Prentsa Oharren banner
Kategoriak: Deialdiak  —  Komunikazio Zerbitzua / Servicio de Comunicación  —  22 uztaila 2019 17:00

Prentsaurrekoa. Adinekoen Zentro Soziokulturaletako 2019-20 ikasturteko jarduera programa aurkeztea

Parte hartzaileak. Gizarte Politiken, Adinekoak eta Haurrak Arloko zinegotzi Jon Armentia

Eguna. Asteartea, uztailak 23

Ordua. 11:00

Tokia. Udaletxeko prentsa aretoa


Udaltzaingoaren eta Ertzaintzaren arteko koordinazio komisioan lortutako akordioen inguruko informazioa, Andre Maria Zuriaren Jaietara begira.

Parte hartzaileak. Gasteizko alkate Gorka Urtaran eta Segurtasun saileko sailburuorde Josu Zubiaga.

Ordua. 13.15

Tokia. Alkatetza


 

Harrera ekitaldia IV. Congreso Nacional de Psicología biltzarreko parte hartzaileei

Parte hartzaileak. Vitoria-Gasteizko alkate Gorka Urtaran

Eguna. Asteartea, uztailak 23

Ordua. 19:00

Tokia. Udaletxeko harrera aretoa

Share
Kategoriak: Prentsa oharrak  —  Etiketak:   —  Komunikazio Zerbitzua / Servicio de Comunicación  —   14:53

Ekitaldiaren emaitza positiboa izan zen, eta udal zorra 112,4 milioi da orain; 2015ean, berriz, 123 milioi zen   

Gasteizko Udaleko Kontuen Batzorde Bereziak 2018ko ekitaldiari dagokion kontu orokor bateratuaren aldeko txostena onetsi du gaur, udal gobernua osatzen duten taldeen (EAJ eta PSE-EE), PPren eta Elkarrekin-en botoekin. Horrela, egindako lan teknikoak ekonomia eta finantzen zein ondarearen egoera, ekonomia eta ondare emaitzak eta aurrekontuen likidazioa fideltasunez islatzen dituela berretsi da.

Kontu Orokorra onestea funtsezkoa da kanpoko kontrol organoek —Herri Kontuen Euskal Epaitegiak, bereziki— fiskalizatu dezaten, eta ez du esan nahi bertan islatutako egintzekiko adostasuna. Kontu Orokorra ekonomia eta finantza dokumentua da, aurrekontuko eragiketak, aurrekontutik kanpokoak, ondarekoak eta diruzaintzakoak barne biltzen dituena. Udalaren beraren informazio ekonomikoa, erakunde autonomoena (Ingurugiro Gaietarako Ikastegia, Udal Musika Eskola eta Udal Dantza Eskola) eta udal sozietateena (21 Zabalgunea, AMVISA, TUVISA eta GILSA) integratzen dira kontuan.

 

2018ko Kontu Orokorretik eta urte bereko Egonkortasun Txostenetik datu hauek ondorioztatzen dira:

2018ko ekitaldiaren emaitza diru-sarrera eta gastuen arteko aldeak zehazten du, eta positiboa izan da: 30.278.945,71 euro.

-Gasteizko Udalak 2018ko ekitaldian jasotako kapital dirulaguntzak 17.888.411,62 euro izan dira.

– Udalak formalizatutako zorpetze eragiketak: 

Udalaren zor bizia (kredituko finantza-erakundeekiko zorpetzea) 86.400.845,47 euro zen 2018ko abenduaren 31n. Gogoan izan beharra dago Gasteizko Udalaren zor bizia  100.000.000 euro zela 2015eko abenduan.

Erakunde autonomoen eta 21 Zabalgunea eta TUVISA sozietate publikoen zorra kontuan hartuz gero, zor bizia 112.476.040,43 euro da; 2015eko abenduan, berriz, 123.000.000 euro zen.

