 Zabalguneko lehendakari Ana Oregik lehenengo bilerara deitu ditu administrazio kontseiluko kideak. Uztailaren 14an izango da bilera, eta hasteko, arau berria idazteko bildu diren agiri guztiak aztertuko dira, gaur bertan bidali baitizkiete horretaz arduratuko diren kontseilukideei.

Batetik, Hiri Berrikuntzarako Udal Eragintegiaren laguntzen araua bidali zaie, zeina 2011ra arte egon baitzen indarrean. Arau hartan hipoteka-bermeak ezartzen ziren, etxebizitza edo lokala hamar urteko epean salduz gero laguntzak itzul zitezen ziurtatzeko. 21 Zabalgunearen laguntzen araua ere helarazi zaie, zeina 2012tik 2018ra arte egon baitzen indarrean. Bertan zehazten zenez, laguntzek interesik gabeko hipoteka maileguen izaera zuten, eta hamar urteko epearen barruan etxebizitza irabaziekin eskualdatzen bazen, itzuli egin beharko ziren.

Lehendakariak beste agiri hauek ere bidali dizkie kontseilukideei: 21 Zabalgunearen Estatutuak; laguntzen arau berria lantzeko oinarriak, Administrazio Kontseiluak 2020ko otsailaren 24an onetsitakoak, eta laguntzen arauaren zirriborroa, kontseiluari maiatzaren 4an aurkeztua. Azken hori lantzeko 2018ra arte indarrean egon ziren arauak eta onetsitako oinarriak baliatu dira. Berritasun hauek nabarmentzen dira: automatikoki itzuli beharrik gabeko laguntza bihurtzeko aukera kentzea; finantzatzen den kopurua benetako kostuaren % 100era igotzea; laguntzaren zenbatekoa itzultzeko epeak luzatzea, eta itzuli beharrik gabeko laguntzak mantentzeko aukera uztea, Udalaren kudeaketa-gomendio baten bidez.

“Beharrezko informazio guztia bildu ondoren, kontseilukideei bidali diegu, zorrotz aztertzerik izan dezaten eta hilaren 14an arau berria idazteko lanari ekiterik izan dezagun, eraginkortasunez eta efikaziaz jokatu ahal izateko”, adierazi du Ana Oregik.

Share

Bihar irekiko dira berriro Salburuko eta Ariznabarreko rokodromoak

  • Abetxuku, Adurtza, Astronomo eta Zaramagako pilotalekuak ere asteazkenetik aurrera erabili ahalko dira zuzenean, erreserba eginda

 

Udalaren kirol instalazioak berriro jardunean hasteko bidean beste urrats bat egingo da bihar, bi rokodromo, lau pilotaleku eta squash pista bat berriro irekiko baitira herritarrek zuzenean erabiltzerik izan dezaten, behar diren segurtasun-protokoloak ezarrita.

Rokodromoen kasuan, baldintzak aldatu egin dira edukierari dagokionez (Salburuan, 10 pertsona, Ariznabarrean, 18), baita egin daitezkeen ariketei dagokienez ere. Instalazioetan sartu eta handik irteteko maskara erabili beharko da nahitaez, eta ezingo da ez aldagelarik ez dutxarik erabili. Higiene-baldintzak bermatzearren, material batzuk ezingo dira erabili, eta beste batzuk desinfektatu egingo dira. Esteka honetan kontsultatu daiteke araudi berria.

Ordutegi hauek izango dituzte rokodromoek, astelehenetik ostiralera: Salburuan, 9:00etatik 18:00etara; Ariznabarrean, 18:00etatik 20:45era. Asteburuetan itxita egongo dira.

Bestetik, bihar hasiko dira jarduerak Abetxuku, Adurtza, Astronomo eta Zaramagako pilotalekuetan, zuzeneko erreserba eginda. Atzodanik erreserbatu daitezke, eta leku bakoitzean dagozkion euskal pilotako modalitateak praktikatu ahalko dira. Erabiltzaileek maskara eraman beharko dute, kirola egiten ari direnean izan ezik. Materialak desinfektatu egingo dira erabili aurretik eta ondoren, bakoitzak bere kirol-poltsa eraman beharko du, eta ezingo da espazio komunetan egon.