Alkateorde eta Ogasuneko zinegotzi Iñaki Gurtubaik nabarmendu duenez, “badira Gasteizko Udalak soberan betetzen dituen beste bi adierazle zorrarekin lotuta. Izan ere, legeak ezartzen du zor biziak ezin dituela finantzez besteko diru-sarreren % 60 gainditu, ezta diru-sarrera arrunten % 110. Bada, Udalak osatzen duen taldeak finantza-erakundeekin duen zorra 112.476.040,43 euro da, hau da, % 30,59koa finantzez besteko diru-sarrerei dagokienez, eta % 32,39koa diru-sarrera arruntei dagokienez”. 

Orobat, Iñaki Gurtubairen hitzetan, “2018ko ekitaldian Gasteizko Udalak bete egin ditu gastuaren araua, zorraren muga eta hornitzaileei ordaintzeko batez besteko epea. Alegia, aurrekontu-egonkortasunaren eta finantza-iraunkortasunaren legedia zuzen bete du”.

Gastu-arauaren muga 306.025.726,24 euro zen 2018an, eta gastu zenbakarria 304.916.482,60 izan zen ekitaldi horretan. Horrenbestez, gastu-araua bete da, 1.106.243,64 euroko aldearekin.

Urtean hornitzaileei ordaintzeko batez besteko denbora 23,23 eguneko izan da faktura erregistratu denetik kontatuta, hau da, araudiak eskatzen duen 30 eguneko epea baino laburrago.

Udalaren aurrezpen garbia positiboa izan da. Zehazki, 15.823.201,77 euro da, hots, I. eta V. kapituluen diru-sarreren % 4,56. “Edonola ere, zuhurtzia ekonomikoaren ikuspuntutik, kontu-hartzaileak ohartarazten digu diru-sarrera eta gastu arrunten arteko aldea txikia dela, eta neurriak hartzeko eskatzen, diru-sarrera eta gastu arrunten arteko erlazioa hobetzearren”, adierazi du Ogasuneko zinegotziak.

Horrekin lotuta, Gurtubariren iritziz, “udaleko Kontu-hartzailetza Nagusiaren aholku edo ohartarazpen hori abiapuntu egokia da talde politikoen artean diru-sarrerak (2020rako ordenantza fiskalak) eta gastuak (2020ko aurrekontua) negoziatzeko uda amaitu ondoren”.

 

Share
Kategoriak: Udaltzaingoaren eta suhiltzaileen jakinarazpenak  —  Komunikazio Zerbitzua / Servicio de Comunicación  —   14:05

 

Udaltzaingoaren Agenteek 18 urteko mutil gazte bat atxilotu zuten ostiralean 07:00ean, Posta kaleko ostalaritza-establezimendu bateko arduraduna labanaz mehatxatzeagatik.

Patruila batek lokalaren inguruetan topatu zuen, aurpegia estaltzen zion txapel bat eta zapi bat zeramatzala. Arropen artean arma zuria zeraman. Ostalariak ezagutu egin zuen gaztea, eta Agirrelandara eraman zuten izapide egokiak egin zitzaten.

Udaltzaingoak 38 urteko gizonezko bat atxilotu zuen atzo goizean, agintaritza-agenteen aurkako atentatu-delitu batengatik. Emakume batek 092 zenbakira deitu zuen 8:30ean, Koroatze auzoko bere etxera poliziak etor zitezela eskatuz, bere bikotekide ohia atea joka ari zelako. Patruila salatuarekin hitz egiten ari zela, hark udaltzainen aurka eraso egin zuen, eta horrexegatik, menderatu ondoren, atxilotu egin zuten.

Udaltzaingoaren Agenteek larunbateko azken orduan 24 urteko emakume bat atxilotu zuten bere bikotekidea jotzeagatik. Gertaera horiek 21:00ak baino minutu batzuk lehenago izan ziren Heraclio Fournier kalean, eta lekuko batzuen arabera, emakume hori gizonezko bat jotzen ari zen bide publikoaren erdi-erdian.

Udaltzainak bertara iritsi zirenean, bi pertsona horiek aurkitzea lortu zuen, elkarrengandik bereizi eta bakoitza bere aldetik joanak baitziren. Biktimak aitortu zuen minutu batzuk lehenago neskalagunak jo egin zuela kalean izandako eztabaida batean,. Mutil gazteak eraso horrek eragindako aztarnak zeuzkan, baina baita lehenagoko beste batzuk ere, eta udaltzainei adierazi zien irainak eta mehatxuak ere ohikoak zirela. Hori guztia ikusita, patruilak atxilotu egin zuen emakumea, eta atzo goizean epailearen esku geratu zen.

Alkoholemiak

Udaltzaingoa izapidetzen ari den argiketa batzuetan, edari alkoholdunen eraginpean gidatzeagatik bost pertsona ikertzen ari da. Horietako bat asteburuan egindako 8 prebentzio-kontroletako batean harrapatu zuten; guztira, 157 gidari igaro ziren kontrol horietatik.

Gainera, izapideak abiarazi zitzaizkion 25 urteko mutil gazte bati, Guardiako Epaitegira bidaltzeko, bide-segurtasunaren aurkako delitu bat egin zuelako. Gizonezkoa Alibarri kalean topatu zuten, auto bat gida-baimenik gabe gidatzen ari zela.

Bost pertsona zauritu dira trafiko-istripuetan

Uztailaren 19az geroztik –ostirala– 23 trafiko-istripu erregistratu dira, eta horietan 5 pertsona zauritu dira.

Ostiralean 14:00ean istripu bat gertatu zen Antonio Machado kalean bi autoren artean izandako talkaren ondorioz. Talka horren eraginez, gidatzen zihoan 38 urteko emakume bat zaurituta geratu zen eta Txagorritxu Ospitalera eraman behar izan zuten.

Bi ordu geroago, motoz zihoan 64 urteko gizonezko bat zauritu zen Elorriagako Atea eta Brusela Hiribidearen arteko biribilgunean, kontrako norabideko errailera igaro eta furgoneta baten aurka talka egin ondoren; Santiago Ospitalera eraman zuten.

Larunbat goizaldera, bizikletaz zihoan 37 urteko gizonezko bat zaurituta geratu zen edari alkoholdunen eraginpean zihoala bere bizikletaren kontrola galdu eta lurrera erori ondoren, Euskal Herria Bulebarreko bus-errailean. Txagorritxu Ospitalera eraman zuten. Argiketako patruila batek alkoholemia-proba egin zion, eta arnastutako aire-litro bakoitzeko 0,89 miligramoko tasa eman zuen, eta beraz, salaketa administratiboa jarri zioten.

Kale horretan bertan, 13:15ak aldera, istripu bat gertatu zen auto baten eta motozikleta baten arteko talkaren ondorioz; motoa gidatzen zihoan 37 urteko gizonezkoa zaurituta geratu zen eta anbulantzia batek Santiago Ospitalera eraman zuen.

Motoa gidatzen ari zen 47 urteko beste gizonezko bat ere zauritu zen Sofia Erregina Hiribidearen eta Mariturri Bulebarraren arteko elkargunetik zihoala. Larrialdi-zerbitzuek Santiago Ospitalera eraman zuten.

Asteburuan barrena 38 salaketa aurkeztu dira Polizia Judizialean.

Share
Kategoriak: Prentsa oharrak  —  Etiketak: , ,   —  Komunikazio Zerbitzua / Servicio de Comunicación  —   11:51

Aukeraketaren bidez, haien lan desinteresatua eskertu nahi izan du alkateak, eta pertsona gehiagok lan asebetegarri horrekin bat egin dezaten lagundu  

Gorka Urtaran alkatearen adierazpenak

Abuztuaren 4ko seietan 2019ko Andre Maria Zuriaren jaietako suziria nork jaurtiko duen iragarri du Gasteizko alkate Gorka Urtaranek. Imanol Vega traumatologoa, Adela Fonseca erizain eta ebakuntza gelako instrumentista eta Francisco Granados ortopedista dira; osasun arloko langile horiek aste batzuk igarotzen dituzte urtero Bolivian eta Benin errepublikan, osasun larriak dituzten eta baliabiderik ez duten biztanleei arreta emateko.