Bihartik aurrera, halaber, Hegoalde gizarte etxeko squash pista erabili ahalko da zuzeneko erreserba eginda. Horietaz gain, beste pista batzuk irekiz joan dira Mendizorrotzeko eta Gamarrako instalazioetan zein gizarte etxeetan: badminton, tenis, mahai-tenis eta padel pistak.

Gizarte etxeetako ariketa gelak ere atzodanik daude zabalik. Segurtasun-protokoloak ezartzen du maskara eraman behar dela sarbideetan, eta ezin dela ez aldagelarik ez komunik erabili. Edukiera kontrolatuko da, gela bakoitzean horren % 50 ez gainditzeko, eta erabilitako materiala behar bezala desinfektatuko da. Esteka honetan kontsultatu daitezke ariketa gelen erabilera- eta segurtasun-arauak.

Share

Udal txosten batek berretsi egin du Gardelegiko zabortegian hondakin gehiago onartzearen bideragarritasun tekniko eta ekonomikoa

Lurraldearen eta Klimaren aldeko Ekintzaren Saileko Hondakinen Kudeaketarako Atalak txosten bat egin du Gardelegiko zabortegiaren edukierari buruz eta hura handitzeko aukerei buruz. Bertan, instalazio horretan hondakin gehiago sartzearen bideragarritasun tekniko eta ekonomikoa berresten da. Dokumentuaren ondorioetan adierazten denez, legez behartuta dago hala eskatzen duten enpresen hondakinak onartzera, eta, horrez gain, Udalak irtenbide teknikoa du hondakin gehiago sartzearen inpaktua saihesteko, erakundeari kosturik ekarri gabe. Gainera, tona bakoitzeko ustiapen-kostua % 65era jaitsi daiteke; beraz, ekonomikoki, bolumen handiago onartzea onuragarria izango litzateke udal interesetarako.

Arlo juridikoan, horri buruz berariaz egindako txosten bat oinarri hartuta, argi geratzen da Gasteizko Udalak nahitaez onartu behar dituela indarrean dagoen zerbitzu-erregelamenduaren baldintzak betetzen dituzten hondakinak, erregelamendu horretan ezarritako muga eta baldintzekin.

Hondakinak sartzeko erritmo handiago hori konpentsatzeko, komenigarritzat jotzen da eraikuntza- eta eraispen-hondakinen instalazioa martxan jarri zenetik aktibo ez dagoen geldoen putzua eraberritzea.

Putzu hori eraberritzeak ez luke eragin ekonomikorik izango udal kontuetan, zabortegia kudeatzeko kontratuan kostu gehigarririk gabe egin beharreko hobekuntzen barruan sartuta baitago. Txostenaren arabera, erreforma horrek 281.984 metro kubiko gehiago izatea ahalbidetuko du, eta horrek 211.488 tona hondakin gehitzea ekarriko luke.

Gaur egun, hondakinak onartzeko eskaerek 42.600 tona inguru hartzen dute, baina azpimarratu behar da eskaera horiek kuantifikatzeak ez duela esan nahi material hori azkenean Gardelegin utziko denik. Berez, 22.000 tona inguruko eskaerak onartu dira (horietatik 5.000 inguru sartu dira). Tona-kopuru handiagoa onartzeak ekar dezakeen eragin ekonomikoa aztertzean, hainbat aldagai hartzen dira kontuan, eta hortik ondorioztatzen da ezen eskatutakoaren guztizkoa hartuz gero, gutxienez 1.362.774 euroko diru-sarrera sortuko litzatekeela.

Udalak lurraldetik datozen eta Gardelegin onartu behar diren hondakinen kopurua handitzea bere gain hartu behar duela eta har dezakeela egiaztatzeaz gain, txostenak azpimarratzen du ondorio hori urtero berraztertu behar dela, lau faktoretan oinarrituta: isurketa-tasak eta zerbitzuaren benetako kostua egokitzea, etorkizunean izan daitezkeen kostuak gehituta; hondakinen ekoizleak politika jasangarriagoetan inplikatzea; Ingurumen Organoak orain zabortegian erabiltzen ez diren eremuak handitzeko aukera ematea, eta obrak egitea ahalbidetuko duen aurrekontua izatea.

 

 

Share