Agintaldi hasi berriaren lehen urtean, Eusko Alderdi Jeltzalearen udal taldeari dagokio aukeratzea nortzuek jaurtiko duten jaien hasiera eta Zeledonen jaitsiera markatzen duen suziria. Gorka Urtaranek azaldu duenez, aukera hori eginez hiriak esker ona adierazi nahi die sufritzen dutenei eta arazoei aurre egiteko baliabiderik ez dutenei laguntzen beren denbora eta dirua ematen duten pertsonei.

“Zehazki, osasun arloko langile kooperanteez ari gara, eta hiru pertsona hauen bidez sinbolizatu ditugu, nahiz eta beste asko diren inplikatzen direnak, mugarik gabeko elkartasuna eta eskuzabaltasuna erakutsiz. Medikuntza eta ekonomia baliabiderik ez duten pertsonei lagundu ahal izateak poz handia ematen die. Eta gu, hiri gisa, oso harro gaude lan hori musu truk egiten duten auzokideak izateaz, oso baldintza gogorretan bizi diren beste batzuei hainbesteko ongizatea ematen baitiete. Beren lanaren emaitza ikusi ahal izateak, eta besteen bizitza nola aldatzen den ikusteak —esan du Gorka Urtaranek— oso asebetegarria izan behar du”.

“Aurtengo txupinero izendatuz, haien lana aitortu nahi dugu, eta gure esker ona eta miresmena adierazi, beren familiak eta lana aldi batez uzten baitituzte lan zoragarri hori egiteko; aldi berean, egiten dutena ezagutarazi nahi dugu, hartara pertsona gehiagok har dezaten parte horrelako ekintzetan, leku horietara joanez edo dirua eta materiala emanez. Grina handiz egiten dute lan hori, eta eskertzeko egin dezakegun gutxienekoa da”, erantsi du alkateak.

Imanol, Adela eta Franciscok Gasteizen egiten dute lan, baina urteak dira aste batzuk erreserbatzen dituztela Afrika eta Hego Amerikara era altruistan bidaiatzeko. Han ebakuntza ugari egiten dituzte, eta material ortopedikoa ematen pertsona kopuru handiari —horietako asko, adingabeak—, gobernuz kanpoko zenbait erakunderekiko lankidetzan: Denok Osasunaren Alde (DOA) eta Les énfants du Noma; haiek ere sortu dute irabazi-asmorik gabeko elkarte bat,  Asociación de Ayuda en Traumatología y Ortopedia (ADATO) izenekoa. Malformazioak, anputazioak, hausturak edo elikadura gabeziak dituzten pertsonei ematen diete arreta. Oro har, haien herrialdeetan bertan ematen dizkiete arreta eta materiala, baina batzuetan Gasteizera ere etorri dira gaixoak arreta jasotzera. Esate baterako, orain bizkarrezur arazo larriak dituen 12 urteko neska bati egingo diote ebakuntza hirian.

Imanol Vega traumatologoak hitz egin du bere lankideen izenean: “Ez dago Andre Maria Zuriaren jaietako txupineroa izatea baino ohore handiagorik, baina metxa pizteak eta suziriaren leherketak, jaiak hasteko ez ezik, “eskerrik asko” handia izatea nahi dut, itzalean lan egiten duten eta gaur hemen egoterik ez duten osasun arloko langileen zein osasun arlokoak ez diren kooperanteen eskerrak. Eskerrik asko kooperazio guztiaren izenean”.

Vega doktoreak —Arabako Medikuen Elkargoak ere haren lan solidarioa saritu zuen 2018an— Benin eta Bolivian egiten duten lana azaldu du: lan ordu ugari, ahalik eta gaixo gehiei arreta eman eta ebakuntza egitearren. “Kirurgia guztiak bertako langileekin egiten ditugu, prestakuntza emateko premisarekin, urteko gainerako egunetan gure urratsei jarraitzerik izan dezaten. Baina nabarmendu nahi dut haiek gure teknikak ikasi ez ezik geuk ere ikasten dugula haiengandik, eta asko, ezagutza eduki badutelako, baliabiderik ez izan arren. Beti esaten dugu misioetatik eramaten duguna baino askoz ere gehiago ekartzen dugula”, azpimarratu du.

 

 

Share